ရန်ကုန်၊ အောက်တိုဘာ ၂၃
ကရင်ပြည်နယ်၊ ထိုင်း-မြန်မာနယ်စပ်၊ မြ၀တီမြို့နယ်၊ KK Park မှ ကျားဖြန့်လုပ်ကိုင်သော နိုင်ငံခြားသား ၆၀၀ ကျော် မဲဆောက်မြို့သို့ ထွက်ပြေးရောက်ရှိလာပြီး အရေအတွက် ထပ်မံမြင့်တက်လာနိုင်ကြောင်း နယ်စပ်သတင်းရင်းမြစ်များနှင့် ထိုင်းသတင်းဌာနများ၏ ထုတ်ပြန်ချက်အရ သိရှိရသည်။
အောက်တိုဘာလ ၂၂ ရက်နေ့မှစတင်ပြီး KK Park အတွင်းမှ ကျားဖြန့်လုပ်ကိုင်နေသော မြန်မာများနှင့် နိုင်ငံခြားသားများကို လုံခြုံရေးယူပေးထားသော BGF တပ်ဖွဲ့က နှင်ထုတ်နေရာ ယမန်နေ့ညပိုင်းမှစတင်ပြီး ထိုင်းနိုင်ငံ၊ မဲဆောက်မြို့ဘက်သို့ တရုတ်နိုင်ငံသားများအပါအဝင် နိုင်ငံခြားသားများ ရာချီ ထွက်ပြေး ရောက်ရှိနေကြကြောင်း၊ တရုတ်နိုင်ငံသားများမှာ ထိုင်း-မြန်မာနယ်စပ် သောင်ရင်းမြစ်ကို ရေကူး ဖြတ်ကူး၍ မဲဆောက်မြို့သို့ တဖွဲဖွဲ ရောက်ရှိ လာနေကြကြောင်း သိရှိရသည်။
“မြ၀တီမြို့ပေါ် ဟိုတယ်၊ တည်းခိုခန်းတွေလည်း အပြည့်ပဲ။ အရေးကြီးတဲ့ တရုတ်ကျားဖြန့် သူဌေးကြီးတွေကိုတော့ BGF နဲ့ DKBA က ခိုလှုံခွင့်ပေးထားတယ်။ အလုပ်သမားနဲ့ အလုပ်ကြီးကြပ်တွေလောက်ပဲ အဆင့်ရှိတဲ့ တရုတ်တွေကတော့ အဆင်ပြေတဲ့နေရာ ပြေးကြတယ်။ KK Park ကနေ မြ၀တီကို ဆိုင်ကယ်ကယ်ရီတွေ ကားအငှားတွေလည်း အလုပ်အရမ်းဖြစ်နေတယ်။ တရုတ်တချို့ သောင်ရင်းမြစ်ကို ရေကူးဖြတ်ကူးပြီးလည်း ပြေးကြတယ်။ အဓိက BGF က နှင်လွှတ်နေတာ။ KK Park ကို အဓိက တာဝန်ယူထားတာက BGF တွေပဲ” ဟု မြ၀တီမြို့ အခြေစိုက် နယ်စပ်သတင်းရင်းမြစ်က ပြောဆိုသည်။
ထိုင်းအာဏာပိုင်များကလည်း မြ၀တီမြို့ KK Park ဘက်မှ ထွက်ပြေးလာသော နိုင်ငံခြားသားများကို စိစစ်လက်ခံနေပြီး ယာယီထားရှိရာ နေရာများ စီစဉ်နေကြောင်း၊ လတ်တလော နိုင်ငံခြားသားအရေအတွက် ၆၀၀ ကျော် လက်ခံထားပြီး မကြာမီ အရေအတွက် ထောင်ကျော်သွားနိုင်၍ ယာယီထားရှိမည့်နေရာများ ထပ်မံ ဖန်တီးရှာဖွေနေကြောင်း ထိုင်းသတင်းများက ဆိုသည်။
အကြမ်းဖက်စစ်တပ်က KK Park ကို ဝင်ရောက်စီးနင်းရန်ရှိနေသည်ဆိုသော သတင်းများကလည်း ထွက်ပေါ်လျက်ရှိသဖြင့် KK Park အတွင်းမှ ကျားဖြန့်လုပ်သူများ ထောင်သောင်းချီ ထွက်ခွာနေရာ လုံခြုံရေးအစောင့် ကရင်နယ်ခြားစောင့်တပ် BGF များကလည်း ဂိတ်နှင့်လုံခြုံရေးနေရာများအားလုံးကို ဖွင့်ပေးထားကြောင်း သိရှိရသည်။
အောက်တိုဘာလ ၁၉ ရက်နေ့ကလည်း အကြမ်းဖက် စစ်တပ်က မြ၀တီမြို့နယ်အတွင်းရှိ KK Parkကို စီးနင်းခဲ့ရာ ဆောက်လုပ်ပြီးအဆောက်အအုံ ၁ ထပ်တိုက် ၁၀ လုံး၊ ၂ ထပ်တိုက် အလုံး ၁၀၀၊ ၄ ထပ်တိုက်အလုံး၂၀၊ ၅ ထပ်တိုက် ၂ လုံး၊ ၁ ထပ်တိုက် ဈေးဆိုင်ခန်း၂၀ လုံး၊ ၂ ထပ်တိုက် ဈေးဆိုင်ခန်း ၃၀ လုံး၊ ၁ ထပ်တိုက်ဂိုထောင် ၁၅ လုံး၊ ၂ ထပ်တိုက်ဂိုထောင် ၂၀ လုံး၊ ၄ ထပ်တိုက် ဂိုထောင် ၁၀ လုံး၊ ဆောက်လုပ်ဆဲ ၂ ထပ်တိုက် ၂၁ လုံး၊ ၃ ထပ်တိုက် ၁၀ လုံး၊ ၄ ထပ်တိုက် ၅ လုံး၊ ၅ ထပ်တိုက် ၅ လုံးနှင့် ၁ ထပ်တိုက် ဆေးပေးခန်း ၂ ခန်းတို့ တွေ့ရှိခဲ့ကြောင်း ၊ Star Link စလောင်း အစုံ ၃၀ နှင့် ဆက်စပ်ပစ္စည်းများ သိမ်းဆည်းရမိခဲ့ပြီး အလုပ်သမား အမျိုးသား ၁၆၄၅ ဦး၊ အမျိုးသမီး ၄၅၅ ဦး၊ လုံခြုံရေးအမျိုးသား ၉၈ ဦး စုစုပေါင်း ၂၁၉၈ ဦး တွေ့ရှိခဲ့ကြောင်း စစ်တပ်က ထုတ်ပြန်ထားသည်။
မြ၀တီမြို့နယ် KK Park မှာ စစ်တပ်လက်အောက်ခံ BGF ခေါင်းဆောင် စောချစ်သူ ဦးဆောင်သော တပ်ဖွဲ့များက ဦးစီး၍ ကျားဖြန့် အွန်လိုင်းငွေလိမ်လုပ်ငန်းများကို လက်ခံထားခြင်းဖြစ်သည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
