KNU ခေါင်းဆောင်ပိုင်းက ကျားဖြန့် လုပ်ငန်းများတွင် ပါဝင်ပတ်သက်နေဟု အကြမ်းဖက် ဇော်မင်းထွန်းစွပ်စွဲ
ရန်ကုန်၊ နိုဝင်ဘာ ၂၈
ကရင်ပြည်နယ်၊ မြ၀တီမြို့နယ်၊ မင်းလက်ပံကျေးရွာKNU က ထိန်းသိမ်းထားသော ဗိုလ်သခွားသီး လက်အောက်ခံ DKBA အဖွဲ့ဝင် ၁၀၀ ကျော်ကို ပြန်လည် လွှဲပြောင်းပေးလိုက်ကြောင်း ကရင်စစ်ရေး သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
နိုဝင်ဘာလ ၂၁ ရက်နေ့ မြ၀တီမြို့နယ်၊ မင်းလက်ပံကျေးရွာတွင် KNU နှင့် စစ်တပ်အကြား တိုက်ပွဲဖြစ်ပွားခဲ့ကြောင်း၊ စစ်တပ်ဘက်မှ ဗျူဟာမှူး နိုင်လွင် ဦးဆောင်သော တပ်များနှင့် DKBA မှ စိုင်းကျော်လှ ဦးဆောင်သော ပူးပေါင်းတပ်များက မင်းလက်ပံရှိ KNU တပ်စခန်းများကို ထိုးစစ်ဆင် တိုက်ခိုက်လာခြင်းဖြစ်ကြောင်း၊ တိုက်ပွဲဖြစ်ပွားပြီးနောက် DKBA စခန်းကို KNU က သိမ်းပိုက်နိုင်ခဲ့ပြီး DKBA တပ်ဖွဲ့ဝင် ၂၃၀ ကျော် လက်နက်ချခဲ့ကြောင်း သိရှိရသည်။
ယနေ့ နိုဝင်ဘာလ ၂၈ ရက်နေ့ KNU က ဖမ်းဆီးထိန်းသိမ်းထားသော DKBA အဖွဲ့ဝင် ၁၀၀ ကျော်ကို DKBA ဌာနချုပ်၊ ဆုံဆည်းမြိုင်ထံသို့ လွှဲပြောင်းပေးအပ်လိုက်ကြောင်း သိရှိရသည်။
လက်ရှိ ကရင်ပြည်နယ်၊ မြ၀တီမြို့နယ်၊ မင်းလက်ပံကျေးရွာအနီးတွင် ပစ်ခတ်မှုတချို့ ဖြစ်ပေါ်ခဲ့ပြီး စစ်တပ်က လေယာဉ်ဖြင့် ဗုံးကျဲချခဲ့ကြောင်း၊ မင်းလက်ပံကျေးရွာအနီး သောင်ရင်းမြစ်ကမ်းဘေးတွင် ကျားဖြန့် နိုင်ငံခြားသား ရာပေါင်းများစွာ သောင်တင်နေဆဲဖြစ်ကြောင်း သိရှိရသည်။
“ဒီမနက် ၁၀ နာရီခွဲလောက်မှာ မြ၀တီမြို့နယ်၊ ကျားဖြန့် ဆိုက်တွေဘက်ကို လေယာဉ်နဲ့ ဗုံးလာကျဲသွားတယ်။ အဲဒီနေရာတွေက ထိတွေ့ မှုဖြစ်နေတဲ့နေရာတွေပါ။ စစ်တပ်နဲ့ KNLA တပ် တွေ က မင်းလက်ပံ၊အင်ကြင်းမြိုင်၊ထီးမယ်ဝါးခီး ရွာ အကြား မှာတိုကိပွဲ ပြင်း နေတုန်းပဲ။ စစ်တပ်က လေကြောင်းတိုက်ခိုက်တယ်၊ ဒရုန်းတွေနဲ့ ဗုံးကျဲတယ် “ဟု ကရင်စစ်ရေး သတင်းရင်းမြစ်က ပြောဆိုသည်။
လတ်တလော ကျားဖြန့် အလုပ်ရုံအများစုမှာ ရပ်နားနေပြီး နေရပ်ပြန်ကြသည့် မြန်မာကျားဖြန့် အလုပ်သမားများကို နိုဝင်ဘာလ ၂၂ ရက်နေ့ စစ်တပ်က ပစ်ခတ်မှုများ လုပ်ဆောင်ခဲ့ရာ ၄ ဦးခန့်သေဆုံးခဲ့ကြောင်း၊ ဒဏ်ရာရရှိသူတချို့လည်းရှိကြောင်း သိရှိရသည်။
အခြားတစ်ဖက်တွင်လည်း စစ်တပ်လက်အောက်ခံ BGF မှ စောချစ်သူ၏ ချစ်လင်းမြိုင်ကုမ္ပဏီက စတင်အကောင်အထည်ဖော်ခဲ့သော ရွှေက္ကိုလ်စီမံကိန်းကို KNU ကလုပ်ဆောင်သည်ဟု အကြမ်းဖက် စစ်တပ်၏ ပြောရေးဆိုခွင့်ရှိသူ ဇော်မင်းထွန်းက စွပ်စွဲပြီး ကျားဖြန့်လုပ်ငန်းများတွင် KNU ခေါင်းဆောင်ပိုင်းပါဝင်ပတ်သက်နေကြောင်း ယနေ့ ဝါဒဖြန့်သည်။
၂၀၁၅ ခုနှစ်မှာ NCA တစ်နိုင်ငံလုံးအပစ်ရပ် သဘောတူစာချုပ်ကို ကရင်လက်နက်ကိုင်အဖွဲ့တွေဖြစ်တဲ့ DKBA ၊ KNU/KNLA-PC ၊ KNU တို့ ပါဝင်လက်မှတ်ရေးထိုးခဲ့ပြီး နယ်မြေတည်ငြိမ်မှုရှိလာသည်နှင့်အမျှ ဒေသဖွံ့ဖြိုးရေးလုပ်ငန်းများကို ဆောင်ရွက်ခဲ့ကြကြောင်း၊ ယင်းနောက် ၂၀၁၆ ခုနှစ်တွင် KNU တပ်မဟာ ၇ နယ်မြေထဲတွင ရွှေကုက္ကိုလ်စီမံကိန်းကို စတင်ခဲ့ကြောင်း၊ ၂၀၁၇ ခုနှစ်အတွင်း ကျောက်ခတ်ကျေးရွာတွင် Chongkhaed Garden Resort လောင်းကစားရုံစီမံကိန်းနှင့် ၂၀၂၀ ပြည့်နှစ် နှစ်ဦးပိုင်းတွင် တပ်မဟာ ၆ နယ်မြေ မဲ့ထော်သလေးဒေသတွင် KK Park စီမံကိန်းတို့ကို စတင်လုပ်ဆောင်ခဲ့ကြကြောင်း အကြမ်းဖက် ဇော်မင်းထွန်းက ပြောဆိုသည်။
“KNU ခေါင်းဆောင်ပိုင်းတွေအနေနဲ့ လုပ်ပိုင်ခွင့်ကို တရားဥပဒေမဲ့အသုံးချကာ နိုင်ငံပိုင်မြေတွေကို နှစ်ရှည်စာချုပ်ချုပ်ပြီး ပြည်ပနိုင်ငံသားတွေကိုငှားရမ်းတာ၊ တရားမဝင်လောင်းကစားလုပ်ငန်းအပါအဝင် ဒုစရိုက်လုပ်ငန်းတွေကို အခကြေးငွေယူပြီး အကာအကွယ်ပေးတာတွေလုပ်ဆောင်ခဲ့ကြတာဖြစ်ပါတယ်။ ဒီနယ်မြေမှာ အခြေချလာတဲ့ ပြည်ပနိုင်ငံသားတွေအများစုဟာ ကမ္ဘောဒီးယားနိုင်ငံက ကာစီနိုလောင်းကစားမြို့ဖြစ်တဲ့ သီဟာနုဘေလ်ကနေ ပြောင်းရွှေ့လာကြတာဖြစ်ပါတယ်။ “ဟု အကြမ်းဖက် ဇော်မင်းထွန်းက ပြောဆိုသည်။
ယင်းနောက် ရွှေကုက္ကိုလ်စီမံကိန်းကို မြန်မာ-ရထိုက် ရွှေကုက္ကိုလ် အထူးစီးပွားရေးဇုန်စီမံကိန်းအဖြစ် Yatai International Holding Group နှင့် ချစ်လင်းမြိုင်ကုမ္ပဏီတို့က ပူးပေါင်းလုပ်ဆောင်ကြောင်း၊ ရွှေကုက္ကိုလ်စီမံကိန်းတစ်ခုတည်းသာ နိုင်ငံတော်သို့ တစ်စိတ်တစ်ပိုင်းတင်ပြပြီး ကျောက်ခတ်နှင့် KK Park စသော စီမံကိန်းများကို လုံး၀ မတင်ပြခဲ့ကြောင်း၊ မြဝတီမြို့နယ်၊ ကျောက်ခတ်ကျေးရွာတွင် Chongkhaed Garden Resort လောင်းကစားရုံစီမံကိန်းကို DKBA မှ ဗိုလ်မှူးချုပ် စိုင်းကျော်လှ က ၂၀၁၇ ခုနှစ်တွင် စတင်ခဲ့ကြောင်း၊ ၂၀၁၉ ခုနှစ်၊ နိုဝင်ဘာလတွင် ထိုင်းနိုင်ငံအခြေစိုက် ထိုက်ချန်ကုမ္ပဏီနှင့် စာချုပ်ချုပ်ပြီး Online လိမ်လည်လောင်းကစားမှုလုပ်ငန်းများကို တိုးချဲ့လုပ်ကိုင်ခဲ့ကြောင်း ဇော်မင်းထွန်းက ဆိုသည်။
KK Park စီမံကိန်းကိုတော့ KNU ၏ မုလအိအလင်း (Mu La Ei Ahlin) ကုမ္ပဏီနှင့် ဟွာ့ည အပြည်ပြည်ဆိုင်ရာ စီးပွားရေးလုပ်ငန်းစု (Huanya International Holding Group) လက်အောက်ခံ ထိုင်းနိုင်ငံ အခြေစိုက် Trans Asia International Holding Group တို့က ၂၀၂၀ ပြည့်နှစ်၊ ဖေဖော်ဝါရီလအတွင်းမှာ သဘောတူစာချုပ်ချုပ်ပြီး စတင်လုပ်ဆောင်ခဲ့ကြောင်း၊ မုလအိအလင်းဘက်မှ အသိသက်သေများအဖြစ် လက်ရှိ KNU ဥက္ကဋ္ဌ စောကွယ်ထူးဝင်းနှင့် KNU ကာကွယ်ရေးဌာန အကြီးအကဲ စောရော်ဂျာခင်တို့ကိုယ်တိုင် လက်မှတ်ရေးထိုးထားခဲ့ကြောင်း၊ မုလအိအလင်း ကုမ္ပဏီကို KNLA စစ်ဦးစီးချုပ်အဆင့်ရှိ စောဂျော်နီ၏ သားအကြီးဆုံး စောဒို့စိုးဂျော်နီက ပိုင်ဆိုင်တာဖြစ်ပြီး မြေပြင်တွင် လူယုံစောဝင်းကျော်နှင့် စောကျော်သူတို့က လုပ်ကိုင်နေကြောင်း ဇော်မင်းထွန်းက ပြောဆိုသည်။
KNU ကမူ ကျားဖြန့်လိမ်လည်မှုလုပ်ငန်းကို ဖြေရှင်းရန်အတွက် ခိုင်မာ ပေါင်းစပ်ထားသော နိုင်ငံတကာပူးပေါင်းဆောင်ရွက်မှု လိုအပ်နေကြောင်း၊ KNU က ကျားဖြန့် ခြံဝင်းအတွင်း ကျန်ရှိနေသူများကို ဆက်လက်ဖော်ထုတ်ပြီး ရွေးချယ်စုံစမ်းစစ်ဆေးမှုများ ဆက်လက်လုပ်ဆောင်မည်ဖြစ်သော်လည်း ထိရောက်သော စုံစမ်းစစ်ဆေးမှုနှင့် သက်သေအထောက်အထားများ စုဆောင်းခြင်းသည် KNU ၏ စွမ်းဆောင်ရည်ထက် ကျော်လွန်နေကြောင်း တရားဝင် ကြေညာချက်ထုတ်ပြန်ထားသည်။
သိမ်းဆည်းရမိသော ပစ္စည်းအားလုံးကို KNU နှင့် ပူးပေါင်းဆောင်ရွက်နေသော အာဏာပိုင်များနှင့်စုံစမ်းရေးအဖွဲ့များထံသို့ လွှဲပြောင်းပေးမည်ဖြစ်ကြောင်း၊ နက်နက်ရှိုင်းရှိုင်း အမြစ်တွယ်နေသော၊ အဆင့်မြင့်ပြီး နိုင်ငံဖြတ်ကျော် ရာဇဝတ်ကွန်ရက်များကို ဖျက်ဆီးပစ်ရန် ကြိုးပမ်းမှုများသည် ခိုင်မာသော ခေါင်းဆောင်မှု၊ မယိမ်းမယိုင်သော ကတိကဝတ်၊ ခိုင်မာသော နိုင်ငံများနှင့် ဥပဒေစိုးမိုးရေး အဖွဲ့အစည်းများကြား ခိုင်မာသော ပူးပေါင်းဆောင်ရွက်မှု တို့ဖြင့်သာ အောင်မြင်နိုင်မည်ဖြစ်ကြောင်း၊ နိုင်ငံတကာပါဝင်မှုမရှိလျှင် ကမ္ဘာကို ခြိမ်းခြောက်နေသည့် နိုင်ငံဖြတ်ကျော် ကျားဖြန့် လိမ်လည်မှုများအတွက် စံနမူနာပြ အမှုဖြစ်သော အဆိုပါ ကျားဖြန့်ဝင်းကို စုံစမ်းစစ်ဆေးရန် အခွင့်အရေး ဆုံးရှုံးစေမည်ဖြစ်ကြောင်း KNU က နိုင်ငံတကာသို့ အကူအညီတောင်းခံသည်။
KNU အနေဖြင့် မိမိအုပ်ချုပ်နယ်မြေတွင် ဥပဒေစိုးမိုးရေးကို ထိန်းသိမ်းရန်၊ နိုင်ငံဖြတ်ကျော် ရာဇဝတ်ကွန်ရက်များကို တိုက်ဖျက်ရန်၊ ပဋိပက္ခဒဏ်ခံရသူများကို ကာကွယ်ရန်နှင့် နယ်စပ်တစ်လျှောက် လုပ်ကိုင်နေသော နိုင်ငံတကာရာဇဝတ်ကွန်ရက်များအတွက် တာဝန်ယူမှုကို သေချာစေရန်အတွက် ထိုင်းအစိုးရနှင့် အခြားသက်ဆိုင်ရာ အာဏာပိုင်များ၊ အဖွဲ့အစည်းများနှင့် နီးကပ်စွာ ပူးပေါင်းဆောင်ရွက်လျက်ရှိကြောင်း သိရှိရသည်။
