ရခိုင်ပြည်နယ်၊ ကျောက်တော်မြို့နယ်ကို စစ်တပ်က လေယာဉ်ဖြင့် ဗုံးကျဲချခဲ့ရာ ကလေးငယ် ၁ ဦး အပါအဝင် ပြည်သူ ၆ ဦးသေဆုံးသွားကြောင်း ရခိုင်ဒေသမှ စစ်ဘေးရှောင် ကူညီရေးနှင့် လူမှုကူညီရေး ပရဟိတဆောင်ရွက်နေသူ စာရေးဆရာ ဝေဟင်အောင်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၂၈ ရက်နေ့ နံနက် ၁၀ နာရီ ၅၀ မိနစ်ဝန်းကျင်အချိန် ကျောက်တော်မြို့နယ်အတွင်းရှိ နေရာ ၂ ခုသို့ စစ်တပ်က လေယာဉ်ဖြင့် ဗုံးကျဲချခဲ့ကြောင်း၊ အဆိုပါ ဗုံးကျဲမှုကြောင့် ကလေးငယ် ၁ ဦးနှင့် အမျိုးသမီး ၅ ဦး စုစုပေါင်း ပြည်သူ ၆ ဦးသေဆုံးခဲ့ပြီး ပြည်သူ ၁၀ ဦးထိခိုက်ဒဏ်ရာရရှိထားကြောင်း သိရှိရသည်။
“ဗုံးကျဲတာက ကြောင်ဖိုရွာနဲ့ ကန်စောက်တောင်အနားဝန်းကျင်ကို ကျဲတာပါ။ ကျောက်တော်မြို့နယ်၊ ကြောင်ဖိုရွာကို ၁၀:၅၀နာရီခန့်က လေယဥ်နဲ့ လာပစ်တဲ့အတွက် အမျိုးသမီး ၅ဦးနဲ့ ကလေးငယ် ၁ ဦးသေဆုံးပါတယ်။ နောက်ထပ် ၁၀ ဦးဒဏ်ရာရတယ်။ အိမ် ၄ ဆောင်ပျက်စီးပါတယ်” ဟု စာရေးဆရာ ဝေဟင်အောင်က ပြောဆိုသည်။
ယနေ့ ဗုံးကျဲမှုမှာ တိုက်ပွဲဖြစ်ပွားခြင်းမရှိဘဲစစ်တပ်က လေယာဉ်ဖြင့် အရပ်သားပြည်သူများကိုရည်ရွယ်ချက်ရှိရှိ ဗုံးကျဲချခဲ့ခြင်းဖြစ်ကြောင်း ဒေသပြည်သူများက ပြောဆိုကြသည်။
ရခိုင်ပြည်တစ်ခုလုံးနီးပါးကို စစ်တပ်က ဆုံးရှုံးရန် လက်တစ်ကမ်းအလိုသို့ ရောက်ရှိလာချိန် ပြည်သူများကို လေကြောင်းတိုက် ခိုက်၍ သတ်ဖြတ်မှုများ အရှိန်မြှင့်လာနေသဖြင့် အထူးသတိပြုကြရန် AA က ယခုလအစောပိုင်းတွင် ကြေညာ သတိပေးထားသည်။
AA က မိမိတို့ မျှော်မှန်းထားသော စစ်ရေး၊ နိုင်ငံရေး ရည်မှန်းချက်များ အလုံးစုံ အပြည့်အ၀ အကောင်အထည်ပေါ်စေရန်အတွက် အာရက္ခ ပြည်သူလူထုတစ်ရပ်လုံးနှင့် လက်တွဲပြီး အစွမ်းကုန် ကြိုးစားလျက်ရှိကြောင်း၊ လက်ရှိအချိန်တွင် စစ်တပ်က ရခိုင်ပြည် တစ်ခုလုံးနီးပါးကို လက်လွှတ်ဆုံးရှုံးရန် လက်တစ်ကမ်းအလိုသို့ ရောက်ရှိနေသည့အချိန်ဖြစ်ကြောင်း၊ တစ်ပြိုင်နက်တည်းတွင် စစ်တပ်နှင့် AA တို့က ရခိုင်ရိုးမနှင့် နယ်မြေချင်း ထိစပ်လျက်ရှိသော ပဲခူးတိုင်း၊ မကွေးတိုင်းနှင့် ဧရာ၀တီတိုင်းအစရှိသည့် နေရာများအပြင် အာရက္ခတပ်တော်၏ စစ်ရေး လှုပ်ရှားသော နေရာအချို့တွင်ပါ နှစ်ဖက်တိုက်ပွဲများ ပြင်းထန်စွာ ဖြစ်ပွားလျက်ရှိကြောင်း သိရှိရသည်။
အခြားတစ်ဖက်တွင်လည်း စစ်တပ်က ရှမ်းမြောက်ဒေသတွင် အပစ်အခတ်ရပ်စဲရေးကို ညီနောင်မဟာမိတ် ၃ ဖွဲ့ထဲမှ ကိုးကန့်နှင့် တအာင်းအဖွဲ့များနှင့် မရှေးမနှောင်းပြုလုပ်နိုင်ခဲ့ကြောင်း၊ သို့သော် ၎င်းတို့၏ မြန်မာပြည်သူများအပေါ် နေ့စဉ် ရက်ဆက် ကျူးလွန်နေသော စစ်ရာဇဝတ်မှုများမှာ လျှော့ကျသွားခြင်းမရှိဘဲ ရခိုင်ဒေသတွင်သာမက မြန်မာတစ်နိုင်ငံလုံးအနှံ့အပြားတွင် အရပ်သားပြည်သူများအပေါ် လက်ရဲဇက်ရဲဖြင့် ရာဇဝတ်မှုများ ကျူးလွန်နေဆဲပင်ဖြစ်သည်ဟု AA က ပြောဆိုသည်။
စစ်တပ်အနေဖြင့် တစ်နိုင်ငံလုံးရှိ ပြည်သူများကို လေကြောင်းမှ ဗုံးကျဲတိုက်ခိုက်နေခြင်းနှင့် လက်နက်ကြီး၊ ဒရုန်းများဖြင့် ရည်ရွယ်ချက်ရှိရှိ ပစ်ခတ်တိုက်ခိုက်နေခြင်းမှာ စစ်ရာဇဝတ်မှုကို ဗြောင်ကျကျ ကျူးလွန်နေပြီး လူသားမျိုးနွယ်အပေါ် လက်နက်အားကိုးဖြင့် ပြစ်မှုကျူးလွန်နေခြင်းဖြစ်ကြောင်း၊ စစ်ရှုံးနေမှုကို ဖုံးကွယ်ရန် ကြိုးစားအားထုတ်သည့်အနေဖြင့် အပြစ်မဲ့ ပြည်သူလူထုအပေါ် အကြမ်းဖက် သတ်ဖြတ်နေခြင်း၊ ကမ်းကုန်အောင် ရက်စက်ယုတ်မာနေခြင်းဖြစ်ကြောင်း AA က ပြောသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
