ရန်ကုန်၊ ဧပြီ ၂၀
မကွေးတိုင်း၊ ဆိပ်ဖြူမြို့နယ်ရှိ အကြမ်းဖက် စစ်တပ်၏ ကပစ-၂၁ ကို ၁၀၇ မမ ရှော့တိုက်ဒုံးများ အပါ အဝင် ရော့ကတ်အလုံး ၄၀ ဖြင့် ပစ်ခတ် တိုက်ခိုက်ခဲ့ကြောင်း မကွေးတိုင်း ပကဖ မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၁၉ ရက်နေ့တွင် အကြမ်းဖက် စစ်တပ်၏ ကပစ – ၂၁ ကို တော်လှန်ရေး တပ်ဖွဲ့များက ၁၀၇ မမ ရှော့တိုက်ဒုံးများ အပါအဝင် လက်လုပ် Rocket အလုံး ၄၀ ကျော်ဖြင့် ပစ်ခတ် တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ ထိခိုက်မှု အခြေအနေကို ဆက်လက်စုံစမ်းနေကြောင်း သိရသည်။
ထိုသို့ တိုက်ခိုက်ခြင်းသည် အကြမ်းဖက် စစ်တပ်၏ နိုင်ငံအနှံ့ ထိုးစစ်၊ ခံစစ်များ လျော့နည်းသွားစေရန် ရည်ရွယ်၍လည်းကောင်း၊ ပြည်သူလူထုအပေါ် ဗုံးကျဲ ရမ်းကားနေမှုများကို လျှော့ချနိုင်ရန်အတွက် သော်လည်းကောင်း ရည်မှန်းလုပ်ဆောင်ခဲ့ခြင်းဖြစ်ကြောင်း၊ ယင်းစက်ရုံသည် နိုင်ငံအနှံ့ လေကြောင်း အသုံးပြု၍ ဗုံးကျဲသတ်ဖြတ်နေမှုများတွင် အဓိက အခန်း ကဏ္ဍမှ ပါဝင်နေသည့် ထောက်တိုင် စက်ရုံ တစ်ခုဖြစ်ကြောင်း သိရှိရသည်။
ယင်း ကပစ – ၂၁ စက်ရုံသည် ပေါင် ၃၀၀ ၊ ၅၀၀၊ ပေါင် ၁၀၀၀ ဗုံးများနှင့် Cluster ဗုံးများအပြင် ၂၀၂၄ ခုနှစ် နှစ်ကုန်ပိုင်းမှ စ၍ ဒရုန်းဗုံးသီးများ ထုတ်လုပ်နေကြောင်း၊ ဗုံးသီးများဖြင့် နိုင်ငံအနှံ့ လေကြောင်းတိုက်ခိုက်မှုများ၊ ပြည်သူလူထုနှင့် ရပ်ရွာများအပေါ် ရမ်းကား၍ ဗုံးကျဲ သတ်ဖြတ်နေမှုများ ပြုလုပ်နေသည့်အပြင် ၎င်းတို့၏ နိုင်ငံအနှံ့ ထိုးစစ်၊ ခံစစ်များတွင် အဓိက အထောက်အပံ့ဖြစ်နေကြောင်း မကွေးတိုင်း ပကဖ မှ တာဝန်ရှိသူက ရှင်းပြသည်။
“ထိခိုက်ပျက်စီးမှု အခြေအနေကိုတော့ ကျန်တော်တို့ ဆက်လက် အတည်ပြုနေပါတယ်။ အဲစက်ရုံက နိုင်ငံအနှံ့ လေကြောင်း အသုံးပြုပြီး ဗုံးကျဲသတ်ဖြတ်နေမှုတွေမှာ အဓိက အခန်း ကဏ္ဍကနေ ပါဝင်နေတဲ့ ထောက်တိုင် စက်ရုံပါ။ နောက်ပြီး ပေါင် ၃၀၀ ၊ ၅၀၀၊ ပေါင် ၁၀၀၀ ဗုံးတွေနဲ့ Cluster ဗုံးများတွေ အပြင် ဒရုန်းဗုံးသီးများ ထုတ်လုပ်ပြီး နိုင်ငံအနှံ့ လေကြောင်းတိုက်ခိုက်မှုမှာ ပြည်သူလူထုနဲ့ ရပ်ရွာတွေ အပေါ် ရမ်းကား ဗုံးကျဲ သတ်ဖြတ်နေတာတွေ ပြုလုပ်နေတဲ့အပြင် နိုင်ငံအနှံ့ ထိုးစစ်၊ ခံစစ်များတွင် အဓိက အထောက်အပံ့တဲ့ စက်ရုံပါ” ဟု မကွေးတိုင်း ပကဖ မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို မကွေးတိုင်း ပကဖ၊ မကွေးတိုင်း ပကဖ ဒရုန်းလက်ရုံးတပ်၊ သိန်းငှက်နက် ဆိပ်ဖြူ တော်လှန်ရေးတပ်ဦး (တိုင်းပကဖ ဒရုန်း လက်ရုံးတပ်)၊ Rocket Fighter အဖွဲ့ (တိုင်း ပကဖ လက်ရုံးတပ်)၊ မကွေးတိုင်း ပကဖ၏ တိုက်ခိုက်ရေး စစ်ကြောင်း MGY 30 (SOU – 3)၊ ဂန့်ဂေါခရိုင် ပကဖ မှ ခရိုင် တိုက်ခိုက်ရေးတပ်၊ ဆောမြို့နယ် ပကဖ၊ ထီးလင်းမြို့နယ် ပကဖ ၊ ယောဧရာ (ဂန့်ဂေါခရိုင် ထုတ် လုပ်ရေးအဖွဲ့)နှင့် မင်းဘူးခရိုင် ပကဖ၊ စလင်းမြို့နယ် ပကဖ တို့က ပူးပေါင်း လုပ်ဆောင်ခဲ့ခြင်းဖြစ် ကြောင်း သိရသည်။
မကွေးတိုင်း ပကဖ သည် အမျိုးသားညီညွတ်ရေး အစိုးရ၊ ကာကွယ်ရေးဝန်ကြီးဌာ၏ ကွပ်ကဲ လမ်းညွှန်ချက်များနှင့် အညီ မကွေးတိုင်း အတွင်း နယ်မြေစိုးမိုးမှုများ ရရှိရန် အချက်အချာမြေနှင့် ဗျူဟာလမ်းပိုင်းများ ထိန်းချုပ်နိုင်ရန်တို့အတွက် ပြည်သူ့စစ်မဟာဗျူဟာများအားလည်းကောင်း၊ ရန်သူ အထိနာစေမည့် High Value Target များ (မန်း – သမ္ဘရာကန် လေယာဥ်ဆီချက် စက်ရုံ၊ ဝါဇီ ငွေစက္ကူထုတ် စက်ရုံ၊ ကပစများ) အား တိုက်ခိုက် ဆောင်ရွက်ခဲ့ကြောင်း၊ ဆက်လက်၍လည်း တိုက်ခိုက်မှုများအား စစ်ရေးရည်မှန်းချက်၊ နိုင်ငံရေး ရည်မှန်းချက်များနှင့် အညီ ပြည်သူလူထုအတွက် တိုက်ခိုက်ဆောင်ရွက်သွားမည်ဖြစ်ကြောင်း သိရသည်။
တော်လှန်ရေးတပ်ဖွဲ့များသည် ဧပြီလ ၁၇ ရက်၊ နှစ်ဆန်း ၁ ရက်နေ့တည်းက ကပစ အနီး ချဉ်းကပ်နိုင်၍ ပစ်ခတ်မှုများ ပြုလုပ်နိုင်ခဲ့သော်လည်း မြန်မာ့ ယဉ်ကျေးမှု ဓလေ့ထုံးတမ်း ကျင့်၀တ်များအရ တိုက် ခိုက်မှု မပြုလုပ်ဘဲ ရှောင်ရှားခဲ့ကြောင်း၊ သို့သော် အကြမ်းဖက် စစ်တပ်အနေဖြင့် ရခိုင်ပြည်နယ်၊ ချင်း ပြည်နယ်နှင့် စစ်ကိုင်းတိုင်းတို့တွင် လေကြောင်း တိုက်ခိုက်မှုများအပါ အကြမ်းဖက် ရမ်းကားမှုများ ကျူးလွန်ခဲ့သည်။
အလားတူ စစ်ကိုင်းတိုင်း၊ မုံရွာမြို့နယ်တွင် မိုင်းရှာပြီး ဆက်ကြေးကောက်ရန် ထွက်လာသော စစ်သားများကို တိုက်ခိုက်ရာ အကြမ်းဖက် စစ်တပ်ဘက်မှ ၃ ဦးသေဆုံးခဲ့ကြောင်း BRAVE HEART ARMY-BHA တပ်ဖွဲ့မှ တာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလ ၁၅ ရက်နေ့ နံနက် ၁၀ နာရီခန့်တွင် မုံရွာမြို့နယ် မုံရွေးတိုးဂိတ်မှ Light truck ကား ၁ စီးဖြင့် အင်အား ၂၀ ခန့် ပါဝင်သော အကြမ်းဖက် စစ်သားများသည် မိုင်းရှာပြီး ဆက်ကြေးကောက်ရန် ထွတ်လာစဉ် တော်လှန်ရေး တပ်ဖွဲ့များက မုံရွာ-ချောင်းဦး လမ်းပိုင်းတနေရာ၌ ကြားဖြတ် တိုက်ခိုက်ခဲ့ကြောင်း သိရသည်။
ထိုတိုက်ခိုက်မှုသည် ၂၅ မိနစ်ခန့်သာ ကြာမြင့်ခဲ့ပြီး အကြမ်းဖက် စစ်တပ်ဘက်မှ ပျူစောထီး ၁ ဦးနှင့် ရဲ ၂ ဦး သေဆုံးခဲ့ပြီး ၃ ဦးထိခိုက်ဒဏ်ရာရရှိခဲ့ကြောင်း၊ တော်လှန်ရေးတပ်ဖွဲ့ဘက်မှလည်း ရဲ ဘော် ၁ ဦး မစိုးရိမ်ရဒဏ်ရာရရှိခဲ့ကြောင်း သိရှိရသည်။
“မုံရွာ-ချောင်းဦး လမ်းပိုင်းဘက်ကို မိုင်းရှာပြီး ဆက်ကြေးဖို့ ထွက်လာတဲ့ စစ်ခွေးတွေကို ကြားဖြတ် တိုက်ခိုက်ခဲ့တာ စစ်ခွေးတွေဘက်က ပျူစောထီး ၁ ကောင်နဲ့ ရဲ ၂ ကောင်သေဆုံးတယ်” ဟု BRAVE HEART ARMY-BHA တပ်ဖွဲ့မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို မုံရွာခရိုင်အမှတ်-တပ်ရင်း 7 မှဦးဆောင်ပြီး BRAVE HEART ARMY-BHA၊ Monywa Special ဒိတ်ဒိတ်ကြဲ ၊ Special Force 11. SF11(pdf) ၊ Anyar Defense Force. (အညာကာကွယ်ရေးအင်အားစု)နှင့် Monywa Dynamite.STF တို့က ပူးပေါင်း လုပ်ဆောင်ခဲ့ကြောင်း သိရသည်။
