ရန်ကုန်၊ ဧပြီ ၃၀
နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို နေအိမ်အကျယ် ချုပ် ပြောင်းလဲသတ်မှတ်လိုက်ကြောင်း အကြမ်းဖက်စစ်တပ်က ယနေ့ညပိုင်း သတင်းထုတ်ပြန်သွားသည်။
အကြမ်းဖက် မင်းအောင်လှိုင်က ယနေ့ ကဆုန်လပြည့်နေ့ အထိမ်းအမှတ်အဖြစ် နေပြည်တော်အကျဉ်းထောင်တွင် ပြစ်ဒဏ်ကျခံလျက်ရှိသည့် ဒေါ်အောင်ဆန်းစုကြည်ကို ရာဇဝတ်ကျင့်ထုံးဥပဒေပုဒ်မ ၅၄၁၊ ပုဒ်မခွဲ(၁)အရ ၎င်းကျခံရန်ကျန်ရှိသည့် ပြစ်ဒဏ်များကို သတ်မှတ်ထားသည့်နေအိမ်၌ ဆက်လက်ကျခံစေရန် ပြောင်းလဲသတ်မှတ်ပေးလိုက်ကြောင်း ထုတ်ပြန်ကြေညာသွားသည်။
ယင်းသို့ ကြေညာရာတွင် ဒေါ်အောင်ဆန်းစုကြည်၏ ဓာတ်ပုံကို ထုတ်ပြန်ခဲ့သော်လည်း ယင်းဓာတ်ပုံမှာ ယခုပုံလား၊ မည်သည့်အချိန်တွင် ရိုက်ထားသော ဓာတ်ပုံဖြစ်သည်ကို ဖော်ပြထားခြင်းမရှိပေ။
အကြမ်းဖက်စစ်တပ်က ၂၀၂၁ ခုနှစ် ဖေဖော်ဝါရီလ ၁ ရက်နေ့ စစ်အာဏာသိမ်းပြီးနောက် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို မတရားသော ပုဒ်မများဖြင့် ဖမ်းဆီးထောင်ချထားခြင်းဖြစ်သည်။
