ရန်ကုန်၊ မေ ၁၉
အမေရိကန်ပြည်ထောင်စု၊ ဝါရှင်တန်ဒီစီရှိ အိမ်ဖြူတော် (White House) မြက်ခင်းပြင်တွင် သမိုင်းဝင်ကျင်းပမည့် “UFC Freedom 250” ပွဲတွင် မြန်မာနိုင်ငံဖွား အမေရိကန်နိုင်ငံသား UFC ချန်ပီယံ Joshua Van ပါဝင်တက်ရောက်မည်ဖြစ်ကြောင်း UFC က သတင်းထုတ်ပြန်ထားသည်။
အဆိုပါ “UFC Freedom 250” ပြိုင်ပွဲကြီးနှင့်အတူ တွဲဖက်ကျင်းပမည့် ပရိသတ်ပွဲတော် (Fan Fest) တွင် မြန်မာနိုင်ငံသား၊ ချင်းတိုင်းရင်းသား UFC ဝိုင်းဖလိုင်းဝိတ်တန်း ချန်ပီယံ ဂျိုရှုာဗန် (Joshua Van) ပါဝင်တက်ရောက်မည်ဖြစ်ကြောင်း၊ အဆိုပါပွဲကို လာမည့် ဇွန်လ ၁၃ ရက်နှင့် ၁၄ ရက်နေ့များတွင် ပြုလုပ်သွားမည်ဖြစ်ကြောင်း သိရှိရသည်။
UFC ချန်ပီယံ Joshua Van နှင့် ကမ္ဘာ့ထိပ်သီး UFC/WWE ကစားသမားများပါ ပရိသတ်နှင့် ဆုံတွေ့မည့် အဆိုပါ ပွဲတော်တွင် ကမ္ဘာကျော် UFC ကစားသမားကြီးများဖြစ်သည့် ဒပ်စတင် ပွိုင်ရီယာ (Dustin Poirier)၊ ချားလ်စ် အိုလီဗီယာရာ (Charles Oliveira)၊ ကာမာရူး အူစမန် (Kamaru Usman)၊ ဟင်နရီ စီဟူဒို (Henry Cejudo) စသည့် ချန်ပီယံဟောင်းကြီးများနှင့် ထိပ်သီးစိန်ခေါ်သူများစွာ ပါဝင်တက်ရောက်ကာ ပရိသတ်များနှင့် လက်မှတ်ရေးထိုးခြင်း၊ ဓာတ်ပုံတွဲရိုက်ခြင်း (Meet-and-Greet) များ ပြုလုပ်သွားမည်ဖြစ်ကြောင်း သိရှိရသည်။
ယင်းပွဲတော်အတွင်း ပရိသတ်များအနေဖြင့် တိုက်ခိုက်ရေးသမားများနှင့် ဆုံတွေ့ခွင့်ရမည့်အပြင် စကားဝိုင်း ဆွေးနွေးပွဲများ၊ မေးခွန်းနှင့်အဖြေ ကဏ္ဍများ၊ ကစားသမားများ ဝိတ်ချိန်သည့် အခမ်းအနား (Ceremonial Weigh-ins) နှင့် ကမ္ဘာကျော် Zac Brown ၏ ဂီတဖျော်ဖြေပွဲများကိုပါ အခမဲ့ ကြည့်ရှုခွင့် ရရှိကြမည်ဖြစ်သည်။
ဇွန်လ ၁၄ ရက် (တနင်္ဂနွေနေ့) တွင် အိမ်ဖြူတော်မြက်ခင်းပြင်ပေါ်၌ တိုက်ရိုက်ကျင်းပမည့် “UFC Freedom 250” ပြိုင်ပွဲကြီးတွင် လက်ရှိ UFC လိုက်ဝိတ်တန်းချန်ပီယံ အီလီယာ တိုပူရီယာ (Ilia Topuria) နှင့် ယာယီချန်ပီယံ ဂျက်စတင် ဂါသီ (Justin Gaethje) တို့၏ ကမ္ဘာ့ချန်ပီယံလုပွဲကြီး ယှဉ်ပြိုင်သွားမည် ဖြစ်ကြောင်း သိရှိရသည်။
