ဝက်လက်၊ ရှိမ္မကား ဗျူဟာကုန်းမှ စျေးထွက်ဝယ်သည့် စစ်ကြောင်းကို မိုင်းဆွဲတိုက်ခိုက်မှု ၄ ဦးသေဆုံး၊ မုံရွာရှိ စေသူရွာကို ဗုံးလာကျဲသည့် စစ်တပ်၏ တိုက်ခိုက်ရေး ဒရုန်း ၁ စီး ပစ်ချခံရ
ရန်ကုန်၊ မေ ၈
စစ်ကိုင်းတိုင်း၊ ဝက်လက်မြို့နယ်၊ ရှိမ္မကား ဗျူဟာကုန်းမှ စျေးထွက်ဝယ်သည့် စစ်ကြောင်းကို မိုင်းဆွဲ တိုက်ခိုက်မှု စစ်ကောင်စီ တပ်ဖွဲ့ဝင် ၄ ဦးသေဆုံးကြောင်း ကျားသစ်နက် – ပြောက်ကျားအဖွဲ့ထံမှ သိရသည်။
မေလ ၇ ရက်နေ့တွင် ဝက်လက်မြို့နယ်၊ ရှိမ္မကား ဗျူဟာကုန်းမှ ရွာထဲသို့ စျေးဆင်းဝယ်သည့် စစ်သားများကို ကျားသစ်နက် – ပြောက်ကျား တပ်ဖွဲ့က အဝေးထိန်းပါဆယ် မိုင်းဖြင့် ဖောက်ခွဲ တိုက်ခိုက်ခဲ့ပြီး ရဲ ၁ ဦး၊ စစ်သား ၂ ဦးနှင့် ပျူစောထီး ၁ ဦးတို့ နေရာတွင် ပွဲချင်းပြီး သေဆုံးခဲ့ကြောင်း သိရသည်။
ထို့ပြင် စစ်ကိုင်းတိုင်း၊ မုံရွာမြို့နယ်၊ စေသူကျေးရွာကို ဒရုန်း ဖြင့် ဗုံးလာကြဲသည့် အကြမ်းဖက်စစ်တပ် ဒရုန်းတစ်စီးကို ပစ်ချဖျက်ဆီးနိုင်ခဲ့ကြောင်း ပြည်ထောင်စုလွတ် မြောက်ရေးတပ်ဦး (ဗဟို) -ULF မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ မေလ ၇ ရက် ညနေ ၄ နာရီခွဲခန့်က အ နောက် မြောက်တိုင်း စစ်ဌာရချုပ်ရှိရာ အလုံမြို့ ၊ စစ်ပင်ဆိပ်မှ သံပြားကာကား (၃)စီးဖြင့် လွှတ်တင်ခဲ့သော ရုရှားနိုင်ငံထုတ် တိုက်ခိုက်ရေး Drone ဟုယူ ဆရသော ၂ စီးထဲမှ တစ်စီးကို ပစ်ချခဲ့ရာ ချင်းတွင်း မြစ်အတွင်း ပြုကျပျက်စီးသွားခဲ့ကြောင်း သိရသည်။
“တိုက်ပွဲဖြစ်တာ မရှိဘူး၊ စေသူရွာကို အရင်နေ့က တစ်ခါ ဗုံးလာချတယ်၊ အဲဒါကြောင့် ကျနော်တို့ ULF တပ်ပေါင်းစုက စောင့်ကြည့်နေခဲ့တာ၊ တစ်စီးတော့ ပစ်ချနိုင်ခဲ့တယ်၊ နောက်တစ်စီးက ပြန်လှည့်ပြေးသွားတာ၊ ဗုံးသီးလဲ ချမသွားနိုင်ဘူး” ဟု ပြည်ထောင် စုလွတ် မြောက်ရေးတပ်ဦး (ဗဟို) -ULF မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ပျက်ကျသွားသော ဒရုန်းကို ချင်းတွင်းမြစ်အတွက် လိုက်လံရှာဖွေဆယ်ယူရာ Drone ကိုယ်ထည်နှင့် ဗုံးသီးကို ရှာဖွေတွေ့ရှိခြင်း မရှိပဲ Drone ဒေါက် နှစ်ခုသာရှာဖွေတွေ့ရှိခဲ့ကြောင်း သိရသည်။
အဆိုပါ ဒရုန်းများအား ပစ်ချခဲ့သည့် Drone Catcher မှာ ကျောက်မျက်တောင် စခန်းသိမ်းတိုက်ပွဲမှ သိမ်းဆည်းရရှိခဲ့သော ပစ္စည်းဖြစ်ကြောင်းပြည် ထောင်စုလွတ်မြောက်ရေးတပ်ဦး (ဗဟို)ထံမှ သိရသည်။
