ရှားတောမြို့နယ်၊ ထိုင်း-မြန်မာ နယ်စပ်ရှိ စစ်စခန်း ၂ ခုကို စစ်တပ်က စွန့်ခွာ၊ ရှမ်းပြည်နယ်မှ လာသည့် စစ်ကူ စစ်တပ်စစ်ကြောင်းကို တိုက်ခိုက်မှု စစ်သား ၆ ဦးသေဆုံးပြီး လက်နက်ခဲယမ်းအများအပြားသိမ်း ဆည်းရရှိ
ရန်ကုန်၊ ဇူလိုင် ၆
ကရင်နီပြည်နယ်၊ ရှားတောမြို့နယ်၊ ထိုင်း-ကရင်နီနယ်စပ်၊ သံလွင်မြစ်အရှေ့ခြမ်းရှိ နယ်စပ်တပ်စခန်း နှစ်ခုဖြစ်သော ကျား ပါးစပ်လေးနှင့် ပွိုင့် ၂၉၅၇ စခန်းနှစ်ခုကို အကြမ်းဖက်စစ်သားများက စွန့်ခွာသွားပြီး ရှမ်းပြည်နယ်မှ လာသည့် စစ်ကူ စစ်တပ်စစ်ကြောင်းကို ကြားဖြတ်တိုက်ခိုက်ရာ စစ်သား ၆ ဦးသေဆုံးပြီး လက်နက်ခဲယမ်းအများအပြားသိမ်း ဆည်းရရှိ KA အမှတ် ၂ တပ်ရင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဇွန်လ ၂၅ ရက်နေ့က အကြမ်းဖက်စစ်သားများ စွန့်ခွာသွားသည့် တပ်စခန်းနှစ်ကို KA အမှတ် ၂ တပ်ရင်း မှ နယ်မြေရှင်းလင်းရေးလုပ်ဆောင်ခဲ့ရာ ၆၀ မမ ဗုံးသီး ၄၅ လုံး၊ RPG 7 ဗုံးသီး ၂၄ လုံး၊ MG ငါးကြင်းမြီး ကျည် ၄၃၆၉ တောင့်၊ MA ကျည် အတောင့် ၃၄၀ ၊ လက်ပစ်ဗုံး ၄ လုံးနှင့် ၁၄ မိုင်း ၁၀ လုံးကို သိမ်းဆည်း ရရှိခဲ့ကြောင်း၊ အဆိုပါတပ်စခန်းနှစ်ခုသည် ရိက္ခာလမ်းကြောင်းဖြတ်တောက်ပိတ်ဆို့ခံရခြင်း၊ မကြာခဏ ချောင်းမြောင်း တိုက်ခိုက်ခံရခြင်းတို့ကြောင့် စွန့်ခွာသွားခြင်းဖြစ်ကြောင်း သိရသည်။
“အဲဒီစခန်းနှစ်ခုက ထိုင်း- ကရင်နီနယ်စပ်ပေါ်မှာပဲ တည့်တည့်ရှိတာ၊ ကရင်နီ အခေါ်အရတော့ ဆိုတရှားမြို့နယ်ထဲပါတယ်၊မြန်မာပြည်မြေပုံအရဆိုရင်တော့ ရှားတောမြို့နယ်ထဲပါတယ်၊ အဲဒီမှာနေတဲ့ စစ် သားတွေက အောက်ဘက်ရောက်သွားရောက်သွားပြီ၊ ဒေါမယ်ကျိုရွာဟောင်းဆိုတာလည်း ၂၉၅၇ ရဲ့ အရှေ့ ဘက်မှာရှိတယ်၊” ဟု KA တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ထို့အပြင် ဇွန်လ ၂၉ ရက် နေ့ ရှားတောမြို့နယ်၊ ဒေါမယ်ကျိုရွာဟောင်းအနီးသို့ ရှမ်းပြည်နယ်ဘက်မှလာသော စစ်ကူ စစ်တပ် တပ်ရင်း အမှတ် ၅၁၀ တပ်ဖွဲ့ကို KA အမှတ် ၂ တပ်ရင်းမှ ရဲဘော် များက တိုက်ခိုက်ခဲ့ရာ ၁ နာရီခန့် အကြာ တိုက်ပွဲပြင်းထန်ခဲ့ကြောင်း၊ အကြမ်း ဖက်စစ်သား ၆ ဦးသေဆုံးပြီး ဗိုလ်ကြီးအဆင့်ရှိသူအပါအဝင် ၂ ဦး ဒဏ်ရာရရှိခဲ့ကြောင်း၊ အကြမ်းဖက်စစ် တပ်မှ ၁၂၀ မမ အမြောက် ကြီးအများအပြားပစ်ခတ်ကာ ပစ်ကူ ပေးခဲ့သည့်အပြင် လေယာဉ်ဖြင့် ပေါင် ၅၀၀ ဗုံးကျဲချခဲ့ကြောင်း၊ KA ရဲဘော်တစ်ဦးကျဆုံးခဲ့ရကြောင်း သိရ သည်။
ယင်းတိုက်ပွဲအတွင်း အကြမ်းဖက်စစ်တပ်၏ အသုံးအဆောင်ပစ္စည်းများဖြစ်သော 60 mm ၁ လက်နှင့် ကျည် ၁၄ လုံး၊ RPG 7 ကျည် ၇ လုံး၊ 79 ဗုံးသီး ၆၅ လုံး၊ MG(ငါးကြင်းမြီး) ၁ လက်၊ ပြောင်း ၂ ခုနှင့် ကျည် ၇၂၆ တောင့်၊ MA5(9 mm) ၁ လက်၊ MA4 (79) တွဲ ၁ လက်၊ MA3 ၄ လက်၊ MA2 ၁ လက်၊ MA1 ၂ လက်၊ MA ဘောက် ၂၆ ခုနှင့် ကျည် ၃,၇၂၀ တောင့်၊ စွပ်ဗုံး ၂၁ လုံး၊ လက်ပစ်ဗုံး ၈ လုံးနှင့် နင်းမိုင်း ၈ လုံး သိမ်းဆည်းရရှိခဲ့ကြောင်း သိရသည်။
