ရန်ကုန်- မော်လမြိုင် ကားလမ်းတွင် တိုက်ပွဲဖြစ်ပွားပြီး စစ်ကောင်စီတပ်သား ၁ ဦးသေဆုံးကာ ပြည်သူ ၂ ဦး ဒဏ်ရာရ

ရန်ကုန်- မော်လမြိုင် ကားလမ်းတွင် တိုက်ပွဲဖြစ်ပွားပြီး စစ်ကောင်စီတပ်သား ၁ ဦးသေဆုံးကာ ပြည်သူ ၂ ဦး ဒဏ်ရာရ

ရန်ကုန်၊ ဇန်နဝါရီ ၈

မွန်ပြည်နယ် ရန်ကုန် – မော်လမြိုင်အဝေးပြေးလမ်းပိုင်းပေါ်မှာရှိတဲ့ ဘီးလင်း မြို့နယ် အလူးလေးကျေးရွာမှာ ဇန်နဝါရီ ၆ ရက်နေ့က စစ်ကောင်စီတပ်နဲ့ ကရင် အမျိုးသားလွတ်မြောက်ရေး တပ်မတော် KNLA တို့ တိုက်ပွဲဖြစ် ပွားခဲ့တယ်လို့ သိရပါတယ်။

တိုက်ပွဲအတွင်း စစ်ကောင်စီတပ်သား ၁ ဦး သေဆုံးခဲ့ပြီး အနီးဝန်ကျင် ရာဘာ စက်ရုံက အလုပ်သမား ၂ ဦး ဦးခေါင်းနဲ့ လက် မောင်း ကျည်ဆန် ရှပ်ထိဒဏ်ရာ ရရှိခဲ့တယ်လို့ ဒေသခံတွေကပြောပါတယ်။

ဇန်နဝါရီ ၆ ရက်နေ့ နံနက် ၉ နာရီခန့်က တိုက်ပွဲ စတင်ဖြစ်ပွားခဲ့ပြီး ၁၀ နာရီ ဝန်းကျင်မှာ တိုက်ပွဲပြီးဆုံးခဲ့ကာ ရန်ကုန် – မော်လမြိုင် ကားလမ်းပေါ်မှာ အချိန် ၂ နာရီခန့်ယာဉ်ကြောပိတ်ဆို့မှု ဖြစ်ပွားခဲ့တယ်လို့ ဆိုပါတယ်။

“အရှေ့မှာတိုက်ပွဲဖြစ်နေတာ ဘယ်လောက်ကြာပြီးလဲတော့မသိဘူး။ ဒီရောက် တော့ ကားတွေရပ်ထားတာနဲ့ လိုက်ရပ်ထားတာ။ ခုနတုန်းကတော့ သေနတ် သံတွေ ဆက်တိုက်ကြားနေရတာ”လို့ တိုက်ပွဲအတွင်း ကားတန်းပိတ်မိနေသူ ယာဉ်မောင်းတစ်ဦးက ပြောပါတယ်။

စစ်ကောင်စီတပ်က အလူးလေးကျေးရွာအနီးမှာ ကင်းပုန်းဝပ်ဖို့ လာရောက်စဉ် တော်လှန်ရေးပူးပေါင်းတပ်တွေနဲ့ တိုက်ပွဲဖြစ်ပွားခဲ့တာဖြစ်ပြီး စစ်ကောင်စီ တပ်ဘက်က ပြန်လည်ဆုတ်ခွာသွားတယ်လို့ သိရပါတယ်။

ရန်ကုန် – မော်လမြိုင်လမ်းပိုင်းမှာ ကျိုက်ထိုမြို့မှ သထုံမြို့အထိ စစ်ကောင် စီ တပ်နဲ့ တော်လှန်ရေးပူးပေါင်းတပ်တွေ မကြာခဏ တိုက်ပွဲဖြစ်ပွား လေ့ ရှိ တယ်လို့ သိရပါတယ်။

ဓာတ်ပုံ-ဇန်နဝါရီလ ၆ ရက်နေ့ ရန်ကုန် – မော်လမြိုင် အဝေးပြေးလမ်းပိုင်းမှာ တိုက်ပွဲ ဖြစ်ပွားခဲ့တာကြောင့် ၂ နာရီခန့်ယာဉ်ကြောပိတ်ဆို့မှုတွေ ဖြစ်ပေါ်ခဲ့စဉ်။