ရန်ကုန်၊ ဧပြီ ၂၇
မကွေးတိုင်း၊ ထီးလင်းမြို့နယ်တွင် ရွာဦးကျောင်းဆရာတော်၊ ကိုရင်ငယ်နှင့်သက် ကြီးရွယ်အို အပါအဝင် အပြစ်မဲ့ ပြည်သူ ၂၀ ဦးကို ဓားစာခံထိန်းသိမ်းပြီး သတ်မည်ဟု ခြိမ်းခြောက်အကျပ်ကိုင်၍ ပိတ်မိနေသောစစ်တပ်ကို လမ်းဖွင့်ပေးခဲ့ရကြောင်း ထီးလင်း YDF က သတင်းထုတ်ပြန်သည်။
ဧပြီလ ၂၅ ရက်နေ့ နံနက်ပိုင်း ၊ ထီးလင်း အကြည်ဝါးဘင်းကျေးရွာမှ ထွက်လာသော စစ်ကောင်စီတပ်၊ တပ်မ ၁၁ ကို YDF က ခြုံခိုတိုက်ခိုက်ခဲ့ရာ စစ်ကောင်စီတပ်သား ၁ ဦးကို လက်နက်ခဲယမ်းများဖြင့် ဖမ်းဆီး နိုင်ခဲ့ကြောင်း၊ ထို့နောက်ရွာတွင်းရှိ ရွာဦးကျောင်းဆရာတော်၊ကိုရင်ငယ်များနှင့်သက်ကြီးရွယ်အိုများအပါအဝင် အပြစ်မဲ့ပြည်သူ(၂၀)ဦးခန့်ကို ဓားစာခံအဖြစ်ထိန်းသိမ်းကာ လူနှင့်လက်နက်ပြန်မပေးပါက ဓားစာခံများအားလုံးကိုသတ်ပြီးတစ်ရွာလုံးမီးရှိူ့ပစ်မည်ဟုခြိမ်းခြောက်အကျပ်ကိုင်လာကြောင်း သိရှိရသည်။
YDF က ပြည်သူ့ကာကွယ်ရေးတပ်ဖွဲ့ဖြစ်သည့်အားလျော်စွာ ပြည်သူ့မျက်နှာကိုသာကြည့်၍ အကြမ်းဖက်စစ်ကောင်စီတပ်နှင့်အဆင့်ဆင့်ဆွေးနွေးခဲ့ရကြောင်း၊ နောက်ဆုံးတွင်သုံ့ပန်းနှင့်လက်နက်ခဲယမ်းများပြန်မပေးတော့ဘဲ ၄င်းတို့ကို ထီးလင်းမြို့သို့ရောက်သည်အထိ YDFက ထပ်မံတိုက်ခိုက်ခြင်းမပြုပါဆိုသည့် ကတိကိုပေးလိုက်ရကြောင်း YDF က သတင်းထုတ်ပြန်သည်။
စစ်ကောင်စီတပ် ပြန်လည်ထွက်ခွာနိုင်ရန် ပြင်ဆင်ထားသမျှအားလုံးကိုဖျက်သိမ်း၍ လမ်းကြောင်းဖွင့်ပေးခဲ့ရကြောင်း၊ အထိနာကြောက်လန့်နေသော စစ်ကောင်စီတပ်သားများသည် ထိုကတိကိုမယုံရဲသေးဘဲ အကြည်ဝါးဘင်းရွာသား ၃ ဦးကို လူသားဒိုင်းကာအဖြစ်ဖမ်းဆီးခေါ်ဆောင်သွားကာ ဧပြီလ ၂၆ ရက် နေ့လည်ပိုင်းတွင် ရွာမှထွက်ခွာသွားကြောင်း၊ ၎င်း စကစ စစ်ကြောင်းမှာ လက်ရှိအချိန်တွင် ဝက်သက်ကျေးရွာအနီး တောအတွင်း တပ်ဖျောက်ထားလျက်ရှိကြောင်း သိရှိရသည်။
ပြည်သူများအနေဖြင့် အကြမ်းဖက်စစ်ကောင်စီတပ်များ၏ယုတ်မာကောက်ကျစ်မှုများကိုသတိပြုလျက် ၄င်းတို့နှင့်ဝေးဝေးရှောင်ရှားပေးကြပါရန်နှင့် စစ်ကြောင်းထိုးလာသည့်ကာလမျိုးတွင် မြို့နယ်ပြည်သူ့အုပ်ချုပ်ရေးအဖွဲ့၊စစ်ဘေးရှောင်ကူညီကယ်ဆယ်ရေးအဖွဲ့တို့၏လမ်းညွှန်ချက်များကိုအတိအကျလိုက်နာကြပါရန် တိုက်တွန်းအပ်ကြောင်း၊ အလားတူကိစ္စရပ်မျိုးထပ်မံဖြစ်ပွားလာခဲ့ပါက YDF က အလျော့ပေးညှိနှိုင်းမှုများလုပ်ဆောင်တော့မည်မဟုတ်ဘဲ အကြမ်းဖက်စစ်ကောင်စီတပ်များအား ပြတ်ပြတ်သားသားတော်လှန်တိုက် ခိုက်သွားမည်ဖြစ်ကြောင်း YDF က ထုတ်ပြန်ထားသည်။
ဓာတ်ပုံ- ရွေ့လျားပျောက်ကျားစစ် ဆင်နွှဲနေသော ပြည်သူ့ကာကွယ်ရေးတပ်မတော် YDF ၏တပ်စိတ်တစ်စိတ်။
