မြိုင်မြို့နယ် အနောက်တောင်ပိုင်းကို စစ်တပ်က လေကြောင်းဖြင့် ဆက်တိုက် ဗုံးကျဲ တိုက်ခိုက်နေ၊ ညောင်လေးပင်ခရိုင်ရှိ ကျေးရွာများကို စစ်တပ်က လက်နက်ကြီးဖြင့် ပစ်ခတ်မှု ပြည်သူ ၅ ဦး ထိခိုက် ဒဏ်ရာရ
ရန်ကုန်၊ ဩဂုတ် ၂၁
မကွေးတိုင်း၊ မြိုင်မြို့နယ် အနောက်တောင်ပိုင်းကို အကြမ်းဖက် စစ်တပ်က လေကြောင်းဖြင့် ဆက်တိုက် ဗုံးကျဲ တိုက်ခိုက်ခဲ့ကြောင်း အညာမြေ တပ်ပေါင်းစု က ပြောဆိုသည်။
ယနေ့ ဩဂုတ်လ ၂၁ ရက်နေ့ မွန်းလွဲ ၃ နာရီ ၅၀ မိနစ်ခန့်တွင် မြိုင်မြို့နယ် အနောက်တောင်ပိုင်းကို အကြမ်းဖက် စစ်တပ်က ဂျက်ဖိုက်တာ၊ Mi-35 ရဟတ်ယာဉ်တို့ဖြင့် ဗုံးကျဲ ပစ်ခတ် တိုက်ခိုက်ခဲ့ကြောင်း သိရသည်။
” မြိုင်နယ်အနောက်တောင်ပိုင်းကို ဂျက်ဖိုက်တာနဲ့ ၅ ကြိမ်ပျံဝဲပြီး ၂ ကြိမ် ပစ်ခတ်ခဲ့တယ်။ ၄ နာရီ ၃၀ မိနစ်မှာလည်း Mi-35 နဲ့ အကြိမ်ကြိမ် ပစ်ခတ်ခဲ့တယ်” ဟု အညာမြေ တပ်ပေါင်းစု က ပြောဆိုသည်။
ထို့ပြင် ပဲခူးတိုင်း၊ ညောင်လေးပင်ခရိုင်ရှိ၊ မူးမြို့နယ်နှင့် လယ်ဒိုမြို့နယ်ရှိ ကျေးရွာများကို အကြမ်းဖက် စစ်တပ်က လက်နက်ကြီးဖြင့် ပစ်ခတ်ခြင်းကြောင့် ပြည်သူ ၅ ဦး ထိခိုက် ဒဏ်ရာရခဲ့ကြောင်း KNU ဗဟိုက ပြောဆိုသည်။
ဩဂုတ်လ ၁၄ ရက်နေ့ ည ၁၀ နာရီ ၃၀ မိနစ်ခန့်တွင် မူးမြို့နယ်အတွင်းရှိ အကြမ်းဖက် စစ်တပ်၏ ခမရ−၄၃၉ တပ်ရင်းက လက်နက်ကြီးဖြင့် ပစ်ခတ်ခြင်းကြောင့် ဘုရားလဟာ ကျေးရွာအတွင်း ကျရောက် ပေါက်ကွဲခဲ့ပြီး ကျေးရွာနေ ပြည်သူ ထက်လင်းဦးနှင့် ခင်ချိုလွင်တို့ ၂ ဦး လက် နက်ကြီးကျည်စထိမှန်ကာ ဒဏ်ရာရရှိခဲ့ကြောင်း သိရသည်။
ဩဂုတ်လ ၁၅ ရက်နေ့ မွန်းလွဲ ၁ နာရီခန့်တွင် အကြမ်းဖက် စစ်တပ်၏ အုတ်ဖျက်တပ်စခန်းမှ စစ်ကောင်စီတပ်သားများက ဒရုန်း ဖြင့် ကြက်တက်ညောင်ပင် ကျေးရွာအတွင်းကို ဗုံးကျဲ တိုက်ခိုက်ခဲ့ရာ ကျေးရွာနေ ပြည်သူ အသက် ၆၀ နှစ် အရွယ် ဦးမြင့်ဌေး နှင့် အသက် ၅၇ နှစ်အရွယ် ဒေါ်ခင်ရီ တို့ ၂ ဦး ထိခိုက်ဒဏ်ရာရရှိခဲ့ကြောင်း သိရှိရသည်။
အလားတူ ယင်းနေ့ မွန်းလွဲ ၂ နာရီ ၃၄ မိနစ်ခန့်တွင် လယ်ဒိုမြို့နယ် အတွင်းရှိ အကြမ်းဖက် စစ်တပ်၏ ခမရ−၃၀၇ တပ်ရင်းက ၁၂၂ မမ လက် နက်ကြီး ၁ လုံး ပစ်ခတ်ခဲ့ရာ တလိုင်းခင်ကျေးရွာအနီး ကျရောက်ပေါက်ကွဲခဲ့ကြောင်း၊ ထို့ပြင် ခလရ−၂၆၄ တပ်ရင်းကလည်း ၁၂၂ မမ နှင့် ၁၂၀ မမ လက်နက်ကြီး ၂ လုံး ပစ်ခတ်ခဲ့ရာ ယောက်သွားကုန်းကျေးရွာ၊ ငဇယ်အင်း နှင့် ကညှင်ကြိုး ကျေး ရွာများအတွင်း ကျရောက် ပေါက်ကွဲခဲ့ကြောင်း သိရသည်။
မွန်းလွဲ ၂ နာရီ ၄၀ မိနစ်ခန့်တွင် အကြမ်းဖက် စစ်တပ်၏ ခမရ−၃၀၇ တပ်ရင်းက ၁၂၂ မမ လက်နက်ကြီး ၁ လုံး ထပ်မံ ပစ်ခတ်ခဲ့ရာ အနန်းဘောင်ကျေးရွာအတွင်း ကျရောက် ပေါက်ကွဲခဲ့ပြီး ကျေးရွာနေ ပြည်သူ အသက် ၅၀ နှစ်အရွယ် ဦးဌေးနိုင် ထိခိုက် ဒဏ်ရာ ရရှိခဲ့ကြောင်း သိရှိရသည်။
ဩဂုတ်လ ၁၆ ရက်နေ့ ည ၉နာရီ ၅၃ မိနစ်ခန့်တွင်လည်း အကြမ်းဖက် စစ်တပ်၏ ခလရ−၂၆၄ တပ်ရင်းက ဒရုန်းဖြင့် ယောက်သွားကုန်းကျေးရွာအတွင်းကို ဗုံးကျဲ တိုက်ခိုက်ခဲ့ကြောင်း သိရသည်။
