သီပေါမြို့ရှိ စစ်တပ်၏ ခလရ ၂၃ တပ်စခန်း၌ တိုက်ပွဲ ဆက်လက် ပြင်းထန်နေ၊ နောင်ချိုရှိ အမြောက်တပ် ၃၅၄ တပ်စခန်းကိုလည်း စစ်တပ်က လေကြောင်းဖြင့် ဗုံး ၅၉ လုံးကျဲချပြီး ဓာတုဗုံးများပါ အသုံးပြု တိုက်ခိုက်
ရန်ကုန်၊ အောက်တိုဘာ ၅
ရှမ်းပြည်နယ်၊ သီပေါမြို့ရှိ အကြမ်းဖက် စစ်တပ်၏ ခလရ ၂၃ တပ်စခန်း၌ တိုက်ပွဲ ဆက်လက် ပြင်းထန်လျက်ရှိကြောင်း TNLA က ပြောဆိုသည်။
ယနေ့ အောက်တိုဘာလ ၅ ရက်နေ့ နံနက် ၅ နာရီခန့်တွင် သီပေါမြို့ရှိ အကြမ်းဖက် စစ်တပ်၏ ခလရ ၂၃ တပ်စခန်း၌ တအာင်းအမျိုးသားလွတ်မြောက်ရေးတပ်မတော် TNLA နှင့် အကြမ်းဖက် စစ်ကောင်စီတပ်တို့ အကြား တိုက်ပွဲ ဖြစ်ပွားခဲ့ခြင်းဖြစ်ကြောင်း သိရသည်။
တိုက်ပွဲဖြစ်ပွားလျက်ရှိသော သီပေါမြို့ရှိ ခလရ ၂၃ တပ်စခန်းနေရာကို အကြမ်းဖက် စစ်ကောင်စီတပ်က Jet Fighter ဖြင့် ၅ ကြိမ် ဗုံး ၈ လုံးနှင့် နောင်ချိုမြို့ရှိ အကြမ်းဖက် စစ်တပ်၏ အမြောက်တပ် ၃၅၄ တပ်စခန်းကို Y-12 ဖြင့် ၇ ကြိမ် ဗုံး ၅၉ လုံးနှင့် အဆိပ်ငွေ့ဗုံးများပါ လာရောက်ကျဲချ တိုက်ခိုက်ခဲ့ကြောင်း သိရှိရသည်။
ထို့ပြင် နောင်ချိုမြို တောင်ခမ်းရွာရှိ အကြမ်းဖက် စစ်တပ်၏ ၉၀၂ တပ်စခန်းကိုလည်း ထောက်ပို့လေယာဉ် Y-8 ဖြင့် ၇ ကြိမ် လက်နက်ခဲယမ်း ၆၀ ထုပ် လာရောက်ကျဲချ ပို့ဆောင်ခဲ့ကြောင်း၊ ရှမ်းပြည်နယ် တောင်ပိုင်း ရပ်စောက်မြို့နယ် ကျောက်ဂူမှ နောင်ချိုမြို့နယ်အတွင်းကို စစ်အင်အားပြန်လည်ဖြည့်တင်းရန် ကြိုးပမ်းနေသည့် အကြမ်းဖက် စစ်ကောင်စီတပ်က ထိုးစစ်ဆင်လာ၍ နှစ်ဖက် ထိတွေ့ တိုက်ပွဲများ ဖြစ်ပွားခဲ့ခြင်းဖြစ်ကြောင်း သိရသည်။
