လားရှိုးမြို့ကို ယနေ့ မွန်းလွဲပိုင်း စစ်ကောင်စီက လေယာဉ်ဖြင့် ဗုံးကျဲပြန်၊ သီပေါ၊ လွယ်ကျိုင်ရွာကို လေကြောင်းဖြင့် ဗုံးကျဲမှု ပြည်သူတချို့ ဒဏ် ရာရ

လားရှိုးမြို့ကို ယနေ့ မွန်းလွဲပိုင်း စစ်ကောင်စီက လေယာဉ်ဖြင့် ဗုံးကျဲပြန်၊ သီပေါ၊ လွယ်ကျိုင်ရွာကို လေကြောင်းဖြင့် ဗုံးကျဲမှု ပြည်သူတချို့ ဒဏ် ရာရ

ရန်ကုန်၊ အောက်တိုဘာ ၆

ရှမ်းပြည်နယ်မြောက်ပိုင်း၊ လားရှိုးမြို့ကို ယနေ့ မွန်းလွဲပိုင်း စစ်ကောင်စီက လေယာဉ်ဖြင့် ဗုံးကျဲချခဲ့ကြောင်း MNDAA သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

ယနေ့ အောက်တိုဘာလ ၆ ရက်နေ့ မွန်းလွဲ ၁ နာရီ ၃၆ မိနစ်အချိန် လားရှိုးမြို့နယ်၊ ရပ်ကွက် ၅ ၊ မန်အိုင်ကို စစ်ကောင်စီက လေယာဉ်များဖြင့် ဗုံးကျဲချခြင်းဖြစ်ပြီး ထိခိုက်ပျက်စီး ဆုံးရှုံးမှု အခြေအနေကို မသိရှိရသေးကြောင်း MNDAA သတင်းရင်းမြစ်က ရှင်းပြသည်။

“အပျက်အစီးအထိအခိုက် အခြေအနေ အသေးစိတ်မသိရသေးပါဘူး။ သိရရင် ပြောပါ့မယ်” ဟု MNDAA သတင်းရင်းမြစ်က ဆက်လက်ရှင်းပြသည်။

ထို့ပြင် စက်တင်ဘာလ ၅ ရက်နေ့ ည ၁၀ နာရီ ၃၀ မိနစ်အချိန် စစ်ကောင်စီက သီပေါမြို့နယ် လွယ်ကျိုင်ကျေးရွာကိုလည်း လေကြောင်းတိုက်ခိုက်မှု လုပ်ဆောင်ခဲ့ရာ ကလေးငယ် ၁ ဦး အပါအဝင် သားအမိ ၂ ဦးထိခိုက်ခဲ့ပြီး အခြားပြည်သူများလည်း ထိခိုက်ခဲ့ကြောင်း၊ နေအိမ်များလည်း ထိခိုက်ပျက်စီးခဲ့ကြောင်း သိရှိရသည်။

အလားတူ ယမန်နေ့ည ၉ နာရီ ၄၅ မိနစ်အချိန် သီပေါမြို့လယ်ခေါင်သို့ စစ်ကောင်စီက လေကြောင်းမှ ဗုံးများ ကျဲချခဲ့သဖြင့် နေအိမ်နှင့် ဆိုင်ခန်းများ မီးလောင်ကျွမ်းမှု ဖြစ်ပွားပြီး လူ ၁ ဦး ပျောက်ဆုံးနေကြောင်း သိရှိရသည်။

ဓာတ်ပုံ- ယမန်နေ့ညပိုင်း လေယာဉ်ဖြင့် ဗုံးကျဲမှုကြောင့် ပျက်စီးနေသော သီပေါမြို့နယ်၊ လွယ်ကျိုင်ကျေးရွာမှ နေအိမ်တချို့။