ရေဦးမြို့နယ်တွင် ကထိန်ပွဲပြုလုပ်ခဲ့သည့် အင်ပထိုးရွာ အနီးကို စစ်တပ်က လေကြောင်းဖြင့် ဗုံးကျဲ တိုက်ခိုက်
ရန်ကုန်၊ အောက်တိုဘာ ၂၀
စစ်ကိုင်းတိုင်း၊ ရေဦးမြို့နယ်တွင် ကထိန်ပွဲပြုလုပ်ခဲ့သည့် အင်ပထိုးရွာ အနီးကို အကြမ်းဖက် စစ်တပ်က လေကြောင်းဖြင့် ဗုံးကျဲ တိုက်ခိုက်ခဲ့ကြောင်း ရေဦးအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော် (အမေ့သား) က ရန်ကုန်ခေတ်သစ် မီဒီယာကို ပြောဆိုသည်။
ယနေ့ အောက်တိုဘာလ ၂၀ ရက်နေ့ ညနေ ၄ နာရီ ၁၄ မိနစ်ခန့်တွင် ပြည်သူများ ကထိန်ပွဲပြုလုပ်ခဲ့သည့် အင်ပထိုးရွာ အနီးကို လေကြောင်းဖြင့် ၂ ကြိမ် ဗုံးကျဲ တိုက်ခိုက်ခဲ့ကြောင်း၊ အဆိုပါ ဗုံးသီး ၂ လုံးသည် အင်ပထိုး-စည်သာမြေ-မဲအိုး ကျေးရွာ ၃ ရွာ အကြားရှိ ချောင်းကူးတံတားအနီးကို ကျရောက် ပေါက်ကွဲခဲ့ခြင်းကြောင့် ပြည်သူများ ထိခိုက်မှုမရှိကြောင်း သိရသည်။
“ရှမ်းတဲကနေတက် လာတဲ့ MiG-29 ဖိုက်တာ ၁ စီးနဲ့ ရေဦးနယ် အနောက်ခြမ်းမှာရှိတဲ့ မနက်ပိုင်းက ကထိန်ပွဲကျင်းပတဲ့ အင်ပထိုးရွာအနီး စည်သာမြေနဲ့ မဲအိုးရွာကြား ချောင်းကူးတံတားအနီးကို ကျသွားတယ်။ ပြည်သူတွေ ထိခိုက်မှုမရှိခဲ့ဘူး။ ချောင်းကူးတံတားအနီးမှာ တစ်လုံးကျတယ် ချောင်းထဲတစ်လုံးကျတယ်” ဟု ရေဦးအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော် (အမေ့သား) က ပြောဆိုသည်။
သီတင်းကျွတ်၊ တန်ဆောင်မုန်း ကာလအတွင်း ပြည်သူများအနေဖြင့် လူစုလူဝေးဖြစ်စေသော ပွဲတော်များ ကျင်းပပြုလုပ်ခြင်း၊ ကထိန်ခင်းခြင်း၊ ခြင်းခတ်ပွဲများ ပြုလုပ်ခြင်းကို အထူးသတိပြု ရှောင်ရှားကြရန် ရေဦးအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော် (အမေ့သား) က ထပ်မံ ပြောဆိုသည်။
