Update News- မိထ္တီလာရှိ ရှမ်းတဲလေတပ်စခန်း အပြင် လေကြောင်းရန်ကာကွယ်ရေးတပ်၊ တပ်မ ၉၉ ၊ ကပစတပ်များပါ ရှော့တိုက်ဒုံးဖြင့် ပစ်ခတ်ခံရ
မန္တလေးတိုင်း၊ မိတ္တီလာမြို့နယ်ရှိ ရှမ်းတဲလေတပ်စခန်းအပြင် လေကြောင်းရန်ကာကွယ်ရေးတပ်၊ တပ်မ ၉၉ ၊ ကပစတပ်များပါ ယနေ့ နံနက်ပိုင်းရှော့တိုက်ဒုံးများဖြင့် ပစ်ခတ်ခံရကြောင်း မိတ္တီလာအခြေစိုက် သတင်းရင်းမြစ်များက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၁၁ ရက်နေ့ ၄ နာရီ ၄၅ မိနစ်ဝန်းကျင်အချိန် ရှမ်းတဲလေတပ်သို့ ရှော့တိုက်ဒုံး ၁၃ လုံးဖြင့် ပစ်ခတ်မှုဖြစ်ပွားပြီးနောက် အခြားသော တပ်ရင်းစခန်းများဖြစ်သည့် လေကြောင်းရန်ကာကွယ်ရေးတပ်၊ တပ်မ ၉၉ ၊ ကပစတပ်များပါ ရှော့တိုက်ဒုံးများဖြင့် ပစ်ခတ်ခံရကြောင်း သိရှိရသည်။
“ရှမ်းတဲလေတပ်အပြင် လေကြောင်းရန်ကာကွယ်ရေးတပ်၊ တပ်မ ၉၉ ၊ ကပစတပ်တွေလည်း အပစ်ခံရတယ်လို့ သိရတယ်။ ရှမ်းတဲလေတပ်ထဲကိုတော့ ရှော့တိုက်ဒုံးတွေ ကျရောက်ပေါက်ကွဲတာ အတည်ပြုလို့ရတယ်။ ထိခိုက်မှုဘယ်လောက်ရှိလဲ မသိရသေးဘူး” ဟု မိတ္တီလာဒေသသတင်းရင်းမြစ်က ဆိုသည်။
လတ်တလော မိထ္တီလာတွင် စစ်ကောင်စီတပ်က လုံခြုံရေးတိုးမြှင့်ထားပြီး မိတ္တီလာမြို့နယ် ပတ်ဝန်းကျင်မှ ကျေးရွာများမှာ စစ်ကောင်စီ၏ စစ်ကြောင်းထိုး စီးနင်းခံရမည်ကို ဒေသပြည်သူများက စိုးရိမ်နေကြကြောင်း ယင်းဒေသမှ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
“ပစ်သွားတာကတော့ မြို့ပြင်တွေကနေ ပစ်သွားတာလို့ ယူဆနေကြတယ်။ မြို့ပြင်ဘက်က ရွာတွေကို ရမယ်ရှာ စစ်ကြောင်းထိုးလာမှာ ကြောက်နေရတယ်” ဟု မိတ္တီလာမြို့နယ်မှ ဒေသပြည်သူတစ်ဦးက ရှင်းလင်းပြောဆိုသည်။
ဓာတ်ပုံ- ၂၀၂၁ ခုနှစ်၊ စစ်တပ်အာဏာသိမ်းပြီးနောက် မိတ္တီလာတွင် အကြမ်းဖက်စစ်ကောင်စီတပ်များ ကင်းလှည့်နေစဉ်။ (ပုံအဟောင်းဖြစ်ပါသည်။)
![Pinterest](https://pinterest.com/pin/create/button/?url=https://yktnews.com/2024/11/191498/&media=https://yktnews.com/wp-content/uploads/2024/11/466376228_924224649805142_1061581601005074742_n.jpg&description="ရှမ်းတဲလေတပ်အပြင် လေကြောင်းရန်ကာကွယ်ရေးတပ်၊ တပ်မ ၉၉ ၊ ကပစတပ်တွေလည်း အပစ်ခံရတယ်လို့ သိရတယ်။ ရှမ်းတဲလေတပ်ထဲကိုတော့){kind=link}