ထီးလင်းမြို့မ ရဲစခန်း၊ ရုပ်သံကုန်းနှင့် ကင်းပုန်း ဝပ်နေသော စစ်သားများကို တိုက်ခိုက် ထီးလင်းမြို့ထိန်းချုပ်နိုင်ရေး တော်လှန်ရေး တပ်ဖွဲ့များ ကြိုးစားနေ
မကွေးတိုင်း၊ ထီးလင်းမြို့ပေါ်ရှိ မြို့မရဲစခန်း၊ ရုပ်သံကုန်းနှင့် ကင်းပုန်း ဝပ်နေသော စစ်သားများကို တိုက်ခိုက်ခဲ့ပြီး ထီးလင်းမြို့ထိန်းချုပ်နိုင်ရေး ကြိုးစားနေကြောင်း ဗျူဟာ အမှတ် ၈၁ – ယောဗျူဟာမှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဇန်နဝါရီလ ၂၀ ရက်နေ့ မွန်းလွဲ ၁ နာရီ ၃၀ မိနစ်ခန့်တွင် ထီးလင်းမြို့ပေါ်ရှိ အကြမ်းဖက် စစ်ကောင်စီ တပ်သားများ တပ်စွဲထားသော မြို့မရဲစခန်းနှင့် ရုပ်သံကုန်းတို့ကို ပြည်သူ့ကာကွယ်ရေးတပ်ဖွဲ့များက ဒရုန်းဖြင့် ဗုံးသီး ၁၀ လုံး ကျဲချတိုက်ခိုက်ခဲ့ကြောင်း သိရသည်။
ထို့ပြင် ထီးလင်းမြို့အောင်တော်မူ ဘုရားဘက်၌ ကင်းပုန်းဝပ်ရန် ထွက်လာသော အကြမ်းဖက် စစ်ကောင်စီတပ်သားများကိုလည်း ပြည်သူ့ကာကွယ်ရေးတပ်ဖွဲ့ဝင်များက ပစ်ခတ် တိုက်ခိုက်ခဲ့ရာ အပြန် အလှန် ပစ်ခတ်တိုက်ပွဲ မိနစ် ၃၀ ခန့် ကြာမြင့်ခဲ့ကြောင်း သိရသည်။
“အထိအခိုက် အကျဆုံးကတော့ မသိရသေဘူး။ ဒရုန်းနဲ့ ဗုံးသီး ၁၀ လုံးကျဲချခဲ့တာပါ၊ ကိုယ့်ဘက် တော့ကတော့ အထိအခိုက်မရှိပါဘူး” ဟု ဗျူဟာ အမှတ် ၈၁ – ယောဗျူဟာမှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ထိုသို့ တိုက်ပွဲဖြစ်ပွားနေစဥ်အတွင်း အကြမ်းဖက်စစ်တပ်က ထီးလင်းမြို့ဘောလုံးကွင်းထဲသို့ ရဟတ် ယာဉ်ဖြင့် ဆင်းသက်ကာ လူနှင့် လက်နက်ခဲယမ်းများ ဖြည့်တင်းခဲ့ကြောင်း သိရသည်။
ဗျူဟာ ၈၁ – ယောဗျူဟာအနေဖြင့် ဂန့်ဂေါခရိုင်အမှတ် ၂ တပ်ရင်း၊ အမှတ် ၄ တပ်ရင်း ၊ အမှတ် ၁၀ တပ်ရင်းများနှင့်အတူ ထီးလင်းမြို့ကို ထိန်းချုပ်နိုင်ရေးအတွက် ကြိုးစားဆောင်ရွက်လျက်ရှိကြောင်း အသိပေးထားသည်။
