ထိုင်း-မြန်မာနယ်စပ်ရှိ စစ်ကောင်စီတပ်၏ ပူးလူးတူ စခန်းကို KNLA ဦးဆောင်သော တော်လှန်ရေးတပ်များက သိမ်းပိုက်ပြီးနောက် ထိုင်းရောက် မြန်မာစစ်ဘေးရှောင်ဒုက္ခသည် ၄၃၇ ဦး အိမ်ပြန်ပြီ
ရန်ကုန်၊မတ် ၁၆
ထိုင်း-မြန်မာနယ်စပ်ရှိ စစ်ကောင်စီတပ်၏ ပူးလူးတူ စခန်းကို KNLA ဦးဆောင်သော တော်လှန်ရေးတပ်များက သိမ်း ပိုက်ပြီးနောက် ထိုင်းရောက် မြန်မာစစ်ဘေးရှောင်ဒုက္ခသည် ၄၃၇ ဦး အိမ်ပြန်ကြပြီဖြစ်ကြောင်း ထိုင်း-မြန် မာ နယ်စပ်၊ စစ်ဘေးရှောင်ကူညီရေးသတင်းရင်းမြစ်နှင့် ထိုင်းစစ်တပ်သတင်းရင်းမြစ်များ၏ ဖော်ပြချက်အရ သိရှိရသည်။
ဖေဖော်ဝါရီ ၂၆ ရက် ညနေပိုင်းမှစတင်၍ KNLA ဦးဆောင်သော ပူးပေါင်းတပ်များက စစ်ကောင်စီ၏ ပူးလူးတူစစ်စခန်းကို ဒရုန်းများဖြင့် စတင်ဗုံးကျဲတိုက် ခိုက်ခဲ့ပြီးနောက် တိုက်ပွဲများစတင်ဖြစ်ပွားကြောင်း၊ ယင်းနောက် စစ်ဘေးရှောင် ပြည်သူ ၅၀၀ နီးပါး ထိုင်းဘက်ခြမ်းသို့ တိမ်းရှောင်ခဲ့ကြကြောင်း၊ မတ်လ ၁၄ ရက်နေ့တွင် အဆိုပါ ခလရ ၃၁ ပွိုင့် ၁၂၄၈ ပူးလူးတူ အခြေစိုက် ခြေကုပ် စခန်းကို KNLA ဦးဆောင်သော တော်လှန်ရေးတပ်များက တိုက်ခိုက်သိမ်းပိုက်နိုင်ခဲ့ကြောင်း၊ အဆိုပါ စခန်းသိမ်းတိုက်ပွဲတွင် စစ်ကောင်စီတပ်သား ၁၂ ဦး သေဆုံးပြီး ၁၁ ဦး ထိုင်းဘက်သို့ ထွက်ပြေး လွတ်မြောက်ခဲ့ကြောင်း သိရှိရသည်။
“ထိုင်းဘက်ကနေ အကုန် ပြန်ကြပြီ။ တပ်မဟာ ၇ ဘက်ကလည်း စစ်ဘေးရှောင် တွေကို ပြန်လည် ကူညီပေးနေတယ်”ဟု KNU တပ်မဟာ ၇ မှ စစ်ဘေးရှောင်များကို ကူညီနေသည့် သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ထိုင်းစစ်တပ်ဘက်က ထုတ်ပြန်ချက်တွင်လည်း ထိုင်းဘက်သို့ ထွက်ပြေးလာသော မြန်မာစစ်ဘေးဒုက္ခသည် ၄၃၇ ဦးကို မြန်မာဘက်အခြမ်းသို့ ပြန်လည် ပို့ ဆောင်ပေးလိုက်ပြီဖြစ်ကြောင်း ဖော်ပြထားသည်။
“လေကြောင်းတိုက်ခိုက်မှုတွေ သတိထားဖို့ပဲရှိပါတယ်။ မြေပြင်အခြေအနေကတော့ စိုးမိုးထားနိုင်ပြီ” ဟု KNLA သတင်းရင်းမြစ်က ပြောဆိုသည်။
