ရန်ကုန်၊ ဇွန် ၂
တနသီာရီတိုင်း ၊ ဘုတ်ပြင်းမြို့နယ်ခြေစိုက် ခမရ ၅၈၅ တွင် မေလ ၂၉ ရက်နေ့ ညပိုင်းက စစ်သားအချင်းချင်း ရန်ဖြစ်စကားများကြရာမှ ပစ်ခတ်မှုဖြစ်ပွားပြီး စစ်သား ၃ ဦး သေဆုံးကြောင်း ဒေသခံများထံမှ သိရှိရသည်။
ခမရ ၅၈၅ တွင် မေလ ၂၉ ရက်နေ့ညပိုင်း စစ်သား ၄ ဦးက ပစ်ခတ်သဖြင့် အခြား စစ်သား ၃ ဦး ပွဲချင်းပြီး သေဆုံးသွားကြောင်း၊ ယင်းနောက် စစ်သား ၄ ဦးက လက်နက် ၁ လက်ဖြင့် ထွက်ပြေးသွားကြကြောင်း၊ အဆိုပါ စစ်သား ၄ ဦးကို စစ်တပ်က တောနင်းရှာဖွေရာ ကရသူရိကျေးရွာအနီးတွင် စစ်သား ၃ ဦးကို စစ်တပ်က သတ်ဖြတ်လိုက်ကြောင်း၊ ကျန်ရှိ စစ်သား ၁ ဦးမှာ လက်နက်ဖြင့် လွတ်မြောက်နေသဖြင့် အပူတပြင်း လိုက်လံရှာဖွေနေကြောင်း ဒေသခံများက ပြောဆိုသည်။
“ခမရ ၅၈၅ တပ်ထဲ စစ်သား ၄ ဦးက ပစ်ခတ်လို့ ၃ ဦးသေသွားတယ်။ အဲ့ဒီစစ်သား ၄ ဦးက သေနက်တစ်လက်နဲ့ထွက်ပြေးကြတယ်။ ကရသူရိရွာနားမှာ ၃ယောက်ကို မိလို့ စစ်တပ်ကပစ်သတ်လိုက်တယ်။ လက်နက်နဲ့ စစ်သား ၁ ဦး လွတ်နေသေးလို့တပ်ကလိုက်ရှာနေကြတယ်” ဟု ဒေသခံတစ်ဦးက ပြောဆိုသည်။
ခမရ(၅၈၅)တပ်သည် ကရင်ပြည်နယ်တွင် ရှေ့တန်းစစ်မျက်နှာ ထိခိုက်ကျဆုံးများနေသောတပ်ဖြစ်ပြီး ဒုတပ်ရင်းမှူးကိုယ်တိုင် KNLA ထံသို့ လက်နက်နှင့်တကွ ဝင်ရောက်ပူးပေါင်းခဲ့သော တပ်ရင်းဖြစ်ကြောင်း၊ တပ်တွင်းအခြေအနေမှာလည်း ရဲဘော်များအကြား စိတ်ဝမ်းကွဲပြားမှုများ ရှိနေကာ ခိုက်ရန်ဖြစ်ပွားမှုများ ဖြစ်ပေါ်လျက်ရှိကြောင်း သိရှိရသည်။
