ရန်ကုန်၊ ဧပြီ ၄
မန္တလေးနှင့် စစ်ကိုင်း အပါအဝင် မြန်မာနိုင်ငံ အလယ်ပိုင်းဒေသများတွင် ငလျင်ကြောင့် သေဆုံးသူ ၃၁၄၅ ဦးရှိလာပြီးနောက် အပျက်အစီးများကြားမှ အလောင်းဖော်ယူမှုများကို အကူအညီပေးရေး အဖွဲ့များက စတင်ရပ်ဆိုင်းလာနေကြောင်း မန္တလေးနှင့် စစ်ကိုင်းဒေသမှ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
မတ်လ ၂၈ ရက်နေ့ မွန်းလွဲပိုင်း ငလျင်လှုပ်ခတ်ပြီးနောက် မတ်လ ၂၉ ရက်နေ့မှ စတင်၍ ကယ်ဆယ်ရေးလုပ်ငန်းများ ဆောင်ရွက်ခဲ့ကြောင်း၊ ဧပြီလ ၁ ရက်နေ့မှစတင်၍ ကယ်ဆယ်ရေးအစား အလောင်းဖော်ယူခြင်းများကို ဦးစားပေး လုပ်ဆောင်လာခဲ့ပြီး ယခု ဧပြီလ ၄ ရက်နေ့ ရောက်ချိန်တွင် အပြိုအပျက်အစီးများကြားမှ အလောင်း ဖော်ယူမှုများကို ကူညီရေးအဖွဲ့များက တဖြည်းဖြည်း ရပ်ဆိုင်းလာနေကြောင်း၊ ယခုအခါ ပြိုကျပျက်စီးနေသော အဆောက်အအုံများကို မူလပိုင်ရှင်များကိုယ်တိုင်က ဖျက်သိမ်းရမည့် အခြေအနေ ရှိလာကြောင်း သိရှိရသည်။
“မီးသတ်နဲ့ နိုင်ငံခြားအဖွဲ့က လာစစ်ဆေးတယ်။ အသက်ရှင်သူမရှိတော့လို့ ကယ်ဆယ်ရေး မလုပ်ဘူးဆိုပြီး နည်းနည်းပါးပါး လာစစ်ပြီး ပြန်သွားတယ်။ နောက် မီးသတ်ကို အပျက်အစီးနဲ့ အလောင်း ရှာဖွေ ဖော်ပေးဖို့ ဆက်သွယ်တော့ သူတို့ အလုပ်များနေလို့ မရှင်းသေးဘူး ပြောတယ်။ အခုကျတော့ ကိုယ့်ဟာကိုယ် ရှင်းရမယ်ပြောတယ်။ ပရဟိတအဖွဲ့တွေတော့ အကူအညီတောင်းထားတယ်။ အဲဒါလည်း အလှည့်မကျသေးဘူး။ အိမ်သား ၂ ဦးနဲ့ ကလေး ၁ ဦး ပြိုကျတဲ့အထဲ ပါသွားတယ်။ အခု ထက်ထိတော့ အလောင်း မဖော်ရသေးဘူး” ဟု စစ်ကိုင်းမြို့ပေါ်မှ ၃ ထပ်တိုက်ပိုင်ရှင်က ရန်ကုန်ခေတ်သစ်သတင်းဌာနထံသို့ ပြောဆိုသည်။
အဆိုပါပိုင်ရှင်က သတင်းဖော်ပြချိန်တွင် နာမည်အသုံးမပြုရန် မေတ္တာရပ်ခံပြီး လက်ရှိ စစ်ကိုင်းမြို့ပေါ်တွင် ပျူစောထီးနှင့် ပြည်သူ့စစ်များကို ကြောက်လန့်နေရ၍ နာမည်သုံးလျှင် သူ့အတွက် အန္တရာယ်ရှိနိုင်ကြောင်း ပြောဆိုသည်။
လတ်တလော စစ်ကောင်စီ၏ ထုတ်ပြန်ချက်အရ ငလျင်ကြောင့် သေဆုံးသူ ၃၁၄၅ ဦး၊ ဒဏ်ရာရရှိသူ ၄၅၈၉ ဦးနှင့် ပျောက်ဆုံး ၂၂၁ ဦးရှိကြောင်း သိရှိရသည်။
ငလျင်ဒဏ်အဆိုးရွားဆုံးခံနေရသော မန္တလေးတွင်လည်း အပျက်အစီးများကြားမှ ကယ်ဆယ်ရေးလုပ်ပေးမှုများ တဖြည်းဖြည်း ရပ်ဆိုင်းလာနေပြီး နေအိမ် အပျက်အစီးနှင့် အပြိုအပျက်များကို အိမ်ရှင်များကိုယ်တိုင် လုပ် ဆောင်ရမည့် အခြေအနေ ဖြစ်ပေါ်လာနေကြောင်း သိရှိရသည်။
“အပျက်အစီးတွေ ရှင်းတာက ကိုယ့်အိမ်ကိုယ်ရှင်းရမယ်ပြောတယ်။ ဘက်ဖိုးငှားဖို့ ဖျက်ပေးမယ့်သူ ငှားဖို့နဲ့ အပျက် အစီးရှင်းဖို့က နေအိမ်တစ်လုံးကို အနည်းဆုံး သိန်း ၅၀ ကနေ သိန်း ၁၀၀ ကျသင့်တော့ မတတ်နိုင်သေးဘူး။ ပရဟိတအဖွဲ့တွေကတော့ သူတို့က ကယ်ဆယ်ရေးနဲ့ အလောင်းများရင်လောက်ပဲ လုပ်ပေးတော့မယ်ပြောတယ်” ဟု မန္တလေးမြို့ ၊ စျေးချိုအနီးမှ နေအိမ်ပျက်စီးခဲ့သူ ဒေသပြည်သူတစ်ဦးက ရှင်းပြသည်။
ဓာတ်ပုံ – ငလျင်ကြောင့် ရမည်းသင်းမြို့နယ်တွင် သေဆုံးသွားခဲ့ရသည့် ပြည်သူများ။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
