မုံရွာ-ပုသိမ် လမ်းပိုင်းတွင် စစ်တပ်၏ ကြေးနီ တွဲကား ယာဉ်တန်းကို မိုင်းဆွဲ တိုက်ခိုက်မှု ကား ၃ စီးပျက်စီးပြီး စစ်ကောင်စီ တပ်သား ၃ ဦးသေဆုံး
စစ်ကိုင်းတိုင်း၊ ယင်းမာပင်မြို့နယ်၊ မုံရွာ-ပုသိမ် လမ်းပိုင်းတွင် အကြမ်းဖက် စစ်တပ်၏ ကြေးနီ တွဲကား ယာဉ်တန်းကို မိုင်းဆွဲ တိုက်ခိုက်ရာ ကား ၃ စီးပျက်စီးပြီး စစ်ကောင်စီ တပ်သား ၃ ဦးသေဆုံးခဲ့ကြောင်း ယင်းမာပင်မြို့နယ် အခြေစိုက် မဲမှောင် ပြည်သူ့ကာကွယ်ရေး တပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလ ၂ ရက်နေ့ ည ၉ နာရီကျော်ခန့်တွင် မုံရွာ-ပုသိမ် လမ်းပိုင်းရှိ ယမားတံတားအနီးတွင် အကြမ်းဖက် စစ်တပ်၏ ကြေးနီတင် တွဲကား ၆ စီးပါ ယာဉ်တန်းကို တော်လှန်ရေး တပ်ဖွဲ့များက မိုင်းဆွဲ တိုက်ခိုက်ခဲ့ခြင်းဖြစ်ကြောင်း သိရသည်။
ယင်းတိုက်ခိုက်မှု အတွင်း အကြမ်းဖက် စစ်တပ်၏ ကြေးနီတင်ကား ၃ စီး ပျက်စီးခဲ့ပြီး စစ်ကောင်စီ တပ်သား ၃ ဦးသေဆုံးခဲ့ကြောင်း၊ တိုက်ခိုက်မှု ဖြစ်ပွားပြီးနောက် အကြမ်းဖက် စစ်ကောင်စီ တပ်သားများက လမ်းဘေးဝဲယာကို ရမ်းသမ်း ပစ်ခတ်မှုများ လုပ်ဆောင်သွားကြောင်း သိရှိရသည်။
“ဝမ်ပေါင် ကုမ္ပဏီကနေ ထွက်လာတဲ့ ကြေးနီတွဲကား ၆ စီးပါ ယာဉ်တန်းကို မုံရွာ-ပုသိမ်လမ်းပိုင်း ယမားတံတားထိပ်နားမှာ မိုင်းဆွဲ တိုက်ခိုက်ခဲ့တာပါ။ ကျနော်တို့ မိုင်းဆွဲ တိုက်ခိုက်မှုကြောင့် ကား ၃ စီး ထိခိုက် ပျက်စီးသွားတယ်။ စစ်ခွေး ၃ ကောင် သေတယ်။ ကျနော်တို့ မိုင်းတွေ ဆက်လက် ထုတ်လုပ်နိုင်ဖို့ အတွက် ခဲယမ်းတွေ လိုအပ်နေပါတယ်။ အဲတာလေးကိုလည်း မိဘပြည်သူတွေ ကူညီပေးကြဖို့ မေတ္တာရပ်ခံချင်ပါတယ်” ဟု ယင်းမာပင်မြို့နယ် အခြေစိုက် မဲမှောင် ပြည်သူ့ကာကွယ်ရေး တပ်ဖွဲ့မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ခိုက်မှုကို ယင်းမာပင်မြို့နယ် အခြေစိုက် မဲမှောင် ပြည်သူ့ကာကွယ်ရေး တပ်ဖွဲ့ နှင့် Brother Defence Force PDF တို့က ပူးပေါင်း လုပ်ဆောင်ခဲ့ခြင်းဖြစ်ကြောင်း သိရသည်။
