မြန်မာပြည်သူများ၏ ၀ိုင်းဝန်းကန့်ကွက်မှုကြောင့် မင်းအောင်လှိုင်နှင့်ဘူတန်ဝန်ကြီးချုပ် တွေ့ဆုံသော ဓာတ်ပုံကို Facebook လူမှုကွန်ရက်မှ ပြန်လည်ဖြုတ်ချ
ထိုင်းနိုင်ငံ ဘန်ကောက်မြို့တွင် ဧပြီလ ၃ ရက်နှင့် ၄ ရက် နှစ်ရက်တာကျင်းပသော ဘင်းမ်စတက် အစည်းအဝေး၌ အာဏာသိမ်း မြန်မာစစ်ခေါင်းဆောင် မင်းအောင်လှိုင်နှင့် ဘူတန်ဝန်ကြီးချုပ် Tshering Tobgay တို့ တွေ့ဆုံခဲ့ကြသည်။
မင်းအောင်လှိုင်နှင့် တွေ့ဆုံခဲ့သည့်အကြောင်း ဘူတန်ဝန်ကြီးချုပ်က ၎င်း၏ လူမှုကွန်ရက် Facebook ပေါ်တွင် ပုံနှင့်တကွ ဧပြီလ ၄ ရက်နေ့က ပို့စ်တင်ခဲ့သည်။
ဘူတန်ဝန်ကြီးချုပ်၏ ပို့စ်ထဲတွင် မင်းအောင်လှိုင်နှင့် တွေ့ဆုံရသည်ကို ဝမ်း မြောက်ကြောင်းနှင့် နှစ်နိုင်ငံ ဆက်ဆံရေးကို တိုးမြှင့်ဆောင်ရွက်မည့် အကြောင်း ရေးသားခဲ့ခြင်းဖြစ်သည်။
ပို့စ်တင်ပြီး နာရီပိုင်းအကြာတွင် ဘူတန်ဝန်ကြီးချုပ် Tshering Tobgay အား ဘူတန်နိုင်ငံသားများအပါအဝင် ထိုင်းနိုင်ငံသားများ၊ မြန်မာနိုင်ငံသားများနှင့် အခြားသော ဒီမိုကရေစီအင်အားစုများက ဝေဖန်ပြောဆိုကြသည်။
၎င်း၏ပို့စ်တွင် မှတ်ချက်ပေး ဝေဖန်သူများရှိသလို အခြားသော အကောင့်အမျိုးမျိုးကလည်း ဘူတန်ဝန်ကြီးချုပ်အား ဝေဖန်မှု လူမှုကွန်ရက်တွင် မြင့်တက်ခဲ့သည်။
ထိုသို့ ဝေဖန်မှုများ မြင့်တက်လာ၍ ဘူတန်ဝန်ကြီးချုပ်၏ လူမှုကွန်ရက်တွင် မင်းအောင်လှိုင်နှင့် တွေ့ဆုံခဲ့သည့်အကြောင်း Facebook လူမှုကွန်ရက် တင်ထားသည့် ပို့စ်ကို ယနေ့ ဧပြီလ ၅ ရက်နေ့ နံနက်ပိုင်းတွင် ပြန်လည် ဖြုတ်ချဖယ်ရှားသွားခဲ့သည်။
မင်းအောင်လှိုင်သည် မြန်မာပြည်၏ ခေါင်းဆောင်မဟုတ်ကြောင်း၊ မြန်ပြည်သူများအပေါ် နေ့စဉ်နှင့်အမျှ သတ် ဖြတ်နေသော အကြမ်းဖက်သမားသာ ဖြစ်သည်ဟု မြန်မာပြည်သူများက ဘူတန်ဝန်ကြီးချုပ်၏ လူမှုကွန်ရက် တွင် မှတ်ချက်ပေး ဝေဖန်ခဲ့ကြခြင်းဖြစ်သည်။
ယခုအခါ မြန်မာပြည်သူများက မင်းအောင်လှိုင်နှင့် တွေ့ဆုံသည့်ဓာတ်ပုံ တင်ထား သော အိန္ဒိယဝန်ကြီးချုပ် မိုဒီ၏ လူမှုကွန်ရက်တွင် သွားရောက်၍ ဝေဖန်မှုများကို အရှိန်အဟုန်ဖြင့် လုပ်ဆောင်နေကြသည်။
ဓာတ်ပုံ- မင်းအောင်လှိုင်နှင့် တွေ့ဆုံသော ဓာတ်ပုံကို တင်ခဲ့သော ဘူတန်ဝန်ကြီးချုပ်၏ လူမှုကွန်ရက်စာမျက်နှာ။
