ရန်ကုန် ၊ ဇွန် ၆
စစ်ကိုင်းတိုင်း၊ ကန့်ဘလူမြို့နယ် နှောကုန်းကျေးရွာကို ယနေ့ ဇွန် ၆ ရက်နေ့ ၁၀ နာရီ ၄၅ မိနစ်ဝန်းကျင်အချိန်ခန့်တွင် အကြမ်းဖက်စစ်ကောင်စီတပ်များ ဝင်ရောက်ကာ မီးရှို့သွား၍ ရွာလုံးကျွတ်နီးပါး အိမ်ခြေ ၂၅၀ ဝန်းကျင်ခန့် မီးလောင်ပြာကျသွားပြီး အိမ်ခြေ ၂၅၀ ကျော်ရှိသော ရှော်ဖြူကုန်းကျေးရွာကို ရွာလုံး ကျွတ် စစ်တပ်က မီးရှို့နေရာ လက်ရှိအချိန်အထိ မီးလောင်ကျွမ်းနေဆဲ ဖြစ် ကြောင်း စစ်ကိုင်းတိုင်း တိုင်းဒေသကြီး လွှတ်တော်ကိုယ်စားလှယ် ကိုနေဇင်လတ်က ရန်ကုန်ခေတ်သစ်သို့ ပြောကြားသည်။
“နှောကုန်းက အိမ်ခြေ ၂၅၀ ကျော် ပြာကျသွားပြီ။ ရှော်ဖြူကုန်းကျေးရွာကလည်း အိမ်ခြေ ၂၅၀ လောက်ရှိတယ်။ မီးအားကောင်းနေပြီး လေလည်း သင့်နေလို့ ရွာလုံးကျွတ်မယ့် အနေအထားရှိပါတယ်။ စစ်ကောင်စီက အင်အား ခန့်မှန်း ၈၀ ခန့်လောက်ရှိတယ်။ ရွာသားတွေ အားလုံးကတော့ မီးရှို့ခံရတဲ့ ရွာတွေရော အနီးအနားက ရွာတွေရော အကုန်ထွက်ပြေးနေရတာ” ဟု ကိုနေဇင်လတ်က ပြောကြားသည်။
ကန့်ဘလူမြို့နယ် ကိုးထောင်ဘို့ကျေးရွာတွင် စစ်တပ်က လွန်ခဲ့သည့် ၂ လ ဝန်းကျင်ခန့်မှာ စတင်ကာ ခြေကုတ်စခန်းယူထားပြီး ယမန်နေ့ ဇွန်လ ၅ ရက်နေ့တွင် ကိုင်းမကျေးရွာကို ဝင်ရောက် မီးရှို့ခဲ့ပြီး အိမ်ခြေ ၁၀ လုံးခန့် လောင်သွားကြောင်း၊ ယနေ့ နံနက် နှောကုန်ကျေးရွာနှင့် ရှော်ဖြူကုန်းကျေးရွာကို ဆက်လက် မီးရှို့ခဲ့ခြင်းဖြစ်ကြောင်း ဒေသခံများထံမှ သိရှိရသည်။
ထို့ပြင် စစ်ကိုင်းတိုင်း၊ ရေဦးမြို့နယ် ကံပေါက်ကျေးရွာကို ဇွန်လ ၆ ရက်နေ့မွန်း လွဲ ၁ နာရီခွဲ အချိန်ခန့် စစ်တပ်က မီးရှို့ခဲ့သဖြင့် ပြည်သူများ ဝင်ရောက် မီးငြှိမ်းသတ်ခဲ့ရပြီး ကံပေါက်ကျေးရွာတွင် အိမ်ခြေ ၆ လုံး ၊ စပါးကျီတစ်လုံး၊ စပါး ၄၀၀ တင်းနှင့် ကား ၄ စီး မီးလောင် ဆုံးရှုံးခဲ့ကြောင်း ဒေသခံများက ပြောကြားသည်။
