စစ်ကိုင်းတိုင်း၊ စစ်ကိုင်းမြို့နယ်၊ တောင်းရင်းရွာအနီးကို အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်မှုအတွင်း အလောင်းများ ထပ်မံတွေ့ရှိရပြီး သေဆုံးသူ ၁၆ ဦးတိုးလာကြောင်း၊ ပြည်သူ ၂၀ ဦးကျော်မှာလည်း ထိခိုက်ဒဏ်ရာရထားကြောင်း ဒေသ တော်လှန်ရေး သတင်းရင်းမြစ်က ရန်ကုန်ခေတ် သစ် သတင်းဌာနထံသို့ ပြောဆိုသည်။
ယမန်နေ့ ဩဂုတ်လ ၁၁ ရက်နေ့ မွန်းလွဲ ၂ နာရီခန့်တွင် စစ်ကိုင်းမြို့နယ်၊ တောင်း ရင်းရွာ အနီး ယာဉ်ရပ်နားသည့် စား သောက်ဆိုင်ကို အကြမ်းဖက် စစ်တပ်၏ တံတားဦးလေတပ် တက်လာသော တိုက်လေယာဉ် ၂ စီး နှင့် မိတ္ထီလာလေတပ်မှ တက်လာသော တိုက်လေယာဉ် ၂ စီးတို့က လေကြောင်းတိုက်ခိုက်မှု အကြိမ် ၂၀ ခန့် ပြုလုပ်ခဲ့ကြောင်း၊ ယမန်နေ့ လေကြောင်းတိုက် ခိုက်မှု ပြီးလျှင်ပြီးချင်း လေကြောင်းတိုက်ခိုက်မှုကြောင့် သေဆုံးသူ အလောင်း ၇ လောင်းတွေ့ရှိခဲ့ရကြောင်း သိရသည်။
ယနေ့တွင်လည်း အဆိုပါ လေကြောင်းတိုက်ခိုက်သည့် နေရာကို တော်လှန်ရေး တပ်ဖွဲ့များက ထပ်မံ နယ်မြေရှင်းလင်းရေး ပြုလုပ်ရာ လေကြောင်းတိုက်ခိုက်မှုကြောင့် သေဆုံးနေသော အလောင်း ၉ လောင်း ထပ်မံ တွေ့ရှိခဲ့ပြီး သေဆုံးသူ ၁၆ ဦးအထိ ရှိလာကြောင်း၊ ထိခိုက်ဒဏ်ရာရရှိသူ ပြည်သူ ၂၀ ဦးကျော်ရှိကြောင်း သိရှိရသည်။
“သေဆုံးတဲ့သူ အများစုက စစ်ကိုင်းနဲ့ မတ္တရာမြို့နယ်တွေကပါ။ ခရီးသွားပြည်သူတွေနဲ့ ကုန်ကား သမားတွေ နားနေတဲ့ စား သောက်ဆိုင်ထဲမှာ ဗုံးကျတာ။ အဲဒီဆိုင် တည့်တည့်ကို ကျဲချသွားတာ။ မနေ့ကတော့ ၇ လောင်းပဲတွေ့ပြီး သဂြိုလ်လိုက်တာပေါ့။ လေယာဉ်တွေက အရမ်းဝဲနေတော့ နယ်မြေရှင်းတာ မနေ့က အကုန်မပြီးလိုက်ဘူး။ ဒီနေ့မှာ ၉ လောင်းထပ်တွေ့တယ်။ စုစုပေါင်း ၁၆ လောင်းရှိသွားပြီ” ဟု ဒေသတွင် တော်လှန်ရေး သတင်းရင်းမြစ်က ပြောဆိုသည်။
ယမန်နေ့ လေကြောင်းတိုက်ခိုက်မှုကြောင့် သေဆုံးသူများအားလုံးမှာ အရပ် သားပြည်သူများသာဖြစ်ပြီး တော်လှန်ရေးရဲဘော်များ ပါဝင်ခြင်းမရှိကြောင်း၊ စစ်တပ်က အရပ်သားပြည်သူများ သွားလာရာ နေရာနှင့် အဆောက်အအုံမှန်းသိလျက်ဖြင့် လေ ကြောင်း တိုက်ခိုက်မှု လုပ်ဆောင်သွားခဲ့ခြင်းဖြစ်ကြောင်း ဒေသတော်လှန်ရေးသတင်းရင်းမြစ်က ပြောဆိုသည်။
ဓာတ်ပုံ- Oo Shine နှင့် CJ ။
