ပဲခူးတိုင်း၊ ညောင်လေးပင်မြို့နယ်၊ ပုစွန်မြောင်ရွာအနီး ထိတွေ့ တိုက်ပွဲ ၂ ကြိမ်ဖြစ်ပွားပြီး အကြမ်းဖက် စစ်တပ်ဘက်မှ အရာရှိ ၁ ဦး အပါအဝင် ၄ ဦးသေဆုံးခဲ့ကြောင်း Fire Dragon တပ်ရင်းမှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဩဂုတ်လ ၁၆ ရက်နေ့ နံနက် ၁၀ နာရီ ၃၅ မိနစ်ခန့်တွင် ညောင်လေးပင်မြို့နယ်၊ ပုစွန်မြောင်းရွာ ဆွဲဒလွဲပိုင်း တနေရာတွင် အကြမ်းဖက် စစ်တပ်နှင့် Fire Dragon တပ်ရင်း၊ တောကျီးကန်းတပ်ရင်း ဒရုန်းအဖွဲ့ တို့ ထိတွေ့တိုက်ပွဲ ဖြစ်ပွားခဲ့ကြောင်း သိရသည်။
ယင်းထိတွေ့ တိုက်ပွဲတွင် အကြမ်းဖက် စစ်တပ်ဘက်မှ အရာရှိ ၁ ဦး နှင့် တပ်သား ၁ ဦး သေဆုံးခဲ့ပြီး ညောင်လေးပင်မြို့ရှိ ခမရ ၂၀ တပ်ရင်းနှင့် ညောင်လေးပင်-မဒေါက် လမ်းပိုင်းပေါ်ရှိ ရေကြည်ချောင်းဂိတ်စခန်းမှ စစ်သားများက လက်နက်ကြီးများဖြင့် ပစ်ကူပေး တိုက်ခိုက်ခဲ့ကြောင်း တော်လှန်ရေး ရဲဘော်များ ပြန်လည် ဆုတ်ခွာခဲ့ရကြောင်း သိရှိရသည်။
အလားတူ ယင်းနေ့ မွန်းလွဲ ၂ နာရီခန့်တွင် ပုစွန်မြောင်းကျေးရွာ အိုးဘိုပိုင်း၌လည်း အကြမ်းဖက် စစ်တပ်နှင့် Frie Dragon တပ်ရင်းမှ ရဲဘော်များ ဒုတိယအကြိမ် တိုက်ပွဲ ထပ်မံ ဖြစ်ပွားခဲ့ပြီး အကြမ်းဖက် စစ်တပ် ၂ ဦး သေဆုံးကာ တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
“စစ်ခွေး သေတာ စုစုပေါင်း ၄ ကောင်သေပါတယ်။ ပုစွန်မြောင်းရွာမှာ စစ်ခွေးတွေက ၄ နေရာအထိုင်ချနေတယ်။ စစ်ခွေး အင်အား ၇၀ နဲ့ ၁၀၀ အကြားရှိတယ် တပ်စွဲထားတာ လူထုကို ဒုက္ခပေးနေတဲ့ အိုးအိမ် ဖျက်ဆီးနေတဲ့ ပစ္စည်းတွေ ခိုးနေအုံးမယ် လူသစ်တွေ စုနေအုံးမယ်ဆိုရင်တော့ စစ်ခွေးတွေကို ဆက်ပြီးတော့ လုပ်နိုင်သလောက် ရတဲ့နည်း တွန်းလှန်နေမှာပဲ” ဟု Fire Dragon တပ်ရင်းမှ တာဝန်ရှိသူ တစ်ဦးက ပြောဆိုသည်။
