ရခိုင်ပြည်၊ ဘူးသီးတောင်မြို့နယ်၊ ထန်းရှောက်ခံကျေးရွာက မွတ်ဆလင် ၆၀၀ ကျော်ကို အာရက္ခတပ်တော် AA က သတ်ဖြတ်ခဲ့ခြင်းမရှိကြောင်း မောင်တောခရိုင် အစ္စလာမ်ဘာသာဝင် အကြီးအကဲများက ယမန်နေ့ ဩဂုတ်လ ၂၃ ရက်နေ့တွင် ထုတ်ပြန်ပြောဆိုထားသည်။
ထန်းရှောက်ခံကျေးရွာမှ လူ ၆၀၀ ကျော်ကို AA က ၂၀၂၄ ခုနှစ် မေလ ၂ ရက်နှင့် ၃ ရက်နေ့တို့တွင် အစုလိုက် အပြုံလိုက် သတ် ဖြတ်ခဲ့သည်ဟု ရိုဟင်ဂျာအဖွဲ့အစည်းများနှင့် ရိုဟင်ဂျာ တက်ကြွလှုပ်ရှားသူများက သက်သေ ဓာတ်ပုံများနှင့်တကွ ထုတ်ပြန် ပြောဆိုထားသည်။
မောင်တောခရိုင် အစ္စလာမ်ဘာသာဝင် အကြီးအကဲများနှင့် လူမှုအသိုင်းအဝိုင်း ခေါင်းဆောင်များမှာ ထန်းရှောက်ခံကျေးရွာအနီးမှ ရုပ်အလောင်းများမှာ စစ်ကောင်စီတပ်ဖွဲ့ဝင်များ၏ ရုပ်အလောင်းများသာဖြစ်ကြောင်း ပြောဆိုထားကြသည်။
ထန်းရှောက်ခံကျေးရွာတွင် ၂၀၂၄ ခုနှစ် မေလ ၂ ရက်နှင့် ၃ ရက်နေ့တို့က စစ်ကောင်စီတပ်နှင့် အာရက္ခတပ်တော် AA တို့ တိုက်ပွဲများ ပြင်းပြင်းထန်ထန်ဖြစ်ပွားခဲ့ကြောင်းနှင့် ယခု ရုပ်အလောင်းများမှာ ယင်းတိုက်ပွဲအတွင်း သေဆုံးသွားသော စစ်ကောင်စီတပ်သားများသာ ဖြစ်သည်ဟု ဆိုသည်။
ယခုရက်ပိုင်းအတွင်း သတင်းထောက်များ သွားရောက်ကြည့်ရှု သတင်းရယူရာတွင် ကြွင်းကျန်အရိုးစုများမှာ စစ်ကောင်စီ စစ်ဝတ်စုံများဖြင့် တွေ့ရှိရပြီး AA က သတ်ဖြတ်သည်ဆိုသော စွပ်စွဲပြောဆိုချက်မှာ မဟုတ်မမှန် ကြောင်း မောင်တောခရိုင် အစ္စလာမ်ဘာသာဝင် အကြီးအကဲများက ပြောဆိုကြသည်။
ထန်းရှောက်ခံကျေးရွာတွင် ၂၀၂၃ ခုနှစ် စစ်ကောင်စီ လဝက ဦးရေစာရင်းအရ လူဦးရေ ၉၃၃ ဦးရှိပြီး လက်ရှိတွင် လူဦးရေ ၇၉၀ ဦးရှိပြီး ကျန်လူဦးရေ ၁၃၈ ဦးမှာ ဘင်္ဂလားဒေ့ရှ်ဘက်သို့ ခိုလှုံသွားကြသည်ဟု သိရသည်။
လူ ၆၀၀ ကျော်ကို အာရက္ခတပ်တော် AA က သတ်ဖြတ်လိုက်သည်ဟု စွပ်စွဲပြောဆိုနေခြင်းမှာ လုံးဝယုတ္တိမရှိကြောင်းအစ္စလာမ်ဘသာဝင်အကြီးအကဲများက ပြောသည်။
ယင်းကဲ့သို့ လုပ်ကြံဖန်တီးသတင်း ဖြန့်ချိခြင်းသည် ဒေသတွင်းအတူနေ ရခိုင်နှင့် အစ္စလာမ်ဘာသာဝင်များကြား သဟဇာတ ဖြစ်ရေး၊ အတူယဉ်တွဲနေထိုင်ရေးကို ထိခိုက်ပျက်ပြားစေရုံမက အမုန်းအာဃာတများ၊ အထင်အမြင်လွဲမှားမှုများနှင့် အချင်းချင်းကြား မယုံကြည်မှုများကိုသာ ဖြစ်ပေါ်စေသည်ဟု ပြောသည်။
နိုင်ငံရေး ရည်ရွယ်ချက်ရှိရှိဖြင့် လူမျိုးနှစ်မျိုးကြား မသင့်မြတ်အောင် ရန်တိုက်ပေးသည့်လုပ်ရပ်များသာ ဖြစ်ကြောင်း မောင်တောခရိုင် အစ္စလာမ်ဘာသာဝင်အကြီးအကဲများက ပြောဆိုကြသည်။
ထန်းရှောက်ခံကျေးရွာတိုက်ပွဲအတွင်း အဓိက တာဝန်ရှိသူတစ်ဦးဖြစ်သည့် စစ်ကောင်စီ၏ ဘူးသီးတောင်အခြေစိုက် စကခ ၁၅ မှ ဒုစကခမှူး ဗိုလ်မှူးကြီး ကောင်းမြတ်ကလည်း မွတ်ဆလင်ပြည်သူ ၆၀၀ ကျော်ကို အာရက္ခတပ်တော် AA က သတ်ဖြတ်ခြင်းမရှိကြောင်း သတင်းမီဒီယာများသို့ ထုတ်ဖော်ပြောဆိုထားသည်။
စကခ ၁၅ မှ ဒုစကခမှူး ဗိုလ်မှူးကြီး ကောင်းမြတ်မှာ ထန်းရှောက်ခံတိုက်ပွဲအတွင်း အာရက္ခတပ်တော် AA ထံ ဖမ်းဆီးခံလိုက်ရပြီး ၎င်းတို့တပ်စွဲချိန်က အဆိုပါကျေးရွာတွင် ရွာသားများ တစ်ဦးတစ်ယောက်မရှိတော့ကြောင်း ပြောသည်။
ထန်းရှောက်ခံကျေးရွာအနီးတွင် ယခုတွေ့ရှိရသော ကြွင်းကျန်အရိုးစုများမှာ တိုက်ပွဲအတွင်း သေဆုံးသွားသော စစ်ကောင်စီတပ်ဖွဲ့ဝင်များဖြစ်ကြောင်းနှင့် ဒေသခံပြည်သူများ မဟုတ်ကြောင်း စစ်သုံ့ပန်း ဗိုလ်မှူးကြီး ကောင်း မြတ်က အခိုင်အမာ အတည်ပြု ပြောကြားထားသည်။
အကြမ်းစစ်တပ်ကလည်း ထန်းရှောက်ခံရွာမှ လူ ၆၀၀ ကျော်ကို AA က သတ်ဖြတ်ခြင်းဖြင့် လူမျိုးတုန်းသတ် ဖြတ်မှုကျူးလွန်နေကြောင်း အကြမ်းဖက်စစ်တပ်၏ ပြောရေးဆိုခွင့်ရှိသူ ဇော်မင်းထွန်းက မကြာမီရက်ပိုင်းအတွင်း ထုတ်ပြန်ပြောဆိုထားသည်။
အာရက္ခတပ်တော် AA ပြောခွင့်ရ ဦးခိုင်သုခကလည်း ထန်းရှောက်ခံကျေးရွာက အရိုးစုများမှာ စစ်ကောင်စီတပ်သားများဖြစ်ကြောင်းနှင့် ဒေသပြည်သူများကို သတ်ဖြတ်ခြင်းမရှိကြောင်း ဩဂုတ်လ ၁၁ ရက်နေ့ သတင်းစာရှင်းလင်းပွဲတွင် ထုတ်ဖော်ပြောဆိုထားသည်။
(ဓာတ်ပုံ – ONN ဗီဒီယိုမှ Screen Shot ယူထားခြင်းဖြစ်သည်)
