ပဲခူးတိုင်း၊ ကျောက်တံခါးမြို့နယ်၊ ဇရပ်ခင်ရွာသစ်ရွာရှိ နာရေးအိမ်ကို အကြမ်းဖက် စစ်တပ် ပစ်ခတ်သော လက်နက်ကြီးကျရောက် ပေါက်ကွဲ၍ ပြည်သူ ၂ ဦးသေဆုံးခဲ့ကြောင်း ကျောက်တံခါးမြို့နယ် ပြည်သူ့ကာကွယ်ရေး တပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဩဂုတ်လ ၂၉ ရက်နေ့ ည ၇ နာရီ ၃၀ မိနစ်ခန့်တွင် ကျောက်တံခါးမြို့နယ်၊ ပဲနွယ်ကုန်းမြို့ရှိ ၃၀၇ တပ်ရင်းမှ စစ်သားများက တိုက်ပွဲဖြစ်ပွားခြင်းမရှိ ၁၂၀ မမ လက်နက်ကြီးများဖြင့် ရမ်းသမ်း ပစ်ခတ်ခဲ့ရာ ဇရပ်ခင်ရွာသစ်ရွာရှိ နာရေးအိမ်ကို လက်နက်ကြီးကျည် ကျရောက် ပေါက်ကွဲခဲ့ကြောင်း သိရသည်။
ထိုသို့ လက်နက်ကြီးကျရောက် ပေါက်ကွဲခြင်းကြောင့် ကျေးရွာနေ ပြည်သူ အသက် ၄၉ နှစ်အရွယ် ဦးဖိုးကျော်နှင့် အသက် ၄၄ နှစ်အရွယ် ဒေါ်ကြည်ကြည် တို့ ပွဲချင်းပြီး သေဆုံးပြီး ပြည်သူ ၄ ဦးလည်း ထိခိုက်ဒဏ်ရာရရှိခဲ့ကြောင်း သိရှိရသည်။
“လက်နက်ရှိသူချင်း တိုက်ခိုက်မယ်။ အဝေးကနေ ပြည်သူရွာတွေထဲ လက်နက်ကြီးနဲ့ လှမ်းထုမနေနဲ့ ပြည်သူတွေ ထိခိုက်ဒဏ်ရာရ သေဆုံးနေရတာကို သိသိကြီးနဲ့ လုပ်နေတာ အခု ကိစ္စကလည်း ဒလန်သတင်းပို့လို့ ဆွမ်းကျွေးလုပ်နေတဲ့အိမ်ကို တည့်တည့်ကျတာ။ သေဆုံးသူ ကိုဖိုးကျော်က သူ့သား ဘန်ကောက်မှာဆုံးသွားလို့ စိတ်မကောင်းဖြစ်နေရတဲ့အထဲ စကစ လုပ်လို့ အဖေဖြစ်သူပါ သားနောက်လိုက်သွားခဲ့ရပြီ ပြည်သူကို မျက်နှာမမူတဲ့ စခ တွေ မြို့ပြင်သာ ထွက်လာခဲ့လို့ပြောချင်ပါတယ်” ဟု ကျောက်တံခါးမြို့နယ် ပြည်သူ့ကာကွယ်ရေး တပ်ဖွဲ့မှ တာဝန်ရှိသူက ပြောဆိုသည်။
အကြမ်းဖက် စစ်တပ် ပစ်ခတ်သော လက်နက်ကြီး ထိမှန်၍ သေဆုံးသွားသော ဦးဖိုးကျော်နှင့် ဒေါ်ကြည်ကြည်၏ ရုပ်အလောင်းကို ယနေ့ ဩဂုတ်လ ၃၀ ရက်နေ့ မွန်းလွဲ ၁၂ နာရီခန့်တွင် ငမော့တော့သုသာန်သို့ ပို့ဆောင်သဂြိုလ် လိုက်ကြောင်း သိရသည်။
