၀ိုင်းမော်၊ လမြန်ကျေးရွာအနီးရှိ စစ်တပ်တပ်စွဲထားရာ​ ယာယီစခန်းနှင့်နေရာတချို့ကို KIA ပူးပေါင်းတပ်များက သိမ်းပိုက်၊ စစ်တပ်ဘက်မှ သေဆုံးမှုများနှင့်အရှင်ဖမ်းဆီးရရှိမှုများရှိပြီး လက်နက်ခဲယမ်းများလည်း သိမ်းဆည်းရရှိ

ရန်ကုန်၊ ဩဂုတ် ၃၀

ကချင်ပြည်နယ်၊ ၀ိုင်းမော်မြို့နယ်၊ လမြန်ကျေးရွာအနီးရှိ စစ်တပ်တပ်စွဲထားရာ​ ယာယီစခန်းနှင့်နေရာတချို့ကို KIA ပူးပေါင်းတပ်များက တိုက်ခိုက်သိမ်းပိုက်လိုက်ကြောင်း ကချင်စစ်ရေးသတင်းရင်းမြစ်က ပြောဆိုသည်။

ဩဂုတ်လ ၂၇ ရက်နေ့တွင် ၀ိုင်းမော်မြို့နယ်၊ လမြန်ကျေးရွာအနီးရှိ စစ်တပ်နှင့်လက် အောက်ခံ ပြည်သူ့စစ်များ တပ်စွဲထားသော ခရစ်ယာန်ဘုရားရှိခိုးကျောင်းကိုလည်းကောင်း ၊ ဩဂုတ်လ ၂၉ ရက်နေ့တွင် လမြန်ကျေးရွာအနီးရှိ စစ်တပ်တပ်စွဲထားရာ လမ်းဆုံနေရာကိုလည်းကောင်း အသီးသီးတိုက်ခိုက်သိမ်းပိုက်ရရှိခဲ့ကြောင်း သိရှိရသည်။

“စစ်တပ်ဘက်က ထိုးစစ်ဆင်လာတာပါ။ အဲဒါကို ခုခံပြန်တိုက်ရင်း သူတို့ တပ်စွဲထားတဲ့ ယာယီစခန်းနေရာတွေကို ပြန်တိုက်တာ ။ အခုထက်ထိလည်း စစ်ရေးတင်းမာနေတုန်းပဲ။ ပွဲမပြီးသေးဘူး။ လေကြောင်းတိုက်ခိုက်မှုတွေ ဒရုန်းနဲ့ ကင်းထောက်တာတွေက တစ်ချိန်လုံးရှိနေတယ်” ဟု ကချင်စစ်ရေးသတင်းရင်းမြစ်က ပြောဆိုသည်။

၀ိုင်းမော်မြို့နယ်၊ စစ်တပ်တပ်စွဲနေရာတချို့ကို KIA ပြန်လည်သိမ်းပိုက်ရာတွင် စစ်တပ်ဘက်မှ သေဆုံးသော အလောင်းများ၊ အရှင်ဖမ်းဆီးရရှိသူများရှိသည့်အပြင် လက်နက်ခဲယမ်းများလည်း ရရှိကြောင်း သိရှိရသည်။

“စစ်သားတွေ သေတာရော၊ အရှင်ဖမ်းမိတာရောရှိတယ်။ အရေအတွက် အတိအကျကတော့ သေတာ စစ်သား ၁၀ ဦးအထက်ရှိတယ်လို့ပဲ အကြမ်းဖျဉ်းသိရတယ်။ လက်နက်တွေလည်း ရတယ်။ လေယာဉ်ရန်တော့ စိုးရိမ်နေရတယ်” ဟု ကချင်စစ်ရေးသတင်းရင်းမြစ်က ပြောဆိုသည်။

အကြမ်းဖက်စစ်တပ်က ၀ိုင်းမော်မြို့နယ်အတွင်းရှိ စစ်တပ်က လက်လွှတ်ဆုံးရှုံးထားရသော နေရာများ ပြန်လည်ရရှိရေး မြေပြင်တွင် စစ်ကြောင်းများထိုးခြင်း၊ လက်နက်ကြီး ပစ်ခတ်ခြင်း၊ ဒရုန်းဖြင့် ဗုံးကျဲခြင်း၊ လေယာဉ်ဖြင့် ပစ်ခတ်တိုက်ခိုက်ခြင်းများ တောက် လျှောက်ဆိုသလို လုပ်ဆောင်နေကြောင်း သိရှိရသည်။

စစ်တပ်က ၀ိုင်းမော်မြို့နယ်အတွင်း နယ်မြေစိုးမိုးမှုပြန်လည် ရရှိရေးဆောင်ရွက်လာမှုနှင့်အတူ ဖားကန့်သို့ စစ်ကြောင်းများ စေလွှတ်ခြင်း၊ စစ်ကြောင်းများ ထိုးခြင်းများကိုလည်း တောက်လျှောက်ဆိုသလို လုပ်ဆောင်လျက်ရှိနေကြောင်း ကချင်စစ်ရေးသတင်းရင်းမြစ်က ရှင်းပြသည်။