ကရင်နီပြည်နယ်၊ ဒီးမော့ဆိုမြို့နယ်၊ ငွေတောင်ရွာသစ်တွင် တပ်စွဲထားသော အကြမ်းဖက် စစ်တပ်ကို ဝင်ရောက် တိုက်ခိုက်ရာ စစ်တပ်ဘက်မှ ၁၅ ဦးသေဆုံးပြီး လက်နက် ၆ လက် သိမ်းဆည်းရရှိခဲ့ကြောင်း ရှမ်းတောင် ကရင်နီစစ်တိုင်း ဗျူဟာ – ၁၁ က ထုတ်ပြန်ထားသည်။
ဩဂုတ်လ ၂၉ ရက်နေ့ နံနက် ၁၀ နာရီမှ မွန်းလွဲ ၃ နာရီထိ ဒီးမော့ဆိုမြို့နယ် ငွေတောင်ရွာသစ်တွင် တပ်စွဲထားသော အင်အား ၁၀၀ ခန့်ရှိသော စစ်သားများကို ရှမ်းတောင် ကရင်နီ စစ်တိုင်းဗျူဟာ (၁၁) နှင့် ကရင်နီပြည်နယ်ရှိ တပ်ပေါင်းစုများ ပူးပေါင်း၍ ဝင်ရောက် တိုက်ခိုက်ခဲ့ကြောင်း သိရသည်။
တိုက်ပွဲအတွင်း အကြမ်းဖက် စစ်တပ်ဘက်မှ ၁၅ ဦးသေဆုံးကာ ၃၀ ဦးကျော် ထိခိုက်ဒဏ်ရာရရှိခဲ့ကြောင်း၊ ထို့ပြင် အကြမ်းဖက် စစ်တပ်ထံမှ MA-1 သေနတ် ၄ လက်၊ MA-2 သေနတ် ၁ လက် နှင့် MA-3 သေနတ် ၁ လက် စုစုပေါင်း လက်နက် ၆ လက်နှင့် ခဲယမ်းအချို့ကို သိမ်းဆည်းရရှိခဲ့ကြောင်း သိရှိရသည်။
အဆိုပါ တိုက်ခိုက်မှုကို ရှမ်းတောင် ကရင်နီ စစ်တိုင်းဗျူဟာ (၁၁) ၊ ရှမ်းတောင် ဒရုန်းတပ်ဖွဲ့၊ ဗျူဟာ (၁၁) ဒရုန်းတပ်ဖွဲ့၊ DMO Local ဒရုန်းတပ်ဖွဲ့၊ UAV ဒရုန်းတပ်ဖွဲ့ နှင့် KNA ဒရုန်းတပ်ဖွဲ့တို့က ပူးပေါင်း လုပ်ဆောင်ခဲ့ပြီး တော်လှန်ရေးတပ်ပေါင်းစုဘက်မှ ရဲဘော် ၂ ဦး မစိုးရိမ်ရ ထိခိုက်ဒဏ်ရာရရှိခဲ့ကြောင်း သိရသည်။
တော်လှန်ရေးတပ်ပေါင်းစုက စည်းလုံးညီညွတ်စွာ ပူပေါင်း တိုက်ခိုက်နိုင်၍ ဒီးမော့ဆိုမှ ဖရူဆိုသို့ ဦးတည်လာနေသော အကြမ်းဖက် စစ်တပ် စစ်ကြောင်းကို စစ်ဦးချိုး အထိနာအောင် စွမ်းဆောင်နိုင်ခဲ့ခြင်းဖြစ်ကြောင်း ပြောဆိုထားသည်။
