ရှမ်းပြည်နယ်မြောက်ပိုင်း ၊ ကျောက်မဲမြို့နယ်၊ မိုင်းလုံမြို့သို့ စစ်တပ်က လေယာဉ်ဖြင့် ဗုံးကျဲမှု သီလရှင် ၁ ပါးနှင့်ပြည်သူ ၁ ဦးသေဆုံး ပြီး ရဟန်းသာမဏေ ၅ ပါး အပါအဝင် လူ ၆ ဦးထိခိုက်ဒဏ်ရာရကြောင်း TNLA က သတင်းထုတ်ပြန်သည်။
ဩဂုတ် ၃၀ ရက်နေ့ ည ၁၀ နာရီ ၃၀ မိနစ်အချိန် တိုက်ပွဲဖြစ်ပွားခြင်းမရှိဘဲ စစ်တပ်က လေယာဉ်ဖြင့် မိုင်းလုံမြို့၊ ပန်းသပြေကျေး ရွာအတွင်းသို့ ပေါင် ၂၅၀ ဗုံး ၄ လုံး ကျဲချခဲ့ကြောင်း၊ စစ်တပ်၏ လေကြောင်း တိုက်ခိုက်မှုကြောင့် သီလရှင် ၁ ပါး၊ အမျိုးသမီး ၁ ဦး သေဆုံးခဲ့ကြောင်း၊ သံဃာတော် ၂ ပါး၊ သာမဏေ ၃ ပါး၊ အမျိုးသား ၁ ဦးတို့ ထိမှန်ဒဏ်ရာရရှိကြောင်း သိရှိရသည်။
ထို့ပြင် စစ်တပ်၏ လေကြောင်းတိုက်ခိုက်မှုအတွင်း နေအိမ် ၄ အိမ်၊ ကျောင်းဆောင် ၅ ဆောင်နှင့် ဓမ္မာရုံ ၁ ရုံတို့ ထိခိုက်ပျက်စီးသွားကြောင်း သိရှိရသည်။
ထို့အပြင် ဇူလိုင်လ ၂၉ ရက်နေ့ကလည်း မိုင်းလုံမြို့ကို စစ်ကောင်စီတပ်က လေကြောင်းဖြင့် ဗုံးကျဲတိုက်ခိုက်ခဲ့ရာ အမျိုးသား ၁ ဦး သေဆုံးခဲ့ပြီး နေအိမ် ၇ လုံး ထိခိုက်ပျက်စီးခဲ့သည်။
