ရန်ကုန်၊ အောက်တိုဘာ ၉
ကချင်ပြည်နယ်၊ ၀ိုင်းမော်နှင့် ဗန်းမော်တိုက်ပွဲများတွင် စစ်တပ်၏ ကာကင်းစခန်းများနှင့် တပ်စွဲရာ နေရာများကို KIA ပူးပေါင်းတပ်များက ပြန်လည် သိမ်းပိုက်လိုက်ကြောင်း KIO/KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက ရန်ကုန်ခေတ်သစ်သတင်းဌာနထံသို့ ပြောဆိုသည်။
အောက်တိုဘာလ ၆ ရက်နေ့ ဝိုင်းမော်မြို့ ခလရ ၅၈ တပ်ရင်းမှ စစ်တပ်နှင့် ပြည်သူ့စစ်အင်အား ၁၀၀ ဝန်းကျင်က KIA တပ်စွဲထားသော လမြန်ကျေးရွာသို့ ထိုးစစ်ဆင်လာကြောင်း၊ ထိုသို့ ထိုးစစ်လာပြီးနောက် တိုက်ပွဲများ အပြင်းအထန်ဖြစ်ပွားခဲ့ပြီး အောက်တိုဘာလ ၈ ရက်နေ့တွင် KIA ပူးပေါင်းတပ်များက ပြန်လည် ထိုးစစ်ဆင်ကာ စစ်တပ်ကာစခန်းတချို့ကို ပြန်လည် သိမ်းပိုက်လိုက်ခြင်းဖြစ်ကြောင်း၊ စစ်တပ်စစ်ကြောင်းများမှာ မူလတပ်စွဲထားရာ ၀ိုင်းမော်မြို့ ခလရ ၅၈ တပ်ရင်းထဲသို့ ပြန်လည် ဆုတ်သွားကြောင်း သိရှိရသည်။
“ကျနော်တို့ရှိနေတဲ့ နေရာတွေကို သူတို့က မြေပြင်ကနေ ထိုးစစ်ဆင်လာတာ။ နေ့တိုင်း တိုက်ပွဲတွေက ဖြစ်တယ်။ အခု သူတို့ရဲ့ အခိုင်အမာတပ်စခန်းကြီးတွေတော့မဟုတ်ဘူးပေါ့နော်။ ကာကင်းစခန်းတွေကို ကျနော်တို့ သိမ်းလိုက်နိုင်တယ်။ ကျနော်တို့ အရင်တပ်စွဲခဲ့တဲ့နေရာတွေကို သူတို့ သိမ်းထားတာတွေလည်း ကျနော်တို့ ပြန်သိမ်းတာပါ” ဟု KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက ပြောဆိုသည်။
ထို့ပြင် ဗန်းမော်တိုက်ပွဲများမှာလည်း နေ့စဉ် ပြင်းထန်လျက်ရှိပြီး KIA ပူးပေါင်းတပ်များက ခလရ ၄၇ အနီး စစ်တပ်စွဲထားသော နေရာ ၄ ခုထက်မနည်းကို ပြန်လည် တိုက်ခိုက်သိမ်းပိုက်နိုင်ပြီဖြစ်ကြောင်း၊ စစ်တပ်ဘက်မှ ယမန်နေ့ ဗိုလ်မှူး ၁ ဦး အပါအဝင် အရာရှိများ သေဆုံးကြောင်း၊ တိုက်ပွဲများမှာမူ နေ့တိုင်း ဖြစ်ပွားလျက်ရှိကြောင်း ဗိုလ်မှူးကြီး နော်ဘူက ဆက်လက်ရှင်းပြသည်။
“တိုက်ပွဲကတော့ နေ့တိုင်း ဆက်ဖြစ်နေတာပါ။ ခလရ ၄၇ မှာ သူတို့ လုံခြုံရေး ယူထားတဲ့နေရာတွေ။ သူတို့က ပြည်သူလူထုနေအိမ်တွေထဲမှာ ဝင်ပြီး နေကြတာ။ အဲဒါတွေကိုကျနော်တို့ ပြန်သိမ်းတယ်။ မနေ့က သူတို့ဘက်က ဗိုလ်မှူး ၁ ဦးနဲ့ အရာရှိ စစ်သည်တွေ ကျတယ်။ နောက်ပြီး ၂ မိုင်ဝန်းကျင်မှာ ရှိတဲ့ စစ်တပ်က တပ်စွဲထားတဲ့ ၃ ၊ ၄ နေရာကိုလည်း ကျနော်တို့ ပြန်သိမ်းပါတယ်” ဟု ဗိုလ်မှူးကြီး နော်ဘူက ဆက်လက်ပြောဆိုသည်။
ကချင်ပြည်နယ်အတွင်း စစ်တပ်၏ တပ်စွဲထားသော နေရာများနှင့် တပ်စခန်းများကို KIA ဦးဆောင်သော ပူးပေါင်းတပ်များက ဆက်လက်တိုက်ခိုက်လျက်ရှိပြီး စစ်တပ်၏ ထိုးစစ်ကို ခုခံခြင်းနှင့် တန်ပြန် ထိုးစစ်ဆင်ခြင်းများကိုလည်း တောက်လျှောက် ဆိုသလို လုပ်ဆောင်လျက်ရှိကြောင်း KIA သတင်းရင်းမြစ်များထံမှ သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
