စစ်အာဏာသိမ်းထားသော မြန်မာနိုင်ငံတွင် အကြမ်းဖက် စစ်တပ်ကြောင့် မြန်မာပြည်သူများမှာ ဒုက္ခဆင်းရဲ ဝန်တာများကို ခါးစည်းခံနေရ၍ ကုလသမဂ္ဂအနေဖြင့် မပျက်ကွက်သင့်ကြောင်း ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက ပြောဆိုလိုက်သည်။
နိုဝင်ဘာလ ၆ ရက်နေ့ အမေရိကန်ပြည်ထောင်စု၊ နယူးယောက်မြို့တွင် ပြုလုပ်သော ကုလသမဂ္ဂ လူမှုရေး၊ လူသားချင်းစာနာထောက်ထားမှုနှင့် ယဉ်ကျေးမှုကော်မတီတွင် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး၏ နှစ်စဉ်အစီရင်ခံစာအား အပြန်အလှန် ဆွေးနွေးသည့် အစည်းအဝေး၌ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း က အထက်ပါအတိုင်း ပြောဆိုခဲ့ခြင်းဖြစ်သည်။
စစ်အာဏာသိမ်းပြီးနောက် မြန်မာနိုင်ငံတွင် ဖြစ်ပွားနေသည့် နေရပ်စွန့်ခွာထွက်ပြေးတိမ်းရှောင်မှု အကျပ်အတည်းသည် စစ်အုပ်စုမှ စနစ်တကျ တွက်ချက် ကျူးလွန်ခဲ့သည့် ရက်စက်ကြမ်းကြုတ်မှုတစ်ခုဖြစ်လာကြောင်း၊ ဤသို့ လူကလုပ်သည့် အကျပ်အတည်း၏ ကြီးထွားမှု ပမာဏသည် အလွန့်အလွန် ကြီးမားကြောင်း၊ ပြည်သူများ၊ အထူးသဖြင့် အမျိုးသမီးများ၊ မိန်းကလေးငယ်များနှင့် ကလေးသူငယ်များအနေဖြင့် မှန်းဆမရနိုင်သော ဒုက္ခဆင်းရဲ ဝန်တာများကို ခါးစည်းခံနေရကြောင်း သံအမတ်ကြီးက ထောက်ပြသည်။
အချို့သော ပြည်တွင်းနေရပ်စွန့်ခွာထွက်ပြေးတိမ်းရှောင်နေသူများမှာလည်း အွန်လိုင်း လိမ်လည်မှုများနှင့် လူနှင့် မူးယစ်ဆေးဝါး ကုန်ကူးခြင်းတို့ အပါအဝင် နယ်စပ်ဖြတ်ကျော်မှုခင်းများ၏ သားကောင်များ ဖြစ်လာခဲ့ရကြောင်း၊ ရာဇဝတ်မှုများကို ကျူးလွန်လျက်ရှိသည့် ရာဇဝတ်သားများကမူ ပြစ်ဒဏ်ကင်းလွတ်ခွင့်အား ဆက်လက် အကျိုးခံစားကာ ဆိုးရွားသောရာဇဝတ်မှုများကို ကျူးလွန်ဆဲ ကျူးလွန်မြဲဖြစ်ကြောင်း၊
ယခုအခါ စစ်အုပ်စု သည် ၎င်းတို့ ကျူးလွန်ထားသည့် ယုတ်မာမှုများကို ဖုံးကွယ်ရှောင်လွှားနိုင်ရန် အတုအယောင် ရွေးကောက်ပွဲ လမ်းစဉ်ကို ကြိုးပမ်းနေကြောင်း၊ အတုအယောင် ရွေးကောက်ပွဲသည် တရားဝင်မှု အလျဉ်း မရှိ၊ အလိမ်အညာ လုပ်ငန်းစဉ်တစ်ခုမျှသာဖြစ်ပြီး အကြမ်းဖက်မှုများနှင့် မတည်ငြိမ်မှုများကို ပိုမို တိုးပွားစေနိုင်ကြောင်း၊ နောက်ဆက်တွဲအနေဖြင့် ဒုက္ခသည်များနှင့် ပြည်တွင်းနေရပ်စွန့်ခွာထွက်ပြေးတိမ်းရှောင်သူများကိုသာ သာ၍ တိုးပွားလာစေမည်ဖြစ်ကြောင်း သံအမတ်ကြီးက ရှင်းပြသည်။
ကုလသမဂ္ဂအနေဖြင့် မြန်မာပြည်သူများအပေါ် မပျက်ကွက်သင့်ကြောင်း၊ ပြဿနာ၏ ဇစ်မြစ်အား ဖြေရှင်းမှသာလျှင် အဖြေကို ရှာဖွေနိုင်မည်ဖြစ်ပြီး မြန်မာနိုင်ငံ၏ အကျပ်အတည်းအတွက် ရေရှည်တည်တံ့သည့် နည်းလမ်း ရှာဖွေနိုင်ရန် နိုင်ငံတကာအသိုက်အဝန်း၊ ကုလသမဂ္ဂနှင့် အေဂျင်စီများက အမျိုးသားညီညွတ်ရေးအစိုးရ အပါအဝင် ပါဝင်ပတ်သက်နေသည့် အဖွဲ့အစည်း၊ ပုဂ္ဂိုလ်များအားလုံးနှင့် ရိုးသားစွာ ထိတွေ့ ဆက်ဆံရေးက အလွန်အရေးကြီးပါကြောင်း သံအမတ်ကြီး ဦးကျော်မိုးထွန်းက သတိပေးပြောကြားခဲ့သည်။
၂၀၂၅ ခုနှစ်၊ နှစ်လယ်ပိုင်းအထိ ရရှိထားသော ကိန်းဂဏန်းများအရ ပြည်တွင်းနေရပ်စွန့်ခွာ ထွက်ပြေးတိမ်းရှောင်သူ ၃ ဒသမ ၅ သန်းကျော်အထိ မြင့်တက်လာခဲ့ပြီး ဒေသတွင်း၌လည်း ဒုက္ခသည်နှင့် နိုင်ငံရေးခိုလှုံခွင့် လျှောက်ထားသူ ၁ ဒသမ ၅၇ သန်းအထိ ထပ်မံ တိုးပွားလာလျက်ရှိကြောင်း၊ ဒုက္ခသည်ဦးရေ ဒီရေကဲ့သို့ အတိုင်းအဆ ကြီးမားစွာ မြင့်တက်လာခြင်းမှာ စစ်အုပ်စု၏ အလွန်အမင်း ရက်စက်သော မြေလှန်စနစ်ကြောင့် ဖြစ်ကြောင်း၊ စစ်အုပ်စုက ကျူးလွန်သည့် လေကြောင်း ဗုံးကြဲတိုက်ခိုက်မှုများ၊ လက်နက်ကြီးများဖြင့်တိုက်ခိုက်မှုများနှင့် ကျေးရွာများကို ဖျက်ဆီးမှုများကြောင့် အချို့သော ကျေးရွာနေပြည်သူများအနေဖြင့် ရွာလုံးကျွတ် နေရပ်စွန့်ခွာသူများ ဖြစ်လာခဲ့ရကြောင်း သံအမတ်ကြီးက ဆက်လက် ပြောဆိုသည်။
မြန်မာနိုင်ငံအတွင်း ဒုက္ခသည် လူဦးရေ စုစုပေါင်း၏ ၅၀ ရာခိုင်နှုန်းဖြစ်သော အမျိုးသမီးနှင့် မိန်းကလေးငယ်များအနေဖြင့် ကျားမအခြေပြု အကြမ်းဖက်မှုများ၊ လိင်ပိုင်းဆိုင်ရာ အမြတ်ထုတ်မှုများနှင့် လူကုန်ကူးခံရသည့် ကြီးမားသော အန္တရာယ်တို့ကို ရင်ဆိုင်နေရကြောင်း၊ ဒုက္ခသည်လူဦးရေ စုစုပေါင်း၏ ၄၀ ရာခိုင်နှုန်းဖြစ်သော ကလေးသူငယ်များအနေဖြင့်လည်း ကြီးမားသော စိတ်ဒဏ်ရာများကို အံတုနေထိုင်နေရကြောင်း၊ ခန့်မှန်းအားဖြင့် ၆ သန်းခန့်သော ကလေးသူငယ်များမှာ လူသားချင်းစာနာထောက်ထားမှုအကူအညီများကို အရေးပေါ် လိုအပ်လျက်ရှိကြောင်း၊ နေရပ်စွန့်ခွာ ထွက်ပြေးတိမ်းရှောင်နေရသည့် ကလေးသူငယ်များ၏ ကျောင်းနေမှုနှုန်းမှာ သိသိသာသာ ကျဆင်းခဲ့သဖြင့် အဆိုပါ မျိုးဆက်အားပညာရေးဆုံးရှုံးစေကြောင်း၊ တစ်ဖက်တွင်းလည်း စစ်အုပ်စု၏ အဓမ္မတပ် သားစုဆောင်းမှုနှင့် စစ်မှုထမ်းစေခြင်း ရန်စွယ် တို့ကြောင့် လည်း ထိရှလွယ်လျက်ရှိကြောင်း၊ အခြားတစ်ဖက်တွင်လည်း ကလေးငယ် ၁ သန်း ကျော်မှာ ၎င်းတို့အတွက် လိုအပ်သော ပုံမှန် ကာကွယ်ဆေးများ ထိုးခွင့်အခွင့်အရေးကိုပင် ဆုံးရှုံးကာ ကာကွယ်နိုင်သည့် ရောဂါများ အတုံးအရုံး ပြန့်ပွားလာနိုင်သည့် ဘေးအန္တရာယ်ဆိုးနှင့်လည်း ရင်ဆိုင်နေရကြောင်း သံအမတ်ကြီးက ရှင်းပြသည်။
