မြန်မာနိုင်ငံတွင် တရားမဝင်ကုန်သွယ်ရေး နှင့် ကျားဖြန့်ငွေလိမ်လုပ်ငန်းများမှာ ငြိမ်းချမ်းရေးယူ ထားသော တိုင်းရင်းသားလက်နက်ကိုင်များ၊ နယ်ခြားစောင့်တပ်များကြောင့်ဟု မင်းအောင်လှိုင်နှင့်ဇော်မင်းထွန်းက တစ်လေသံတည်း အပြစ်ဖို့

ရန်ကုန်၊ နိုဝင်ဘာ ၁၉

မြန်မာနိုင်ငံတွင် နယ်စပ်ဂိတ်များ ပိတ်ထားရမှု၊ တရားမဝင်ကုန်သွယ်ရေးများ ကြီးထွားလာမှုနှင့် ကျားဖြန့်ငွေလိမ်လုပ်ငန်းများမှာ ငြိမ်းချမ်းရေးရယူထားသော တိုင်းရင်းသားလက်နက်ကိုင်များ၊ နယ်ခြားစောင့်တပ်များကြောင့်ဟု မင်းအောင်လှိုင်နှင့်ဇော်မင်းထွန်းက တစ်လေသံတည်း အပြစ်ဖို့ ပြောဆိုလိုက်ကြသည်။

နိုဝင်ဘာလ ၁၆ ရက်နေ့ မော်လမြိုင်ခရီးစဉ်တွင် အကြမ်းဖက် မင်းအောင်လှိုင်က မြနမာနိုင်ငံတွင် တရားမဝင် ကုန်သွယ်ရေးများ ဆောင်ရွက်နေသူများမှာ ငြိမ်းချမ်းရေးရယူထားသော တိုင်းရင်းသားလက်နက်ကိုင်အဖွဲ့အစည်းများဖြစ်ကြောင်း၊ ၎င်းတို့၏ ကိုယ်ကျိုးစီးပွားအတွက် တရား မဝင်ကုန်သွယ်မှုများတွင် ပါဝင်ပတ်သက်လျက်ရှိကြောင်း အပြစ်တင်ပြောဆိုခဲ့သည်။

“နယ်စပ်ဒေသများတွင် တည်ငြိမ်အေးချမ်းမှု အားနည်းလာသဖြင့် အချို့သော နယ်စပ်ဂိတ်များကို ပိတ်ထားရကြောင်း၊ အချို့သော ဝန်ထမ်းများ၊ ငြိမ်းချမ်းရေးရယူထားသော တိုင်းရင်းသားလက်နက်ကိုင်အဖွဲ့အစည်းများအနေဖြင့် နိုင်ငံတော်အပေါ် သစ္စာစောင့်သိမှု မရှိဘဲ ၎င်းတို့၏ ကိုယ်ကျိုး စီးပွားအတွက် တရားမဝင်ကုန်သွယ်မှုများတွင် ပါဝင်ပတ်သက်လျက်ရှိကြောင်း၊ ထိုကဲ့သို့ တရားမဝင်ကုန်သွယ်မှုများ ဆောင်ရွက်ခြင်းဖြင့် နယ်စပ်ဒေသရှိ လက်ကိုင်အဖွဲ့အစည်းများကို သက်ဆိုးရှည်နိုင်မည်ဖြစ်ကြောင်း မင်းအောင်လှိုင်က အပြစ်တင်သွားသည်။

အလားတူ ယနေ့ ထုတ်ပြန်သော စစ်တပ်၏ ဝါဒဖြန့် သတင်းစားများတွင် ကျားဖြန့် လုပ်ငန်းများနှင့်ပတ်သက်၍ EAOs ၊ KNU ၊ KNLA နှင့် NCA လက်မှတ်ရေးထိုးထားသော တချို့သော EAOs များ၊ နယ်ခြားစောင့်တပ်များက ပါဝင်လျက်ရှိကြောင်း အကြမ်းဖက် ဇော်မင်းထွန်းက အပြစ်ဖို့သည်။

“၂၀၂၁ ခုနှစ် နောက်ပိုင်းမှာ တိုက်ပွဲတွေ ဖြစ်ပွားခဲ့ပြီးတော့ မြ၀တီမြို့နဲ့ အလှမ်းကွာဝေးတဲ့ ခုနက နယ်မြေတွေမှာ တိုင်းရင်းသားလက်နက်ကိုင် EAOs ၊ KNU ၊ KNLA အဖွဲ့ပြီးရင် NCA စာချုပ်လက်မှတ်ရေးထိုးထားတဲ့ တချို့သော EAO အဖွဲ့တွေ ပြီးရင် နယ်ခြားစောင့်တပ်ဖွဲ့ အမည်ခံတပ်ဖွဲ့တွေ ဝင်ရောက်လုပ်ကိုင်နေတာ ဖြစ်ပါတယ်။ အဲဒီလူတွေကိုပဲ ချည်းကပ်ပြီးတော့ ကိုယ်ကျိုးရှာ စီးပွားရေးသမားတွေကတော့ အဲဒီလူတွေနဲ့ဆက်စပ်ပြီးတော့ ဒီလုပ်ငန်းတွေ(ကျားဖြန့်) ကို လုပ်ဆောင်နေတာဖြစ်ပါတယ်” ဟု အကြမ်းဖက် ဇော်မင်းထွန်းက ဆိုသည်။

ရွှေက္ကိုလ်မြို့သစ်မှာ Myanmar Yatai International Holding Group ၊ ကျောက်ခတ်နယ်မြေတွင် Chongkhaed Garde Resort ကုမ္ပဏီတို့က ပါဝင်ပတ်သက်နေကြောင်း အကြမ်းဖက် ဇော်မင်းထွန်းကပြောဆိုသည်။

အကြမ်းဖက်စစ်တပ်က စစ်အာဏာသိမ်းမှုကြောင့် ဖြစ်ပေါ်လာနေသော တိုင်းပြည် မတည်ငြိမ်မှုများအတွက် တိုင်းရင်းသားလက်နက်ကိုင်အဖွဲ့အစည်းများတွင် အဓိက တာဝန်ရှိကြောင်း ပြစ်တင်ပြောဆိုမှုများကို မကြာခဏ လုပ်ဆောင်လေ့ရှိသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar