ရန်ကုန်၊ နိုဝင်ဘာ ၂၂
နိုင်ငံတကာရာဇဝတ်တရားရုံး-ICCက ၀ရမ်းပြေးတရားခံအဖြစ် လျှောက်ထားခံရသော မင်းအောင်လှိုင် တွင် ပြည်သူလူထုကို ကိုယ်စားပြုမည့် ရွေးကောက်ပွဲကို ကျင်းပပြုလုပ်ရန် အခွင့်အာဏာမရှိကြောင်း ကရင်အမျိုးသားအစည်းအရုံး- KNU က ပြည်သူများထံသို့ တရားဝင် အသိပေးကြေညာသည်။
လက်ရှိ စစ်တပ်က ပြုလုပ်မည့် ရွေးကောက်ပွဲကို KNU အနေဖြင့် လုံး၀ ဆန့်ကျင်ပြီး ပြည်သူများအနေဖြင့်လည်း “သမိုင်းတရားခံမဖြစ်ဖို့ အတုအယောင်ရွေးကောက်ပွဲကို ဆန့်ကျင်စို့” ဟူသော ကြွေးကြော်သံဖြင့် ဆန့်ကျင်ရမည်ဖြစ်ကြောင်း၊ စစ်ကောင်စီ/စစ်ကော်မရှင် ပြုလုပ်မည့် လွတ်လပ်မှုမရှိ၊နိုင်ငံတကာအသိမှတ်မပြုသော ထောင်ချောက်ဆင် အတုအယောင် ရွေးကောက်ပွဲကို ကော်သူးလေနှင့် မြန်မာတပြည်လုံးရှိ တိုင်းရင်းသားပြည်သူလူထု အားလုံး ကန့်ကွက်ဆန့်ကျင်ကြရန် KNU က ထပ်မံနှိုးဆော်သည်။
လက်ရှိ စစ်တပ်က ပြုလုပ်မည့် ရွေးကောက်ပွဲမှာ မစစ်မမှန်အတုအယောင်ရွေးကောက်ပွဲ သာဖြစ်ကြောင်း ပေါ်လွင်ထင်ရှားစေသည့်အချက်များတွင် ‘ရွေးကောက်ပွဲကျင်းပရန် အခွင့်အာဏာမရှိ’ သောသူပြုလုပ်သည့် ရွေးကောက်ပွဲသည် အတုအယောင်သာဖြစ်ကြောင်း၊ ‘ဥပဒေကြောင်းအရ တရားမဝင်’ သောရွေးကောက်ပွဲသည် အတုအယောင်သာဖြစ်ကြောင်း၊ ‘လွတ်လပ်မှုနှင့် တရားမျှတမှုမရှိ’ သောရွေးကောက်ပွဲသည် အတုအယောင်သာဖြစ်ကြောင်း၊ ‘ပြည်သူလူထုဆန္ဒမပါ/ပြည်သူလူထုသဘောနှင့် ကိုက်ညီမှုမရှိ’ သောရွေးကောက်ပွဲသည် အတု အယောင်သာဖြစ်ကြောင်း၊ ‘စစ်မှန်သော နိုင်ငံရေးဖြေရှင်းချက်မဟုတ်’ သောရွေးကောက်ပွဲသည် အတုအယောင်သာဖြစ်ကြောင်း KNU က ပြည်သူများ အသိပေးသည်။
အရေးကြီးသော အချက်ဖြစ်သည့် ရွေးကောက်ပွဲရန် ကျင်းပရန် အခွင့်အာဏာမှာ မင်းအောင်လှိုင် ဦးဆောင်သော စစ်တပ်ထံတွင် မရှိကြောင်း၊ မင်းအောင်လှိုင်နှင့်စစ်တပ်က ၂၀၂၁ ခုနှစ် ဖေဖော်ဝါရီလ ၁ ရက်နေ့မှစတင်၍ လက်နက်ဖြင့် အာဏာကို လုယူခဲ့ပြီး ပြည်သူလူထုကို မတရားဖမ်းဆီးသတ်ဖြတ်ခြင်း၊ လေကြောင်းတိုက်ခိုက်မှုများ ၊ ဘာသာရေးအဆောက်အအုံနှင့် စာသင်ကျောင်းများကို ရည်ရွယ်ချက်ရှိရှိ တိုက်ခိုက်ခြင်းများ ဆက်တိုက် ကျူးလွန်လျက်ရှိကြောင်း၊ မင်းအောင်လှိုင်နှင့် အပေါင်းအပါ စစ်ဗိုလ်ချုပ်များမှာ နိုင်ငံတကာရာဇဝတ်တရားရုံးက ၀ရမ်းတရားခံအဖြစ် လျှောက်ထားခံရသူဖြစ်ကြောင်း KNU က ပြောဆိုသည်။
သို့ဖြစ်၍ ပြည်သူလူထုအပေါ် ရက်ရက်စက်စက် စစ်ရာဇဝတ်မှုများ ကျူးလွန်သူအဖြစ်သော်လည်းကောင်း၊ ၀ရမ်းတရားခံ အဖြစ် လျှောက် ထားခံရသူဖြစ်လည်းကောင်း၊ ပြည်သူလူထု ကိုယ်စားပြုမည်ဆိုသည့် ရွေးကောက်ပွဲကို မည်သို့သော နည်းလမ်းနှင့်မျှ ကျင်းပပြုလုပ်ရန် အခွင့်အာဏာမရှိကြောင်း KNU က သဘောထား ထုတ်ပြန်သည်။
ထို့ပြင် မင်းအောင်လှိုင်မှာ ကာကွယ်ရေးဦးစီးချုပ်အဖြစ် နိုင်ငံ့ဝန်ထမ်းဖြစ်သူမှ ယာယီသမ္မတရာထူးကိုပါ လက်ကိုင်ထားပြီး ဆောင်ရွက်မှုတို့မှာ ဖွဲ့စည်းပုံအခြေခံဥပဒေကို ယနေ့တိုင် လိုသလို အသုံးချပြီး လုပ်ဆောင်နေသည့်အတွက် စစ်ပုန်ကန်မှု၊ နိုင်ငံတော်ကို သစ္စာ ဖောက်ဖျက် ပုန်ကန်ခြင်း၊ ဖွဲ့စည်းအုပ်ချုပ်ပုံ အခြေခံဥပဒေပါ ပြဋ္ဌာန်းချက်များကို တမင်တကာ သို့မဟုတ် ရည်ရွယ်ချက်ရှိရှိ ဖြင့် ဖောက်ဖျက်ကျူးလွန်ခြင်းတို့ကို အထင်အရှားကျူးလွန်သူများပင်ဖြစ်ကြောင်း KNU ထောက်ပြထားသည်။
