ကရင်ပြည်နယ်၊ မြ၀တီမြို့နယ်၊ ထိုင်း-မြန်မာနယ်စပ်တွင် ကျားဖြန့် ငွေလိမ်လည်ဂိုဏ်းများ အခြေစိုက်ရာ ရွှေကုက္ကိုလ်ကျားမြို့သစ်ကို KK Park ကဲ့သို့ ဖောက်ခွဲ ဖျက်ဆီးရန် မရှိကြောင်း BGF ပြောခွင့် ရ နိုင်မောင်ဇော်က ထုတ်ဖော်ပြောဆိုသည်။
နိုဝင်ဘာလ ၂၀ ရက်နေ့ ထိုင်းသတင်းမီဒီယာများနှင့်တွေ့ဆုံစဉ် BGF နိုင်မောင်ဇော်က ထိုသို့ ပြောဆိုက်ခြင်းဖြစ်သည်။
“လက်ရှိက ရွှေကုက္ကိုလ်ကကျတော့ တရားဝင်မြို့လည်း ဖြစ်တယ်။ လက်ရှိက MIC ဖြတ်ထားပြီးတော့မှ လူနေအိမ်၊ အဆောက်အအုံတွေ ဆောက်လုပ်ဖို့ ကျထားပြီးသား နေရာဖြစ်တယ်။ KK Park ကျတော့ ခွင့်ပြုချက်မရှိတဲ့ နေရာမျိုးတွေ ဖြစ်တယ်။ အဲဒီ နေရာ ၂ ခုက မတူတာတွေတော့ ရှိပါတယ်” ဟု BGF နိုင်မောင်ဇော်က ပြောဆိုသည်။
အကြမ်းဖက်စစ်တပ်က ကျားဖြန့် တိုက်ဖျက်ရေးဟုဆိုကာ KK Park အတွင်းမှ အဆောက်အအုံများကို ဖြိုချဖျက်သိမ်းခဲ့ပြီး အဆောက်အအုံ ၆၃၅ လုံး ရှိသည့် အနက် နိုဝင်ဘာလ ၂၁ ရက်နေ့အထိ အဆောက်အအုံ ၁၉၆ လုံးဖြိုချဖျက်ဆီးခဲ့ကြောင်း၊ ကျန်ရှိနေသေးသည့် KK Park အတွင်းမှ အဆောက်အအုံများကို ဆက်လက်ဖြိုချဖျက်ဆီးလျက်ရှိကြောင်း စစ်တပ်က သတင်းထုတ်ပြန်သည်။
စစ်တပ်က ရွှေကုက္ကိုလ်နယ်မြေအတွင်း နိုဝင်ဘာ ၁၈ ရက်မှ နယ်မြေရှင်းလင်းရေး စတင်ဆောင်ရွက်ခဲ့ပြီး ရွှေကုက္ကိုလ် နယ်မြေ၊ ရှင်းယုံလီဝန်းအတွင်းရှိ ၁၂ ထပ် အဆောက်အအုံ ၃ လုံးနှင့် ၉ ထပ် အဆောက်အအုံ ၃ လုံးတို့ကို ရှာဖွေစစ်ဆေးခဲ့ကြောင်း၊ ယင်းအဆောက်အအုံများမှ Online လိမ်လည်မှုနှင့် လောင်းကစားမှုလုပ်ငန်းများ လုပ်ကိုင်နေသူများကို တွေ့ရှိရခြင်းမရှိဘဲဝန်းအတွင်းရှိ ဂိုဒေါင်အတွင်းမှ star Link ဘန်း ၁၀၁ လုံးနှင့် Router ၂၁ လုံး တို့ကို စိစစ်တွေ့ရှိခဲ့ပြီး ဖော်ထုတ်ရှင်းလင်းခြင်းများကို ဆက်လက်ဆောင်ရွက်လျက်ရှိကြောင်း သိရှိရသည်။
ထို့ပြင် ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်း၍ ရွှေကုက္ကိုလ်နယ်မြေအတွင်း၌ Online လိမ်လည်မှုနှင့် လောင်းကစားမှုများ ကျူးလွန်ခဲ့ပြီး ထွက်ပြေးတိမ်းရှောင်ပုန်းအောင်းနေထိုင်လျက်ရှိကြသည့် တရုတ်နိုင်ငံသား ၁၁၆ ဦး၊ ဗီယက်နမ်နိုင်ငံသား ၃၆ ဦး၊ ကင်ညာနိုင်ငံသား ၁၄ ဦး၊ အီသီယိုပီးယားနိုင်ငံသား ၇၅ ဦး၊ တောင်အာဖရိကနိုင်ငံသား ၈ ဦး၊ အင်ဒိုနီးရှားနိုင်ငံသား ၂၃ ဦး၊ ယူဂန်ဒါနိုင်ငံသား ၂၉ ဦး၊ ဇင်ဘာဘွေနိုင်ငံသား ၁ ဦး၊ ဖိလစ်ပိုင်နိုင်ငံသား ၁၄ ဦး၊ ပါကစ္စတန်နိုင်ငံသား ၃ ဦး၊ ဘင်္ဂလားဒေ့ရှ် (ရှ်)နိုင်ငံသား ၁ ဦး၊ လိုက်ဘေးရီးယားနိုင်ငံသား ၁ ဦး၊ နိုင်ဂျီးရီးယားနိုင်ငံသား ၂ ဦး၊ မော်ရိုကိုနိုင်ငံသား ၁ ဦး၊ မာလဝီနိုင်ငံသား ၁ ဦး၊ ကင်မရွန်းနိုင်ငံသား ၆ ဦး၊ မွန်ဂိုလီးယားနိုင်ငံသား ၁ ဦးနှင့် ထိုင်ဝမ် (တရုတ်-တိုင်ပေ) မှ ၁ ဦး၊ စုစုပေါင်း ၃၅၁ ဦးတို့ကို ယနေ့တွင် ထပ်မံစစ်ဆေးဖော်ထုတ်ဖမ်းဆီးထိန်းသိမ်းနိုင်ခဲ့ကြောင်း သိရှိရသည်။
ထို့ကြောင့် ရွှေကုက္ကိုလ်နယ်မြေအတွင်း စုစုပေါင်းဖော်ထုတ်ရှင်းလင်းမှုများအရ နိုဝင်ဘာ ၁၈ ရက်နေ့ ယနေ့အထိ နိုင်ငံခြားသား ၁၃၆၇ ဦးနှင့် Online လိမ်လည်လောင်းကစားမှုကျူးလွန်ရာတွင် အသုံးပြုသည့် ကွန်ပျူတာ ၂၆၅၃ လုံး၊ မိုဘိုင်းဖုန်း ၂၁၇၅၀ လုံး၊ star Link ဘန်း ၁၀၁ လုံး၊ Router ၂၁ လုံးတို့ကို သိမ်းဆည်းရရှိခဲ့ကြောင်း စစ်တပ်၏ သတင်းထုတ်ပြန်ချက်အရ သိရှိရသည်။
