မကွေးတိုင်း၊ မြိုင်မြို့နယ်နှင့် ပေါက်မြို့နယ် အစပ်တွင် ယနေ့ ညနေပိုင်း အကြမ်းဖက် စစ်တပ်၏ စက်တပ်လေထီး ၁ စီး ပျက်ကျခဲ့ကြောင်း ဒေသတွင်း တော်လှန်ရေး သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၂၂ ရက်နေ့ ညနေ ၄ နာရီ ၄၅ မိနစ်ခန့်တွင် အကြမ်းဖက် စစ်တပ်၏ ပခုက္ကူ တပ်မ ၁၀၁ မှ တက်လာသော စက်တပ်လေထီး ၁ စီး ပျက်ကျခဲ့ခြင်းဖြစ်ကြောင်း သိရသည်။
ထိုသို့ ပျက်ကျမှုအတွင်း စက်တပ်လေထီးပေါ်လိုက်ပါလာသော အကြမ်းဖက် စစ်သားများ သေဆုံးခြင်းရှိမရှိကို အတည်ပြုနိုင်ခြင်းမရှိသေးကြောင်း သိရှိရသည်။
“စက်တပ်လေထီး ပျက်ကျတာဟုတ်ပါတယ်။ မြိုင်မြို့နယ်နဲ့ ပေါက်မြို့နယ် အစပ်မှာ ဒီနေ့ ညနေ ၄ နာရီ ၄၅ မိနစ်ခန့်မှာ ပျက်ကျတာပါ။ ပခုက္ကူ တပ်မ ၁၀၁ ကနေ တက်လာတဲ့ ပါရာမော်တာ ၂ စီးမှာ ဒုတိယ အစီးက ပျက်ကျသွားတာပါ။ စက်တပ်လေထီးပေါ် လိုက်ပါလာတဲ့ စစ်ခွေးတွေ သေမသေဆိုတာတော့ အတည်မပြုနိုင်သေးဘူး” ဟု ဒေသတွင်း တော်လှန်ရေး သတင်းရင်းမြစ်က ပြောဆိုသည်။
အလားတူ နိုဝင်ဘာလ ၆ ရက်နေ့ကလည်း ဖြူးမြို့နယ်၊ မန်ကျည်းကုန်းတောင်ရွာကို ဗုံးကျဲ တိုက်ပြီး ပြန်လာသည့် အကြမ်းဖက် စစ်တပ်၏ Gyrocopter ၁ စီး ပျက်ကျခဲ့ပြီး စစ်သား ၂ ဦး သေဆုံးခဲ့ကြောင်း သိရသည်။
