ပို့ကုန်ရငွေများမှ ရရှိသော ဒေါ်လာငွေများကို စစ်တပ်က စစ်လက်နက်၊ ခဲယမ်းနှင့် စစ်ပစ္စည်းများ ဝယ်ယူရန် ကုန်သည်တချို့ကို ငွေပေးချေရန် ဒေါ်လာ လွှဲခိုင်း၊ Green Hardwood သွင်းကုန်ပို့ကုန်ကုမ္ပဏီမှ စိန်ဝင်း(ခ) စိန်ဝင်းလေးက စစ်တပ်အတွက် လက်နက်ခဲယမ်းများ ဝယ်ယူရန် ငွေလွှဲတာဝန်ယူပေး

ရန်ကုန်၊ နိုဝင်ဘာ ၂၅

မြန်မာနိုင်ငံမှ တင်ပို့သော လယ်ယာထွက်ကုန်နှင့် ရေထွက်ကုန်များ အပါအဝင် မြန်မာ့ပို့ကုန်များမှ ရရှိသော ပို့ကုန်ရငွေများကို စစ်လက်နက်၊ ခဲယမ်းနှင့် စစ်ပစ္စည်းများ ဝယ်ယူရာတွင် တိုက်ရိုက်အသုံးပြုနေပြီး ပို့ကုန်လုပ်ငန်းရှင် ကုန်သည်တချို့ကို စစ်လက်နက်ပစ္စည်း အရောင်းအဝယ် အတွက် ငွေပေးချေရန် တိုက်ရိုက် ဒေါ်လာများ လွှဲခိုင်းနေကြောင်း သိရှိရသည်။

အကြမ်းဖက်စစ်တပ်က ပဲ၊နှမ်း၊ ပြောင်း၊ ရော်ဘာ၊ ရေထွက်ကုန် အပါအဝင် မြန်မာနိုင်ငံမှ တင်ပို့သော ပို့ကုန်များအတွက် ရရှိသော အမေရိကန် ဒေါ်လာငွေများကို စစ်တပ်ဘဏ်များထံသို့ ပြန်လည် ပေးသွင်းရန် ပို့ကုန်လုပ်ငန်းရှင်များကို ညွှန်ကြားထားကြောင်း၊ ယင်းတို့အနက်မှ ပို့ကုန် လုပ်ငန်းရှင်ကြီးတချို့မှာ စစ်တပ်အတွက် ဝယ်ယူသော စစ်လက်နက်ပစ္စည်းများကို ငွေပေးချေရန် ၎င်းတို့ နိုင်ငံခြားငွေအကောင့်များမှ တစ်ဆင့် ငွေပေးချေမှုများ လုပ်ဆောင်ပေးနေရကြောင်း သိရှိရသည်။

ရန်ကုန်တိုင်း၊ မင်္ဂလာတောင်ညွှန့်မြို့နယ် အခြေစိုက် Green Hardwood Enterprise ကုမ္ပဏီက ပဲအမျိုးမျိုး အပါအဝင် မြန်မာ့ပို့ကုန်များကို တင်ပို့ပြီး ယင်းကုမ္ပဏီကို စိန်ဝင်း(ခေါ်) စိန်ဝင်းလေးက ဦးစီးကြောင်း၊ ယခုအခါ စိန်ဝင်း (ခ) စိန်ဝင်းလေးက စစ်တပ်အတွက် ဝယ်ယူထားသော စစ်လက်နက်ပစ္စည်းများ၊ ခဲယမ်းများအတွက် ငွေပေးချေခြင်း အဓိက တာဝန်ယူဆောင်ရွက်ပေးနေကြောင်း သိရှိရသည်။

“စိန်ဝင်း (ခ) စိန်ဝင်းလေး Green Hardwood က အခု စစ်တပ်အတွက် ပို့ကုန်ရငွေတွေကို ငွေလွှဲပေးတာကို သူက လုပ်ပေးတယ်။ ပို့ကုန်ရငွေ ဒေါ်လာ ၁ သန်းနဲ့အထက်ကို ဝယ်ပေးနေတာ သူပဲ။ သူက မြန်မာငွေ ထုတ်ပေးတယ်။ သူ့ကို ပို့ကုန်ရငွေ ဘဏ်စာရင်းအတိုင်းပြန်ရောင်းတယ်။ အဲဒီမှာ သူက ဘယ်ဘဏ်အကောင့်ကို ငွေအမောင့် ဘယ်လောက် ပြန်လွှဲပေးပါဆိုပြီး ခိုင်းတယ်။ ကျနော်တို့ စိန်ဝင်း လေးခိုင်းတဲ့ အကောင့်တွေကို ငွေပြန်လွှဲပေးရတယ်။ စိန်ဝင်းလေး ကိုယ်တိုင်ပြောတာက အဲဒါတွေက စစ်လက်နက်ပစ္စည်းတွေအတွက် ငွေလွှဲပေးရမယ့် အကောင့်တွေ ။ သူဒီလို ဒေါ်လာ သန်းချီ ဝယ်နိုင်တာက စစ်တပ်အတွက် သူလုပ်ပေးနေတယ်ဆိုတာ သူကိုယ်တိုင် ထုတ်ပြောတာ။ အဲဒီလိုမျိုးနဲ့ စစ်လက် ပစ္စည်းတွေ ဝယ်တဲ့ အကောင့်တွေအတွက် ပို့ကုန်ရငွေတွေ လွှဲပေးနေရတာ” ဟု ပို့ကုန်သွင်းကုန် လုပ်ငန်းရှင်တစ်ဦးက ပြောဆိုသည်။

နိုင်ငံတကာက စစ်တပ်၏ မြန်မာ့စီးပွားရေးဘဏ်နှင့် မြန်မာ့ကုန်သွယ်ရေးနှင့်ရင်းနှီးမြှုပ်နှံမှုဘဏ်များကို စီးပွားရေးပိတ်ဆို့ထားသော်လည်း ယခုအခါ စစ်တပ်က လက်နက်ပစ္စည်းများနှင့်ခဲယမ်းများ ဝယ်ယူမှုအတွက် ပို့ကုန်လုပ်ငန်းရှင်များ၏ နိုင်ငံခြားငွေနှင့်ဘဏ်အကောင့်များကို ငွေပေးချေခိုင်းရာတွင် တိုက်ရိုက် အသုံးပြုနေခြင်းဖြစ်ကြောင်း သိရှိရသည်။

“ကျနော်တို့ ပဲတင်ပို့လိုရတဲ့ငွေတွေက တကယ့်ငွေအသန့်တွေ။ အိန္ဒိယက TA TA ကုမ္ပဏီဘက်ကနေ ပေးချေတဲ့ ငွေအသန့်တွေ။ အဲဒါတွေကို စစ်လက်နက်ပစ္စည်း ဝယ်ယူမှုအတွက် ငွေချေပေးရတာ။ ကျနော်တို့မှာလည်း ဒေါ်လာသန်းချီကို ရောင်းစရာလူမရှိဘူး။ အဲဒီလို ဝယ်ပေးတာကလည်း စစ်တပ်အတွက် ဝယ်ပေးနေတဲ့ စိန်ဝင်း(ခ) စိန်ဝင်းလေးပဲရှိတယ်” ဟု ပို့ကုန်သွင်းကုန် လုပ်ငန်းရှင်က ရှင်းပြသည်။

အကြမ်းဖက်စစ်တပ်က ပို့ကုန်ရငွေမှ ရရှိသော နိုင်ငံခြားငွေများကို ၎င်းတို့၏ ဘဏ်များထံသို့ ပြန်လည် အပ်နှံခိုင်းပြီး ကုန်သည်များကို မြန်မာကျပ်ငွေ ပြန်လည် ထုတ်ပေးကြောင်း၊ ယင်းနောက် ကုန်သည်များ၏ ပို့ကုန်ရငွေ နိုင်ငံခြားဒေါ်လာများကို စစ်တပ်အတွက် လိုအပ်သည့်နေရာများအားလုံးတွင် အသုံးချနေကြောင်း၊ ယင်းနည်းလမ်းဖြင့် အမေရိကန် အပါအဝင် အနောက်နိုင်ငံကြီးများ၏ စီးပွားရေးပိတ်ဆို့မှုများကို ရှောင် လွှဲလျက်ရှိကြောင်း သိရှိရသည်။