ပဲခူးတိုင်း၊ ပေါင်းတည်မြို့နယ်၊ မုတ်တိုင်ရဲစခန်းမှ အင်အားဖြည့်တင်းရန် ထွက်လာသော အကြမ်းဖက် စစ်သားများ လိုက်ပါလာသည့် FAW ကားကို မိုင်းဆွဲ တိုက်ခိုက်ရာ စစ်တပ်ဘက်မှ ထိခိုက်သေဆုံးမှုရှိကြောင်း ၃၆၀၁ တပ်ရင်း စစ်ထောက်လှမ်းရေးနှင့်သတင်းပြန်ကြားရေး တာဝန်ခံ ရဲဘော် Shadow က ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၃ ရက်နေ့ ညနေ ၄ နာရီခန့်တွင် ပေါင်းတည်မြို့နယ် မှတ်တိုင်ရဲစခန်းမှ ကျောက်ကြီးတောင် စစ်တပ် အထိုင်စခန်းသို့အင်အားဖြည့်တင်းရန် ထွက်လာသော အင်အား ၃၀ ခန့်ပါ FAW ကား ၁ စီးကို ကျောက်ကြီးတောင်နှင့် အဂ္ဂရွာ အကြားတွင် တော်လှန်ရေး တပ်ဖွဲ့များက မိုင်းဆွဲ တိုက်ခိုက်ခဲ့ကြောင်း သိရသည်။
ထိုမိုင်းဆွဲ တိုက်ခိုက်မှုအတွင်း အကြမ်းဖက် စစ်တပ်ဘက်မှ ထိခိုက်သေဆုံးမှုရှိသော်လည်း အရေအတွက်ကို အတည်ပြုနိုင်ခြင်းမရှိသေးကြောင်း၊ ထိခိုက်သေဆုံးမှု အရေအတွက်ကို ဆက်လက် စုံစမ်းနေဆဲဖြစ်ကြောင်း သိရှိရသည်။
“ပေါင်းတည်မြို့နယ် အပိုင် မုတ်တိုင်ရဲစခန်းကနေ ကျောက်ကြီးတောင် စစ်ခွေး အထိုင်စခန်းကို အင်အားဖြည့်တင်းဖို့ ထွက်လာတဲ့ စစ်ခွေး ၃၀ ပါ FAW ကားကို ကျနော်တို့ တော်လှန်ရေး ရဲဘော်တွေက ကျောက်ကြီးတောင်နဲ့ အဂ္ဂရွာ အကြားမှာ မိုင်းဆွဲတိုက်ခိုက်ခဲ့ပါတယ်။ စစ်ခွေးတွေ ထိခိုက်သေဆုံးမှုကတော့ အတည်ပြုနိုင်ဖို့ ဆက်လက်စုံစမ်းနေပါတယ်။ သေဆုံးမှုကတော့ရှိနိုင်ပါတယ်” ဟု ၃၆၀၁ တပ်ရင်း စစ်ထောက်လှမ်းရေးနှင့် သတင်းပြန်ကြားရေး တာဝန်ခံ ရဲဘော် Shadow က ပြောဆိုသည်။
အဆိုပါ တိုက်ခိုက်မှုကို ဗျူဟာ ၂၁ ကွပ်ကဲမှုအောက်ရှိ ၃၆ဝ၁ တပ်ရင်းတပ်ခွဲ ၅ က လုပ်ဆောင်ခဲ့ခြင်းဖြစ်ကြောင်း၊ ပြည်သူ့ကာကွယ်ရေးတပ်ဖွဲ့ဝင်များ အနေဖြင့် စစ်ရေးအရှိန်မြှင့်တင်လာသည်နှင့်အမျှ အကြမ်းဖက် စစ်သားများကို နေရာမရွေး အချိန်မရွေး ပြင်းပြင်းထန်ထန် တိုက်ခိုက်သွားမည် ဖြစ်ကြောင်း ရဲဘော် Shadow က ဆက်လက်ပြောဆိုသည်။
ဓာတ်ပုံ- ကရင်နီပြည်နယ်တွင် လွန်ခဲ့သော လများအတွင်း မိုင်းဆွဲခံရသော အကြမ်းဖက်စစ်ကောင်စီတပ်၏ စစ်ကားတစ်စီး။ (ပုံအဟောင်းဖြစ်ပါသည်)
