ရှမ်းပြည်တောင်ပိုင်းရှိ ပင်းတယ၊ နမ့်စန်နှင့် ကွန်ဟိန်းမြို့နယ် များနှင့် ရှမ်းပြည်အရှေ့ပိုင်းရှိ မိုင်းဆတ်မြို့နယ်တို့တွင် အုပ်ချုပ်ရေးတာဝန်ရှိသူများ၏ ဖိအားပေးမှုကြောင့် တက္ကသိုလ်ကျောင်းသား၊ကျောင်းသူ ၂၅၀ မှာ ရွေး ကောက်ပွဲအတွက် ကြိုတင်မဲပေးခဲ့ရကြောင်း ရှမ်းလူ့အခွင့်အရေးမဏ္ဍိုင်မှ တာဝန်ရှိသူတစ်ဦးက ရန်ကုန် ခေတ်သစ်သတင်းဌာနသို့ ပြောကြားသည်။
နို၀င်ဘာလ ၁၇ ရက်နေ့မှ နို၀င်ဘာလ ၂၀ ရက်နေ့အတွင်း နမ့်စန်မြို့နယ်အတွင်းရှိ ရပ်ကွက်၊ ကျေး ရွာ အုပ်စုများရှိ ရပ်ကွက်ကျေးရွာ ရွေးကောက်ပွဲကော်မရှင်ရုံး ၉ ခုတွင် တက္ကသိုလ် ကျောင်းသား၊ ကျောင်းသူ စုစုပေါင်း ၇၉ ဦး ကြိုတင်မဲပေးခိုင်းခဲ့ကြောင်း၊အဆိုပါ ကျောင်းသူ ကျောင်းသားအများစုမှာ ယခုနှစ်တွင် ပထမ နှစ်တက်ရောက် မည့် မောင်မယ်သစ်လွင်များဖြစ်ကြောင်း သိရှိရသည်။
လာမည့် ဒီဇင်ဘာလတွင်ဖွင့်လှစ်မည့် တက္ကသိုလ်များတွင် ပထမနှစ် သင်တန်းတက်မည့် ကျောင်း သားများကျောင်းအပ်ရန်မှာ ရပ်ကွက် သို့ ကျေးရွာအုပ်ချုပ်ရေးမှူး၏ အကျင့်စာရိတ္တကောင်းမွန်ကျောင်းထောက်ခံစာလိုအပ်ကာ အချို့အသက်မွေး၀မ်းကျောင်း တက္ကသိုလ်များ (ဥပမာ-ပညာရေးတက္ကသိုလ်၊ ဆေးတက္ကသိုလ်)များတက်ရောက်မည့် ကျောင်းသား ကျောင်းသူများမှာ ပြစ်မှုကင်းရှင်းကြောင်း ရဲစခန်း၏ ထောက် ခံစာများလိုအပ်သည့်အပြင် အခြားစာသင် နှစ်များကို တက်ရောက် မည့် ကျောင်းသား၊ ကျောင်းသူများမှာလည်း အဆောင် နှင့် နေအိမ်များငှား ရမ်းရန် ထောက် ခံစာများ လိုအပ်ကြကြောင်း၊ သက်ဆိုင်ရာ အုပ်ချုပ်ရေး အဖွဲများက ကျောင်းသား၊ ကျောင်းသူများကို ကြိုတင်မဲပေးပြီးသည့် အထောက်အထားမပါ ပါက အဆိုပါ ထောက်ခံစာများကိုထုတ်မပေးဘဲ ဖိအား ပေးမဲပေးစေခဲ့ခြင်းဖြစ်ကြောင်း သိရှိရသည်။
“အဓိက ကတော့ စစ်ကောင်စီက ဘယ်လိုပဲ လွတ်လပ်ပြီး တရားမျှတတဲ့ ရွေး ကောက်ပွဲကျင်းပမယ်လို့ မျက်နှာပြောင်ပြောင်နဲ့ ပြောပြော သူတို့ရဲ့ ဒီလိုမျိုး အတင်းအကျပ်မဲပေးပြီးမှ ဖိအားပေးခိုင်းတဲ့ လုပ်ရပ်တွေက ဒီမိုကရေစီနည်းမကျတာ အတုအယောင်ရွေးကောက်ပွဲဖြစ်တယ်ဆိုတာကို မီးမောင်းထိုးပြနေပါတယ်ရှင့် ” ဟု ရှမ်းလူ့အခွင့်အရေးမဏ္ဍိုင်မှ တာဝန်ရှိသူက ရန်ကုန် ခေတ်သစ်သတင်းဌာနသို့ ပြောကြားသည်။
အလားတူ ကွန်ဟိန်မြို့နယ်တွင် ရပ်ကွက်၊ကျေးရွာအုပ်ချုပ်ရေးမှူးများနှင့် ဆယ်အိမ်မှူး၊ရာအိမ်မှူးများမှ တစ်အိမ် တက်တစ်အိမ်ဆင်း နေအိမ်များတွင် တက္က သိုလ်ကျောင်းသားများရှိ မရှိကို နို၀င်ဘာလ ပထမပတ်က တည်းက လိုက်လံစာရင်းကောက်ယူကာ နို၀င်ဘာလ ၁၇ရက်နေ့နှင့် ၁၈ ရက်နေ့တွင် မဖြစ်မနေ လာ ရောက် ကြိုတင်မဲပေးရန်အကြောင်းကြားခဲ့ကြောင်း၊ နို၀င်ဘာလ ၁၇ ရက်နေ့နှင့် ၁၈ ရက်နေ့များတွင် ကွန်ဟိန်မြို့နယ် အတွင်းရှိမဲရုံ ၂ ခုတွင် တက္ကသိုလ်ကျောင်းသား၊ ကျောင်း သူ ၃၆ ဦးမဲပေးခဲ့ရကြောင်း ရှမ်းလူ့အခွင့်အရေးမဏ္ဍိုင်က ပြောဆိုသည်။
ထို့ပြင် နို၀င်ဘာလ ၁၇ ရက်နေ့မှ နို၀င်ဘာလ ၂၀ ရက်နေ့အတွင်းတွင် နမ့်စန်မြို့နယ်အတွင်းရှိ ရပ်ကွက်၊ ကျေးရွာ အုပ်စုများရှိ ရပ်ကွက်ကျေးရွာ ရွေး ကောက်ပွဲကော်မရှင်ရုံး ၉ ခုတွင် တက္ကသိုလ် ကျောင်းသား၊ ကျောင်းသူ စုစု ပေါင်း ၇၉ ဦး ကြိုတင်မဲပေးခဲ့ရကြောင်း၊နို၀င်ဘာလ ၁၇ ရက်နေ့တွင်လည်း ရှမ်းပြည်တောင်ပိုင်း၊ဓနုကိုယ်ပိုင်အုပ်ချုပ်ခွင့်ရဒေသ ပင်းတယမြို့နယ် အထွေ ထွေအုပ်ချူပ်ရေးဦးစီးဌာနတွင် တက္ကသိုလ်ကျောင်းသားကျောင်းသူ ၉၄ ဦး ကြို တင်မဲပေးခဲ့ကြောင်း သိရှိရသည်။
ရှမ်းပြည်အရှ့ပိုင်းမိုင်းဆတ်မြို့နယ်တွင်လည်း ထောက်ခံစာရရှိရန်အတွက် သက်ဆိုင်ရာ ရပ်ကွက်ကျေးရွာ ရွေးကောက်ပွဲကော်မရှင်ရုံး ၆ ခုတွင် နို၀င်ဘာလ ၁၈ ရက်နေ့နှင့် ၁၉ ရက်နေ့များတွင် တက္ကသိုလ် ကျောင်းကျောင်းသူ ၄၇ ဦးမဲပေးခဲ့ရပြီး အများစုမှာဆန္ဒမပါဘဲ မဲပေးခဲ့ရသည်ဟု ဖိအားပေး မဲပေးခဲ့ရသော ကျောင်းသူတစ်ဦးက ရှင်းပြသည်။
ထို့ကြောင့် ပြည်သူများကို ၎င်းတို့၏ ဆန္ဒမပါဘဲ မဲပေးရန် အတင်းအကျပ် ဖိအားပေးသည့် အဆိုပါလုပ်ရပ်များက အကြမ်းဖက် စစ်ကောင်စီ၏ ရွေး ကောက်ပွဲသည် လွတ်လပ်မှု၊ တရားမျှတမှုနှင့် ဒီမိုကရေစီနည်းကျမှု မရှိကြောင်းကို မီးမောင်းထိုးပြနေကြောင်း ရှမ်းလူ့အခွင့်အရေးမဏ္ဍိုင်က ထောက်ပြထားသည်။
