စစ်ကိုင်းတိုင်း၊ ခင်ဦးမြို့နယ်အတွင်း တိုက်ပွဲတွင် သေဆုံးသွားသော စစ်သားအလောင်းများ စစ် တပ်က လာမကောက်ဘဲ စွန့်ပစ်ထားသဖြင့် တော်လှန်ရေးအင်အားစုများက နယ်မြေရှင်းလင်း မီးသဂြိုလ်ပေးရကြောင်း ခင်ဦးမြို့နယ် ပြည်သူ့ကာကွယ်ရေးအဖွဲ့ (ခင်ဦးပကဖ)မှ တော်လှန်ရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
နိုဝင်ဘာလ ၂၃ ရက်နေ့ မွန်းလွဲ ၁၂ နာရီခန့်တွင် ခင်ဦးမြို့နယ်၊ မုံလှကျေးရွာအတွင်း ၄ ရက်အကြာ ယာယီ တပ်စွဲ အထိုင်ချထာသော အကြမ်းဖက် စစ်တပ်သည် ပျဥ်ထောင်ပျူစောထီးရွာသို့ အင်အား ၁၈၀ ခန့်ဖြင့် ထွက်လာစဉ် တော်လှန်ရေးတပ်ဖွဲ့များက ကြားဖြတ် တိုက်ခိုက်ခဲ့ခြင်းဖြစ်ကြောင်း၊ ယင်းတိုက်ပွဲတွင် စစ်တပ် စစ်ကြောင်းတစ်ခုလုံး ပျက်သွားပြီး စစ်သား ၈၀ ဝန်းကျင်သေဆုံးကာ လက်နက် ၂၉ လက်နှင့်ခဲယမ်းများ သိမ်းဆည်းရရှိခဲ့ကြောင်း သိရှိရသည်။
ယင်းနောက် စစ်တပ်စစ်ကြောင်းမှာ မုံလှကျေးရွာအတွင်း ၈ ရက်မြောက်အကြာ ယာယီ အထိုင်ချ တပ်စွဲနေထိုင်ခဲ့ပြီး နိုဝင်ဘာလ ၂၇ ရက်နေ့ ညနေပိုင်း မုံလှ-ပင်စိမ်းကင်း – ကျီစု – အောင်သာယာ – ကာဘိုးအထိ အဆိုပါ လမ်းကြောင်းအတိုင်း တိတ်တဆိတ် ဆုတ်ခွာသွားကြကြောင်း၊ နိုဝင်ဘာလ ၂၈ ရက်နေ့ တော်လှန်ရေးအင်အားစုများက တိုက်ပွဲဖြစ် နေရာသို့ နယ်မြေရှင်းလင်းရေးများ သွားရောက် ဆောင်ရွက်ခဲ့ရာ စစ်တပ်ဘက်မှ သေဆုံးပုတ်ပွနေသော စစ်သားအလောင်း အများအပြား လယ်ကွင်းထဲ၊ ချောင်းထဲနှင့် နေရာအနှံ့အပြားတွင် တွေ့ရကြောင်း ၊ ယင်းအလောင်းများကို ခင်ဦးပြည်သူ့ကာကွယ်ရေးအဖွဲ့ (ပကဖ) ရဲဘော်များဥက ဒီဇယ်/ဓာတ်ဆီဗူးများ၊ တာယာကွင်းများ၊ မီးစာတုတ်များ အသင့်ယူဆောင်၍ ၎င်းရုပ်အလောင်းများ၏ နေရာတွင်ပင် မီးရှို့ သင်္ဂြိုဟ်ပေးခဲ့ကြကြောင်း သိရှိရသည်။
“အလောင်းတွေက ပုတ်ပွ နံစော်နေတာ။ သူတို့စခတွေက စခ အလောင်းတွေ လာမသယ်တော့ဘူး။ ဒီအတိုင်းထားသွားတာ။ လူ့ဂုဏ်သိက္ခာအရ သဂြိုလ်ပေးဖို့ ကျနော်တို့က လုပ်ဆောင်ပေးတာပါ။ အလောင်းအတော်များများက ပုတ်ပွနေတယ်” ဟု တော်လှန်ရေး သတင်းရင်းမြစ်က ပြောဆိုသည်။
အဆိုပါ ခင်ဦးတိုက်ပွဲအတွင်း စစ်တပ်ဘက်မှ ၆၀ နှင့် ၈၀ အကြား သေဆုံးခဲ့ပြီး စ အကြမ်းဖက် စစ်တပ်ထံမှ ငါးကြင်းမှီး ၁ လက်၊ MA-1 ၁၀ လက်၊ MA-2 ၃ လက်၊ BA-100/ 60mm ကွန်မန်ဒို စိန်ပြောင်း ၁ လက်၊ MA-3 ၃ လက်၊ MA-4 ၁ လက်၊ G-3 ၄ လက်၊ MAS Sniper ၁ လက်၊ M1- ၅ လက်နှင့် ဆက်စပ် ကျည် ခဲယမ်း အစုံ၊ အများအပြား သိမ်းဆည်းရမိခဲ့သည်။
(အလောင်းဓာတ်ပုံများကို ရန်ကုန်ခေတ်သစ်၏ တယ်လီဂရမ်တွင် သွားရောက် ကြည့်ရှုနိုင်ပါသည်။)
