ရန်ကုန်၊ နိုဝင်ဘာ ၂၉
အမေရိကန်ပြည်ထောင်စုတွင် ယာယီခိုလှုံခွင့်-TPS (Temporary Protected Status) ဖျက်သိမ်း၍ နှင်လွှတ်မည့် မြန်မာနိုင်ငံသား ၄၀၀၀ အပါအဝင် ကမ္ဘာတစ်ဝန်းမှ မြန်မာနိုင်ငံသားများ မိခင်နိုင်ငံပြန်လာကြပြီး ရွေးကောက်ပွဲ မဲပေးကြလျှင် ကြိုဆိုမည်ဖြစ်ကြောင်း အကြမ်းဖက် မင်းအောင်လှိုင်က ပြောဆိုသည်။
ယမန်နေ့ ဘယ်လာရုစ်နိုင်ငံမှ သမ္မတ Aleksandr Lukashenko နှင့် တွေ့ဆုံစဉ် အကြမ်းဖက် မင်းအောင်လှိုင်က ထိုသို့ ထုတ်ဖော်ပြောဆိုခြင်းဖြစ်သည်။
နိုဝင်ဘာလ ၂၅ ရက်နေ့ အမေရိကန်နိုင်ငံ အမိမြေလုံခြုံရေးဝန်ကြီးဌာနက အမေရိကန်တွင် ရောက်ရှိနေသည့် မြန်မာနိုင်ငံသား ၄၀၀၀ ခန့်အား ယာယီခိုလှုံခွင့်-TPS ပေးထားမှုမှ ရုပ်သိမ်း၍ ရက်ပေါင်း ၆၀ အတွင်း ပြန်လည် စေလွှတ်မည်ဟု ထုတ်ပြန်ထားကြောင်း၊ နိုင်ငံရေး သဘော ထားကွဲလွဲမှုများနှင့် အခြားအကြောင်းအမျိုးမျိုးကြောင့် အမေရိကန်နိုင်ငံ အပါအဝင် အခြားနိုင်ငံများသို့ ရောက်ရှိနေသည့် မြန်မာနိုင်ငံသားများ အနေဖြင့် မိခင်နိုင်ငံသို့ ပြန်လာမည်ဆိုပါက ကြိုဆိုကြောင်း၊ မြန်မာနိုင်ငံသားများအနေဖြင့် ဆန္ဒရှိမည်၊ ရွေးကောက်ပွဲကာလနှင့် အကျုံး ဝင် မည်၊ မဲစာရင်းတွင် ပါဝင်မည်ဆိုပါက ရွေးကောက်ပွဲတွင် ဆန္ဒမဲလာရောက် ပေးနိုင်ရေး ဆောင်ရွက်ပေးသွားမည်ဖြစ်ကြောင်း မင်းအောင်လှိုင်က ဆိုသည်။
“အမေရိကန်နိုင်ငံ အမိမြေလုံခြုံရေးဝန်ကြီးဌာနက ထုတ်ပြန်ကြေညာခဲ့တဲ့ ယာယီခိုလှုံခွင့်ရုပ်သိမ်းတဲ့ မြန်မာနိုင်ငံသား ၄၀၀၀ ခန့်ကိုလည်း လက်ခံဆောင်ရွက်နိုင်ရေး စီစဉ်ဆောင်ရွက်လျက်ရှိပါတယ်။ သူတို့မဲစာရင်းမှာ ပါလို့ ရှိရင်လည်း မဲပေးခွင့်ရှိအောင် ဆောင်ရွက်ပေးပါမယ်။ အလားတူစွာပဲ အခြားအကြောင်းအမျိုးမျိုးနဲ့ ပြည်ပကိုရောက်ရှိနေကြတဲ့ မြန်မာနိုင်ငံသားများကိုလည်း ဒီမိုကရေစီရေးမှာ ငြိမ်းချမ်းစွာလက်တွဲ ဆောင်ရွက်နိုင်ဖို့ မြန်မာနိုင်ငံကို ပြန်လာဖို့ ကြိုဆိုကြောင်းလည်း ပြောလိုပါတယ်” ဟု အကြမ်းဖက် မင်းအောင်လှိုင်က ပြောဆိုသည်။
မင်းအောင်လှိုင်က ထိုသို့ ပြောဆိုသော်လည်း လက်တွေ့ ပြည်တွင်းတွင် ရွေးကောက်ပွဲကို နှောင့်ယှက်ဖျက်ဆီးသည်ဟုဆိုကာ လူမှုကွန်ရက်မှ မဲမပေးရေး လှုံ့ဆော်မှုများ၊ စစ်တပ်ဝါဒဖြန့် ရုပ်ရှင်ဇတ်လမ်းကို ဝေဖန်သူများ အပါအဝင် ပြည်သူများ၊ သရုပ်ဆောင် ဒါရိုက်တာများ၊ ဟာသလူရွှင်တော်များကို စစ်တပ်က ရွေးကောက်ပွဲ နှောင့်ယှက်မှုများ ကာကွယ်ရေးဥပဒေဖြင့် ဖမ်းဆီးအရေးယူမှုများ ဆက်တိုက် လုပ်ဆောင်လျက်ရှိသည်ကို တွေ့ရှိရသည်။
