မန္တလေးတိုင်း၊ ညောင်ဦးမြို့နယ်၊ သစ်ထောင်ကျေးရွာအုပ်စု အုပ်ချုပ်ရေးမှူး မောင်သန်းကို ပစ်ခတ် တိုက်ခိုက်ရာ ပွဲချင်းပြီး သေဆုံးခဲ့ကြောင်း ပုဂံဘီလူးအဖွဲ့မှ တာဝန်ရှိသူတစ်ဦးက ရန် ကုန်ခေတ်သစ်သတင်း ဌာနထံသို့ ပြောကြားသည်။
ယမန်နေ့ နိုဝင်ဘာလ ၂၈ ရက် နံနက် ၁၁ နာရီခန့်က ညောင်ဦးမြို့နယ်၊ သစ်ထောင့်ကျေးရွာအုပ်စု အုပ်ချုပ်ရေးမှူး မောင်သန်းသည် လက်ပံပင်ခြေကျေးရွာဘက်သို့ ဈေးဝယ်ရန် ဆိုင်ကယ်ဖြင့် ထွက် လာစဉ် ညောင်ဦး -မြင်းခြံ ကားလမ်းမပေါ်၌ ပုဂံဘီလူးတပ်ဖွဲ့ဝင်များက ပစ်ခတ် တိုက်ခိုက်ခဲ့ရာ နေရာ သေဆုံးသွားကြောင်းသိရသည်။
“သူက သစ်ထောင့် တောင်ရွာနဲ့ မြောက်ရွာ ၂ ရွာလုံးကို အုပ်ကြီးလုပ်နေတာ။ လက်ပံခြေပေါ် ကျေး ရွာဘက်ကို ဈေးဝယ်ဖို့ဆိုင်ကယ်နဲ့ထွက်လာတုန်း ပစ်ခတ်ရှင်းလင်းခဲ့တာဖြစ်ပါတယ်။ သူက ပြစ်မှု တွေအများကြီး ကျူးလွန်ထားတယ်။ စကစနဲ့ ပေါင်းပြီး ပေါ်တာဆွဲရင်ပါတယ်။ ပြည်သူကို အနိုင် ကျင့်တယ်။အဓိက က လက်ပံခြေပေါ်ကျေးရွာက ရခတွေနဲ့ ပေါင်းတယ်” ဟု ပုဂံဘီလူးတပ်ဖွဲ့မှ တာ ဝန် ရှိသူတစ်ဦးက ရန်ကုန်ခေတ်သစ်သတင်း ဌာနထံသို့ ပြောကြားသည်။
၂၀၂၄ ခုနှစ်အတွင်းက သစ်ထောင့်ရွာအုပ်ချုပ်ရေးမှူး ထွက်ပြေးသွားပြီးနောက် သေဆုံးသွားသော မောင်သန်းက ကျေးရွာအုပ်စုအုပ်ချုပ်ရေးမှူး ဖြစ်လာခဲ့ခြင်းဖြစ်ပြီး အနီးကပ်ပစ်ခတ်ခံရမှုကြောင့် ပါးနှင့် ရင်ဘတ်တို့တွင် ကျည်ထိမှန် ဒဏ်ရာရရှိခဲ့ကြောင်း၊ သေဆုံးသွားသော ရုပ်အလောင်းကို စစ်သားများက လာရောက်ကောက်ယူပြီး ညောင်ဦးဆေးရုံသို့ သယ်ဆောင်သွားကြောင်း သိရ သည်။
အလားတူ မွန်ပြည်နယ်၊ ဘီးလင်းမြို့နယ်၊ တောင်စွန်းကျေးရွာအုပ်စု အုပ်ချုပ်ရေးမှူး တင်ကိုကိုဦး ပစ်ခတ်ခံရပြီး ထိခိုက်ဒဏ်ရာရရှိခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၅ ရက်နေ့ ညနေ ၅ နာရီခန့်တွင် တောင်စွန်းကျေးရွာ၊ မြို့မရပ်ကွက်၊ ဘဝမျက်ရှု စာကြည်တိုက်အရှေ့တွင် အမည်မသိ သေနတ်သမားများက အုပ်ချုပ်ရေးမှူး တင်ကိုကိုဦးကို ပစ်ခတ်တိုက်ခိုက်ခဲ့ခြင်းဖြစ်ကြောင်း သိရသည်။
ထိုတိုက်ခိုက်မှုအတွင်း အုပ်ချုပ်ရေးမှူး တင်ကိုကိုဦးသည် ပွဲချင်းပြီး သေဆုံးခြင်းမရှိဘဲ ပြင်းထန်ဒဏ်ရာရရှိခဲ့ကာ ဆေးကုသမှု ခံယူနေရကြောင်း၊ အဆိုပါ အုပ်ချုပ်ရေးမှူးသည် အကြမ်းဖက် စစ်တပ်နှင့် ပူးပေါင်းပြီး လူငယ်များကို ပေါ်တာဆွဲ ဖမ်းဆီးခြင်း၊ ပြည်သူများနည်းမျိုးစုံဖြင့် နှိပ်စက်နေခြင်းဖြစ်ကြောင်း သိရှိရသည်။
“တင်ကိုကိုဦး ပစ်ခတ်ခံရတာဟုတ်ပါတယ်။ မသေသေးဖူးလို့တော့ သိရတယ်။ သူ့အိမ်မှာက ရက်လည်လုပ်တယ်လို့ မကြားသေးဘူး။ အခုထိ ဆေးရုံတင်ထားတုန်းပဲ ဘယ်အဖွဲ့က ပစ်သွားတယ်ဆိုတာတော့ မသိရသေးဘူး” ဟု ဒေသပြည်သူတစ်ဦးက ပြောဆိုသည်။
