စစ်ကိုင်းတိုင်း၊ ချောင်းဦးမြို့နယ်၊ ခင်မွန်ကျေးရွာ လမ်းဆုံတွင် အလုပ်မှ ပြန်လာသည့် လူငယ် ၃၀ကျော်ကို အကြမ်းဖက် စစ်တပ်က ၃ ရက်ဆက်တိုက် ပေါ်တာဆွဲ ဖမ်းဆီး ခဲ့ကြောင်း ဖမ်းဆီးခံလူငယ်များ၏ မိဘဆွေမျိုးများက ရန်ကုန်ခေတ်သစ်သတင်းဌာနထံသို့ ပြောဆိုသည်။
နိုဝင်ဘာလ ၂၀ရက်နေ့မှ နိုဝင်ဘာလ ၂၃ ရက်နေ့ အထိ ချောင်းဦးမြို့နယ် ခင်မွန်ကျေးရွာ လမ်းဆုံတွင် လမ်းသွားလမ်းလာလူငယ်များကို စစ်တပ်က ဖမ်းဆီးခဲ့ခြင်းဖြစ်ပြီး ဖမ်းဆီးခံရသော လူငယ် ၃၀ ကျော်မှာ အလုပ်ပြန်လာသည့် လူငယ်များဖြစ်ကြောင်း ၊ ဖမ်းဆီးခံရသော လူငယ်များမှာ အသက် ၂၀ ကျော်ဝန်းများဖြစ်ကြောင်း၊ လက်ရှိ အချိန်တွင် ဖမ်းဆီးထားသူများကို ချောင်းမြို့ပေါ်ရှိ မြို့နယ်ထွေထွေ အုပ်ချုပ်ရေးရုံးထဲတွင် ဖမ်းဆီးထားပြီး မိသားစုများနှင့်တွေ့ခွင့်မပေးကြောင်းသိရှိရသည်။
“စစ်ခွေးတွေ ကျေးရွာထဲကို ပေါ်တာဝင်ဆွဲတယ်။ တစ်ချို့ အသက်ကြီးပိုင်းနှင့် ကျန်းမာရေး မကောင်းတဲ့သူတွေဆိုရင် စစ်ခွေးတွေက ပြန်လွှတ်ပေးတယ်။ အခု အဖမ်းခံရတာတွေက အသက် ၂၀နှစ် ဝန်းကျင်တွေများတယ်။ လက်ရှိမှာ စစ်ခွေးက ဖမ်းဆီးထားတဲ့သူတွေကို ချောင်းဦးမြို့ပေါ်ရှိ မြို့နယ်ထွေအုပ်ချုပ်ရေးရုံးမှာ ဖမ်းဆီးထားတယ်။ မိသားစုတွေနဲ့လည်း တွေ့ခွင့်မပေးဘူး”ဟု ဖမ်းဆီးခံလူငယ်တစ်ဦး၏ မိဘတစ်ဦးက ပြောဆိုသည်။
အလားတူ နိုဝင်ဘာလ ၂၅ ရက်နေ့ နှင့် နိုဝင်ဘာလ ၂၆ ရက်နေ့ မုံရွာမြို့ပေါ်တွင် စစ်တပ်က နေ့ရောညပါ လူငယ်များကို ပေါ်တာဆွဲ ဖမ်းဆီးခဲ့ကြောင်း၊ အနည်းဆုံးလူငယ် ၄၀ ထက်မနည်းကို စစ်တပ်က စစ်မှုထမ်းခိုင်းရန်အတွက် ပေါ်ဆွဲတာ ဖမ်းဆီးခဲ့ကြောင်း၊ စစ်တပ်က ဖမ်းဆီးသွားသော လူငယ်များမှာ အသက် ၂၀ ကျော်အရွယ်များဖြစ်ပြီး မုံရွာမြို့ပေါ် ဌာနဆိုင်ရာ စုပေါင်းရုံးတွင် ချုပ်နှောင်ထားကာ မိသားစုဝင်များနှင့်တွေ့ခွင့်မပေးကြောင်း သိရှိရသည်။
အကြမ်းဖက်စစ်တပ်က လာမည့် ဒီဇင်ဘာလတွင် စစ်မှုထမ်းအပတ်စဉ် ၂၀ ကို ဖွင့်လှစ်မည်ဖြစ်ပြီး မြို့ကြီးများတွင် စစ်မှုထမ်းတပ်သားသစ်များ ရရှိရန် ပေါ်တာဆွဲမှုများ နေရာအနှံ့အပြားတွင် ဖြစ်ပွားနေကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ဆက်သွယ် ပြောဆိုသည်။
ဓာတ်ပုံ- ၂၀၂၁ စစ်အာဏာသိမ်းမှုကို ဆန္ဒပြသော လူငယ်များကို တနင်္သာရီတိုင်းတွင် စစ်တပ်က အကြမ်းဖက် ဖမ်းဆီးခဲ့စဉ်။ (ပုံအဟောင်းကို အသုံးပြုထားပါသည်။)
