စစ်ကိုင်းတိုင်း ဆားလင်းကြီးမြို့နယ်နှင့် ရေစကြိုမြို့နယ်ရှိ ကျေးရွာပေါင်း ၁၄ ရွာအတွင်း silent strike တွင် ပူးပေါင်းပါဝင်ရေး၊မြို့ကြီးပြကြီးများသို့ ခရီးမထွက်ရေးနှင့် အတုယောင်ရွေးကောက်ပွဲ ဆန့်ကျင်ရေး လူထုနှိုးဆော်မှုပြုလုပ်ခဲ့ကြောင်း ရွှေဗန့်ဂျီရွာပေါင်းစုံသပိတ်အင်အားစုမှ သပိတ်ရဲဘော် မောင်သန့်က ရန်ကုန် ခေတ်သစ်သတင်းဌာနသို့ ပြောကြားသည်။
အဆိုပါ လှုပ်ရှားမှုကို ဒီဇင်ဘာလ ၁၀ ရက်နေ့တွင် ကျရောက်မည့် အပြည်ပြည်ဆိုင်ရာ လူ့အခွင့်ရေးနေ့ အကြိုလူထုလှုပ်ရှားမှုအဖြစ် ရွှေဗန့်ဂျီရွာပေါင်းစုံသပိတ်အင်အားစုနှင့်အတူ မန္တလေး မဟာအောင်မြေ ပအဖအဖွဲ့တို့ ပူးပေါင်း၍ လူထုနှိုးဆော်မှုပြုလုပ်ခဲ့ခြင်းဖြစ်ကြောင်း သိရှိရသည်။
