မကွေးတိုင်း၊ စလင်းမြို့နယ်ရှိ ကျေးရွာများကို အကြမ်းဖက် စစ်တပ်က ဒရုန်း၊ အသေခံဒရုန်းများဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၂၀ ကျော် ထိခိုက်ဒဏ်ရာရရှိခဲ့ကြောင်း ပြည်သူ့ ညီနောင်-စလင်း သတင်းတာဝန်ခံ ကိုပြည်သူက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇန်နဝါရီလ ၉ ရက်နေ့တွင် စလင်းမြို့နယ် အတွင်းရှိ အကြမ်းဖက် စစ်တပ်က ဆင်ဖြူကျွန်းမြို့ မြောက်ဘက်နှင့် စလင်းချောင်း မြောက်ဘက်ရှိ ကျေးရွာများကို ဒရုန်း၊ အသေခံဒရုန်းများဖြင့် ဗုံးကျဲ တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း ကျေးရွာ ၁ ခုကို ဒရုန်းဗုံးများနှင့် အသေခံဒရုန်းများ ကျရောက်ပေါက်ကွဲခဲ့ပြီး ပြည်သူ ၄ ဦး ထိခိုက် ဒဏ်ရာရကာ နွား ၃ ကောင်သေဆုံးခဲ့ကြောင်း သိရသည်။
ဇန်နဝါရီ ၁၀ ရက်နေ့ ည ၁၀ နာရီ ၃၀ မိနစ်ခန့်တွင်လည်း နွယ်တမယ်ရွာမှ စစ်ဘေးရှောင် ပြည်သူ ၁၅၀ ခန့် နေထိုင်သော စစ်ရှောင်စခန်းကို အကြမ်းဖက် စစ်တပ်က ဒရုန်း ဗုံးများ ကျဲချ တိုက်ခိုက်ခဲ့သောကြောင့် ပြည်သူ ၁၈ ဦး ထိခိုက် ဒဏ်ရာရရှိခဲ့ကြောင်း၊ ထိုသို့ တိုက်ခိုက်မှု ပြုလုပ်ပြီးနောက် နွယ်တမယ်ရွာအနောက်ဘက်ရှိ ကျေးရွာ ၁ ခုကိုလည်း အကြမ်းဖက် စစ်တပ်က အသေခံဒရုန်း ၂ စီးဖြင့် ထပ်မံတိုက်ခိုက်သွားကြောင်း သိရှိရသည်။
“မနေ့က ည ၁၀နာရီခွဲဝန်းကျင်လောက်မှာ နွယ်တမယ်ရွာက စစ်ဘေးရှောင်ပြည်သူ ၁၅၀ လောက်နေတဲ့ နေရာကို စစ်ခွေးတွေက ဒရုန်း ၂ စီးနဲ့ ဗုံး ၄ လုံးကျဲချ တိုက်ခိုက်ခဲ့တာ ပြည်သူ ၁၈ ဦးလောက် ထိခိုက်ဒဏ်ရာရတယ်။ အသေအပျောက်တော့ မရှိဘူး။ ၉ ရက်နေ့က ဗုံးကျဲသွားတာလဲ ပြည်သူ ၄ ဦး ထိခိုက်ဒဏ်ရာရပြီး နွား ၃ ကောင်သေဆုံးတယ်” ဟု ပြည်သူ့ ညီနောင်-စလင်း သတင်းတာဝန်ခံ ကိုပြည်သူက ပြောဆိုသည်။
ယနေ့ ဇန်နဝါရီလ ၁၁ ရက်နေ့တွင် စလင်းမြို့နှင့် ဆင်ဖြူကျွန်းမြို့ပေါ်၌ အကြမ်းဖက် စစ်တပ်က အင်အားအများအပြား ဖြည့်တင်းပြီး မြို့နေရာအနှံ့၌ တပ်ဖြန့်ထားကာ အထက ၁ နှင့် အထက ၂ ကျောင်းတို့တွင် အတုယောင် ရွေးကောက်ပွဲကို မဲပေးနိုင်ရေးအတွက် စစ်ဘေးတိမ်းရှောင်နိုင်ခြင်းမရှိသော ပြည်သူများကို အတင်းကျပ် ခြိမ်းခြောက်ကာ မဲထည့်နိုင်ရေးလုပ်ဆောင်နေကြောင်း သိရသည်။
“ကျွန်မတို့ စစ်ရှောင်ဖို့ထွက်လာပါတယ်။ အဲဒီစစ်ခွေးတွေက ဘယ်သွားမှာလဲလို့မေးပါတယ်။ ကျွန်မတို့လည်း လွတ်ကင်းတဲ့နေရာ စစ်ရှောင်ထွက်ဖို့လို့ပြောလိုက်တယ်။ စစ်ခွေးတွေက ဘယ်မှသွားစရာမလိုဘူး။ သွားခွင့်လည်းမပေးနိုင်ဘူး။ မဲပေးပြီးရင် ကြိုက်တဲ့နေရာသွားလို့ သေနတ်နဲ့ ချိန်ပြီးပြောဆိုပါတယ်။ သွားရင်ပစ်သတ်မယ်လို့လည်း ပြောတာတွေရှိတယ်လို့ သိရတယ်” ဟု ပြည်သူ့ ညီနောင်-စလင်း သတင်းတာဝန်ခံ ကိုပြည်သူက ဆက်လက် ပြောဆိုသည်။
စလင်းမြို့နှင့်ဆင်ဖြူကျွန်းမြို့ အပါအဝင် ကျေးရွာများ စစ်ဘေးတိမ်းရှောင်နေရသော ပြည်သူ ၇၀၀၀ နီးပါးရှိကြောင်း၊ လက်ရှိချိန်ထိ စလင်းမြို့နယ်အတွင်း စစ်ရေးအရှိန်ပြင်းထန်နေကာ အပြစ်မဲ့ စစ်ရှောင်ပြည်သူများနှင့် ကျေးရွာတွေကို အကြမ်းဖက် စစ်တပ်က ပစ်မှတ်ထား တိုက်ခိုက်ကာ လူသားဒိုင်းအဖြစ်အသုံးချနေသည်ကို တွေ့ရကြောင်း ပြည်သူ့ ညီနောင်-စလင်း သတင်းတာဝန်ခံ ကိုပြည်သူက ပြောဆိုသည်။
