ရန်ကုန်၊ ဇန်နဝါရီ ၂၂
ရခိုင်ပြည်၊ ကျောက်တော်နှင့် ပုဏ္ဏားကျွန်းမြိုနယ်အစပ်ရှိ စစ်သုံ့ပန်းများထားရာစခန်းကို စစ်တပ်က လေယာဉ်ဖြင့် ဗုံးကျဲချခဲ့ရာ စစ်သုံ့ပန်းများနှင့်မိသားစုဝင် ၂၁ ဦးသေဆုံးပြီး ၃၀ ဦး ဒဏ်ရာရရှိသွားကြောင်း ရခိုင်ဒေသသတင်းရင်းမြစ်များ၏ ထုတ်ပြန်ချက်များအရ သိရှိရသည်။
ဇန်နဝါရီလ ၂၀ ရက် ည ၇ နာရီကျော်အချိန် ကျောက်တော်နှင့် ပုဏ္ဏားကျွန်းအစပ် ချောင်းတူ (ခေါ်) ဆောင်းဒုံ ကျေးရွာ အနောက်ဘက်ရှိ AA ၏ စစ်သုံ့ပန်းများ ထားရှိရာစခန်းနေရာကို စစ်ကောင်စီက ပေါင် ၃၀၀ ဗုံး ၄ လုံး ကျဲချခဲ့ကြောင်း၊ ဗုံးများမှာ ဆေးခန်းပေါ်သို့ ၁ လုံး၊ ဆေးခန်း ဝန်းကျင်သို့ ၁ လုံး၊ စစ်သုံ့ပန်း အမျိုးသမီးနှင့် ကလေးငယ်များရှိရာ အဆောင် သို့ ၁ လုံး၊ စစ်သုံ့ပန်း အမျိုးသားဆောင်သို့ ၁ လုံး အသီးသီး ကျရောက်ပေါက်ကွဲမှု ခဲ့သည်ဟု သိရှိရသည်။
ထိုသို့ စစ်သုံ့ပန်းနှင့် မိသားစုများထားရှိရာ နေရာသို့ ဗုံးကျဲချသဖြင့် ကလေးငယ်များ အပါ အဝင် လူ ၂၁ ဦးသေဆုံးခဲ့ကြောင်း၊ လူ ၃၀ ဦးမှာလည်း ဒဏ်ရာရရှိသွားကြောင်း ၊အဆိုပါ စစ်သုံ့ပန်းများနှင့် မိသားစုဝင်များမှာ မကြာမီအချိန်တွင် ပြန်လွှတ်ပေးရန် စီစဉ်ထားသူများဖြစ်ပြီး စစ်ကောင်စီ လေကြောင်းတိုက်ခိုက်မှုကြောင့် ထိခိုက်သေဆုံးမှု များပြားခဲ့ရခြင်းဖြစ်သည်ဟု သိရှိရသည်။
စစ်သုံ့ပန်းနှင့်မိသားစုများ ဒဏ်ရာရရှိသူ ၃၀ ဦးအနက်မှ အသက်အန္တရာယ်စိုးရိမ်ရသည့် ပြင်းထန်ဒဏ်ရာရထားသူ ၅ ဦးပါဝင်ပြီး အရေးပေါ်ဆေးကုသမှု ခံယူနေရကြောင်း သိရှိရသည်။
အကြမ်းဖက်စစ်တပ်က စစ်သုံ့ပန်းထားရှိသော နေရာများကို မကြာခဏဆိုသလို လေ ကြောင်း တိုက်ခိုက်မှုများ လုပ်ဆောင်ခဲ့ပြီး စစ်သုံ့ပန်းနှင့်မိသားစုဝင်များ ထိခိုက်သေဆုံးမှုများ ဖြစ်ပွားလျက်ရှိကြောင်း AA ၏ ထုတ်ပြန်ချက်များကဆိုသည်။
၂၀၂၅ ခုနှစ် ဇန်နဝါရီလ ၁၈ ရက်နေ့ကလည်း မြောက်ဦးမြို့နယ်တွင် AA မှ စစ်သုံ့ပန်းများ ထားရှိရာနေရာကို လေကြောင်းမှတစ်ဆင့် ဗုံးကျဲတိုက်ခိုက်ခဲ့သဖြင့် စစ်သုံ့ပန်းနှင့် မိသားစုဝင် ၂၈ ဦးသေဆုံးပြီး ၂၇ ဦးမှာ ဒဏ်ရာရရှိခဲ့သည်။
၂၀၂၄ ခုနှစ် စက်တင်ဘာလ ၉ ရက်နေ့တွင်လည်း မောင်တောမြို့နယ်ရှိ နယ်ခြားစောင့်တပ်စခန်း (နခခ-၂) ကို AA သိမ်းပိုက်ထားချိန် လေကြောင်းမှတစ်ဆင့် ဗုံးကျဲတိုက်ခိုက်ခဲ့၍ စစ်သုံ့ပန်း ၆၀ ကျော် သေဆုံးပြီး အများအပြားမှာ ဒဏ်ရာရရှိခဲ့သည်။
ပေါက်တောမြို့နယ်၊ ရှင်ရွာကျေးရွာအနီးက စစ်သုံးပန်းများထားရှိသည့်နေရာကို ၂၀၂၄ ခုနှစ်၊ စက်တင်ဘာလ ၈ ရက်နေ့တွင် စစ်လေယာဉ်ဖြင့် ဗုံးကျဲတိုက်ခိုက်သဖြင့် စစ်သုံ့ပန်း ၁၇ ဦး သေဆုံးပြီး ၁၀ ဦးထက်မနည်း ဒဏ်ရာရရှိခဲ့သည်။
ဓာတ်ပုံ- One Nation Newsနှင့် APM။
