ရန်ကုန်၊ ဖေဖော်ဝါရီ ၅
မကွေးတိုင်း၊ ဆောမြို့နယ်၊ ကျောက်ထုတိုက်နယ်အတွင်းရှိ မိအယ်ကျေးရွာကို စစ်တပ်က လေယာဉ်ဖြင့် ဗုံးကျဲ တိုက်ခိုက်ခဲ့ရာ အသက် ၁၃ နှစ်အောက် ကျောင်းသူ ၂ ဦးအပါအဝင် ပြည်သူ ၅ ဦး သေဆုံးခဲ့ကြောင်း ယောအလင်းတန်းမှ တာဝန်ရှိသူတစ်ဦးက ရန်ကုန်ခေတ်သစ်သတင်း ဌာနထံသို့ ပြောကြား သည်။
ယနေ့ ဖေဖော်ဝါရီလ ၅ ရက်နေ့ ညနေ ၄ နာရီ ၅၀ မိနစ်နှင့် ၄ နာရီ ၅၃ မိနစ်ခန့်တွင် ဆောမြို့နယ် ၊ ကျောက်ထုတိုက်နယ်အတွင်းရှိ မိအယ်ကျေးရွာကို တိုက်ပွဲဖြစ်ပွားခြင်းမရှိဘဲ မကွေးလေတပ်မှ တက်လာသော ဂျက်ဖိုက်တာ ၁ စီးက ဗုံး ၂ လံးကျဲချတိုက်ခိုက်ခဲ့ ကြောင်း၊ ထို ဗုံးကျဲ တိုက်ခိုက်မှုကြောင့် အသက် ၁၃ နှစ်အောက် ကျောင်းသူ ၂ ဦး အပါအဝင် ပြည် သူ ၅ ဦး သေဆုံးပြီး နေအိမ် ၄ လုံးထိခိုက်ပျက်စီး ဆုံးရှုံးခဲ့ကြောင်း သိရသည်။
စစ်တပ်၏ လေကြောင်း တိုက်ခိုက်မှုအတွင်း အသက် ၁၀ နှစ်အောက် ၃ တန်း ကျောင်းသူ ၁ ဦး၊ အသက် ၁၃ နှစ်အရွယ် ၈ တန်းကျောင်းသူ ၁ ဦး၊ အသက် ၄၀ အရွယ်၊ အသက် ၅၃ နှစ်အရွယ်နှင့် အသက် ၇၀ အရွယ် အမျိုးသမီးတို့ သေဆုံးခဲ့ပြီး အသက် ၅၉ နှစ်နှင့် အသက် ၅၇ နှစ် အရွယ် အမျိုးသမီး ၂ ဦးလည်း ထိခိုက်ဒဏ်ရာရရှိခဲ့ကြောင်း သိရသည်။
“ကျောက်ထုမြို့ရဲ့ မြောက်ဘက် ၂ မိုင်ခန့်အကွာမှာရှိတဲ့ မိအယ်ကျေးရွာထဲကို ကျဲချတာပါ။ ပေါင် ၅၀၀ ဗုံး ၂ လုံး ကျဲသွားတာဖြစ်ပါတယ်။ သေတဲ့ အထဲမှာ သားအမိ ၂ တွဲ ၄ ဦးနဲ့ ကျန်တဲ့ အမျိုးသမီး တစ်ဦးပဲ။ နေအိမ်ကလည်း မီးကျွမ်းသွားတယ်။ မကျဲခင် ၁ နာရီလောက်ကြိုပြီး ကျောက်ထုတပ် ကနေ ကင်းထောက် ဒရုန်းတွေနဲ့ ကင်းထောက်သေးတာ။ တိုက်ပွဲဖြစ်တာလည်းမရှိပဲနဲ့အကြောင်း မဲ့ဗုံးကျဲသွား တာပါ။” ဟု ယောအလင်းတန်းမှ တာဝန်ရှိသူ တစ်ဦးက ရန်ကုန်ခေတ်သစ်သတင်း ဌာန ထံသို့ ပြောကြားသည်။
ဆောမြို့နယ်၊ ကျောက်ထုတိုက်နယ်အတွင်းရှိ ကျေးရွာများကို ကျောက်ထုအမြောက်တပ်ထဲမှ မကြာ ခဏ ဒရုန်းများဖြင့် ကင်းထောက်ပြီး လေယာဉ်ဖြင့် ဗုံးကျဲတိုက်ခိုက်မှုများ မကြာခဏလုပ်ဆောင်နေ သောကြောင့် မိဘပြည်သူများအနေဖြင့် လေယာဉ်သံကြားပါက စူးစမ်းခြင်းမပြုပဲ ပုန်းခိုကျင်းများ အ တွင်း ဝင်ရောက်ပုန်းခိုနေထိုင်ပေးကြပါရန် ယောအလင်းတန်းက တိုက်တွန်းထားသည်။
ဓာတ်ပုံ – စစ်တပ်က လေယာဉ်ဖြင့် ဗုံးကျဲတိုက်ခိုက်မှုကြောင့် ပျက်စီးသွားသော မိအယ်ကျေးရွာမှ နေအိမ်များ။
