ရန်ကုန်၊ ဇူလိုင် ၂၃
စစ်ကိုင်းတိုင်း၊ ကလေးမြို့လယ်ရှိ ဒေသကွပ်ကဲရေးဌာနချုပ်အနီး အကြမ်းဖက်စစ်ကား ၁ စီး မိုင်းခွဲခံရပြီး စစ်သား ၅ ဦး သေဆုံးကြောင်း သတင်းရရှိသည်။
ကလေးမြို့ ဒကစ အတွင်းမှ ထွက်လာသော စစ်ကားကို ယနေ့ ဇူလိုင်လ ၂၃ ရက် နံနက် ၇ နာရီဝန်းကျင်တွင် Operation MoMo အဖွဲ့က မိုင်း ၂ ကြိမ် ဖောက် ခွဲတိုက်ခိုက်ရာ ကားပေါ်ပါ စစ်သား ၅ ဦးပွဲချင်းပြီးသေဆုံးခဲ့ပြီး ဒဏ်ရာရသူများလည်း ရှိကြောင်း သိရှိရသည်။
အဆိုပါ စစ်ကားသည် မိုင်း ၂ ကြိမ်ဖောက်ခွဲတိုက်ခိုက်ခံရပြီးနောက် သစ်ပင်ကိုဝင်တိုက်မိပြီး အဆိုပါကားကို ဒကစအတွင်းသို့ ပြန်လည် တွန်းယူသွားကြောင်း ဒေသခံများက ဆိုသည်။
မိုင်းခွဲတိုက်ခိုက်ခံရပြီးနောက် အကြမ်းဖက်စစ်တပ်သည် အိမ်စီးကားများဖြင့် ကလေးမြို့တွင်းလှည့်ပတ်ကာ ရမ်းသန်းပစ်ခတ်ခဲ့ကြောင်း သိရှိရသည်။
အလားတူ ပဲခူးတိုင်း၊ နတ်တလင်းမြို့နယ်အရှေ့ဘက်ရှိ ကြက်မနက်ကျေးရွာတွင် စခန်းချတပ်စွဲထားသော အကြမ်းဖက်စစ်ကောင်စီတပ်ဖွဲ့ကို Bago Region PDF တပ်ရင်း ၃၈၀၁၊ တပ်ခွဲ ၂ (Phoenix DF နတ်တလင်း) က ယနေ့ ဇူလိုင်လ ၂၃ ရက် နံနက် ၁ နာရီခန့်တွင် ဝင်ရောက်ပစ်ခတ်တိုက်ခိုက်ရာ စစ်သား ၃ ဦးသေဆုံးပြီး ၂ ဦး ဒဏ်ရာရကြောင်း၊ မိနစ် ၂၀ ခန့်တိုက်ပွဲဖြစ်ပွားခဲ့ပြီးနောက် PDF များ အထိအခိုက်မရှိ ဆုတ်ခွာနိုင်ခဲ့ကြောင်း Phoenix D-F နတ်တလင်းက သတင်းထုတ်ပြန်သည်။
ပြည်သူများအနေဖြင့် အကြမ်းဖက်စစ်တပ် တပ်ဖွဲ့ဝင်များနှင့် အနီးကပ်နေထိုင်ခြင်း၊ ၎င်းတို့သွားရာ စစ်ကြောင်းများနှင့် အတူတကွ သွားလာခြင်း မပြုလုပ်ကြရန် Phoenix D-F နတ်တလင်း က မေတ္တာရပ်ခံထားသည်။
ဓာတ်ပုံ- အကြမ်းဖက်စစ်ကောင်စီတပ်ဖွဲ့ဝင်များ။
