ရန်ကုန်၊ ဩဂုတ် ၁၅
ကရင်နီပြည်နယ်တွင် အကြမ်းဖက်စစ်ကောင်စီ တပ်ဖွဲ့နှင့် ကရင်နီပူးပေါင်းတပ်ဖွဲ့ကြား ဩဂုတ်လ ဒုတိယ တစ်ပတ်အတွင်း တိုက်ပွဲများတွင် စစ်သား ၁၉ ဦး သေဆုံးကြောင်း၊ ကရင်နီပူးပေါင်းတပ်ဖွဲ့ဘက်မှ ၁ ဦး ကျဆုံးကြောင်း ကရင်နီအမျိုးသားများကာကွယ်ရေးတပ် KNDF က သတင်းထုတ်ပြန်သည်။
ဩဂုတ်လ ၈ ရက်နှင့် ၉ ရက်တွင် ရှားတောမြို့နယ်အတွင်း၌ ကရင်နီတပ်မတော် KA၊ KNDF ပူးပေါင်းတပ်နှင့် အကြမ်းဖက်စစ်တပ်ကြား တိုက်ပွဲ ၄ ကြိမ်ဖြစ်ပွားခဲ့ပြီး စစ်သား ၈ ဦးသေဆုံးကြောင်း KNDF က ထုတ်ပြန်သည်။
ဩဂုတ်လ ၉ ရက်တွင် ဖရူဆိုမြို့နယ်၌ အကြမ်းဖက်စစ်ကောင်စီ ခလရ ၅၃၁ တပ်နှင့် ကရင်နီပူးပေါင်းတပ်ဖွဲ့ကြား ၃ နာရီဝန်းကျင်ခန့် တိုက်ပွဲဖြစ်ပွားခဲ့ပြီး ကရင်နီ ရဲဘော် ၁ ဦး ကျဆုံးကြောင်း သိရှိရသည်။
ဒီးမော့ဆိုမြို့နယ်၊ စံပြ ၆ မိုင်ကျေးရွာ၌ ဩဂုတ်လ ၉ ရက်နေ့တွင် အကြမ်းဖက်စစ်တပ်နှင့် KNDF တပ်ရင်း ၉ ကြား တိုက်ပွဲဖြစ်ပွားပြီး စစ်သား ၅ ဦးသေဆုံးကြောင်း၊ ညနေပိုင်းတွင် ဒီးမော့ဆို မြို့မရဲစခန်းကို KNDF တပ်ဖွဲ့က ဝင်ရောက်တိုက်ခိုက်ရာ စစ်သား ထိခိုက်မှုရှိကြောင်း၊ ဩဂုတ်လ ၁၂ ရက်နေ့တွင် ရူဖယ်ခူရပ်ကွက်၊ နှစ်ခြင်းခရစ်ယာန်ဘုရားကျောင်းအနီးတွင် တိုက်ပွဲဖြစ်ပွားပြီး စစ်သား ၁ ဦးသေဆုံးခဲ့ကြောင်း သိရှိရသည်။
အကြမ်းဖက်စစ်ကောင်စီတပ်သည် တိုက်ပွဲဖြစ်ပွားရာအနီးဝန်းကျင်ရှိ အပြစ်မဲ့ရွာသားများကို လူသားဒိုင်းပြုလုပ်သလို တိုက်ပွဲဖြစ်ပွားခြင်းမရှိသည့် လွိုင်လင်လေးမြို့နယ်၊ ဒေါပါပကျေးရွာကို လေကြောင်း တိုက်ခိုက်မှုကြောင့် အရပ်သား ၁ ဦးသေဆုံးပြီး ၂ ဦး ဒဏ်ရာရကြောင်း KNDF က သတင်းထုတ်ပြန်သည်။
ဓါတ်ပုံ – KNDF တပ်ဖွဲ့ဝင်များ
