ရန်ကုန်၊ အောက်တိုဘာ ၃၁
ပြည်သူဘက်ကို သေနတ်ပြောင်း ပြန်လှည့်နေသည့် အကြမ်းဖက်စစ်တပ်ကို မုန်းတီးရွံရှာသည့်အတွက် CDM ပြုလာလာခြင်းဖြစ်ကြောင်း ခမရ ၃၅၈ တပ်ရင်းမှ တပ်သား ချစ်ဝင်းဇော်က ပြောဆိုသည်။
ဘုတ်ပြင်းအခြေစိုက် ခမရ ၃၅၈ တပ်ရင်းသည် ကရင်ပြည်နယ်၊ ကြာအင်းဆိပ်ကြီးမြို့နယ်တွင် စစ်ကြောင်းထိုးနေခြင်းဖြစ်ပြီး အဆိုပါ တပ်ရင်းမှ တပ်သား ၃ ဦးသည် KNLA ပူးပေါင်းတပ် နဂါးနီစစ်ကြောင်းထံ အလင်းဝင်လာခဲ့ခြင်းဖြစ်သည်။
“ပြည်သူကို ကာကွယ်ဖို့ ဖွဲ့တဲ့အဖွဲ့ဟာ ပြည်သူဘက်ကို ပြန်လှည့်နေတဲ့အတွက် တော်တော်မုန်းတီးပါတယ်၊ စိတ်မပါတော့ဘူး။” ဟု တပ်သား ချစ်ဝင်းဇော်က ပြောဆိုသည်။
တပ်သား ချစ်ဝင်းဇော်သည် ၂၀၂၁ ခုနှစ်တွင် ဘားအံမြို့သို့ လာရောက်စဉ် ညမထွက်ရအမိန့်ဖြင့် ဖမ်းဆီးခံရပြီး အတင်းအဓမ္မ စစ်သားအဖြစ် စုဆောင်းခံရခြင်းဖြစ်ကာ စစ်သက် ၁ နှစ်ကျော်ခန့်သာ ရှိသေးကြောင်း သိရှိရသည်။
“ပြင်ဆင်ပါ၊ အမှန်တရားဘက်ကို လိုက်ပါ၊ စစ်အာဏာရှင်ကို အားမပေးပါနဲ့” ဟု ချစ်ဝင်းဇော်က စစ်ကောင်စီတပ်အတွင်း၌ ကျန်နေသော စစ်သားများကို အသိပေး ပြောဆိုသည်။
ခမရ ၃၅၈ မှ တပ်သား ၃ ဦး၊ ခမရ ၄၃၂ မှ တစ်ဦး၊ ခလရ ၂၈၄ မှ တစ်ဦးသည် ကြာအင်းဆိပ်ကြီးမြို့နယ်တွင် စစ်ကြောင်းထိုးနေစဉ် CDM ပြုလုပ်လာခဲ့ခြင်းလည်းဖြစ်သည်။
ကြာအင်းဆိပ်ကြီးမြို့နယ်သည် KNU ကော်သူးလေအုပ်ချုပ်နယ်မြေ၊ တပ်မဟာ ၆ ဒူးပလာယာခရိုင်အတွင်း၌ တည်ရှိသည်။
အလားတူ စစ်ကောင်စီ၏ ကျိုက်ဒုံဗျူဟာမှ တပ်သား ၄ ဦးလည်း လွန်ခဲ့သည့်လတွင် အလင်ဝင်လာကြောင်း နဂါးနီစစ်ကြောင်းထံမှ သိရှိရသည်။
နဂါးနီစစ်ကြောင်းသို့ အလင်းဝင်လာသည့် တပ်သားအများစုသည် အတင်း အဓမ္မစစ်သား ခံခဲ့ရသူများပြားကြောင်းနှင့် စစ်သက်နည်းသူများ ဖြစ်ကြောင်း သိရှိရသည်။
