မြန်မာတစ်နိုင်ငံလုံးရှိ လျှပ်စစ်မီတာများကို စစ်တပ်ပိုင် ဦးပိုင်ကုမ္ပဏီက ထုတ်လုပ်သော EVER Meter လျှပ်စစ်မီတာများဖြင့် အစားထိုးရန် မင်းအောင်လှိုင်က အမိန့်ထုတ်ပြန်လိုက်ပြီး ဓာတ်အားပျောက်ဆုံးမှုနှင့်ခိုးယူမှု ကာကွယ်ရန်ဟု အကြောင်းပြထားကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။

ပဲခူးတိုင်း၊ အင်းတကော်စက်မှုဇုန်တွင် စစ်တပ်၏ ဦးပိုင်ကုမ္ပဏီက EVER Meter စက်ရုံ က Digital စနစ်သုံး Ever တံဆိပ် လျှပ်စစ်မီတာ သန်းချီ ထုတ်လုပ်ထားကြောင်း၊ အဆိုပါ မီတာများကို ပြည်သူများ၏ နေအိမ်များနှင့်စက်ရုံအလုပ်ရုံများအားလုံးတွင် လဲလှယ်တပ်ဆင်သွားမည်ဖြစ်ကြောင်း၊ လဲလှယ်မည့် လျှပ်စစ်မီတာအလုံးရေမှာ သန်းပေါင်းများစွာရှိပြီး စစ်တပ်ပိုင်ဦးပိုင်ကုမ္ပဏီအနေဖြင့် ငွေကျပ်ဘီလီယံပေါင်းများစွာတန်သော နိုင်ငံတော်စီမံကိန်း တင်ဒါကို ရရှိသွားခြင်းဖြစ်ကြောင်း သိရှိရသည်။

“တစ်နိုင်ငံလုံးမှာသုံးနေတဲ့ လျှပ်စစ်မီတာတွေကို ဦးပိုင်က ထုတ်တဲ့ EVER မီတာတွေနဲ့ လဲလှယ်ရမယ်။ အဲဒါ အဆင့်လိုက် အပိုင်းလိုက် မြို့နယ်အလိုက် ၅ နှစ်အတွင်း လုပ်သွားမှာပါ။ ဦးပိုင်ထုတ်တဲ့ မီတာတွေက Digital Meterတွေပါ။ မီတာတွေမှာ AMI စနစ်ပါတယ်။ Automatic Billing System ၊ automatic Reading System တွေ ပါဝင်တယ်။ အဲဒီမီတာတွေတပ်ထားရင် မီတာခများကောက်ခံတဲ့နေရာမှာ Control Center ကတစ်ဆင့် ထိန်းချုပ်ဆောင်ရွက်လို့ရတယ်။ လျှပ်စစ်ဓာတ်အားပျောက်ဆုံးမှုတွေ ကာကွယ်လို့ရတယ်။ AMI စနစ်မီတာအသုံးပြုရင် လျှပ်စစ်မီတာခတွေ ကောက်ခံရာမှာ Mobile Banking စနစ်နဲ့ အလွယ်တကူချိတ်ဆက်လို့ရတယ်လို့ စစ်တပ်က ပရိုမိုးရှင်း ဆင်းတယ်” ဟု နေပြည်တော်စစ်ဘက်သတင်းရင်းမြစ်က ပြောဆိုသည်။

လက်ရှိတွင် မင်းအောင်လှိုင်က ဓာတ်အားပျောက်ဆုံးမှုနှင့် နည်းပညာကြောင့် မဟုတ်သည့် ဓာတ်အားပျောက်ဆုံးမှု(ဓာတ်အားခိုးယူသုံးစွဲမှု)များ လျော့နည်းပပျောက်သွားစေရေးအတွက်ဟု အကြောင်းပြကာ တစ်နိုင်ငံလုံးရှိ လျှပ်စစ်မီတာများကို ဦးပိုင်က ထုတ်လုပ်သော လျှပ်စစ်မီတာများဖြင့် အစားထိုး လဲလှယ်ရန် အစီအမံများချမှတ်ဆောင်ရွက်နေခြင်းဖြစ်သည်။

ထို့ပြင် ဦးပိုင်က ထုတ်လုပ်သော လျှပ်စစ်မီတာများမှာ Smart Meter စနစ်သို့ ကူးပြောင်းနိုင်ပြီး ပြည်သူများအနေဖြင့် ကိုယ်တိုင် မီတာဖတ်ရှု၍ မီတာခ ပေးဆောင်နိုင်မည့်အပြင် Control Centre များမှ စောင့်ကြည့်စစ်ဆေးနိုင်သည့် Digital စနစ်တစ်ခု တည်ဆောက်ခြင်းကိုလည်း တစ်ပြိုင်တည်း အကောင် အထည်ဖော်ဆောင်ရွက်နိုင်သည်ဟု စည်းရုံးရေး ဆင်းနေကြောင်း သိရှိရသည်။

NLD အစိုးရလက်ထက်တွင် စစ်တပ် ဦးပိုင်ကုမ္ပဏီက ထုတ်လုပ်သော EVER လျှပ်စစ်မီတာများမှာ အရည်အသွေး မကောင်းမွန်ခြင်းနှင့် စျေးနှုန်းကြီးမြင့်ခြင်းတို့ကြောင့် တစ်နိုင်ငံလုံး Digital လျှပ်စစ်မီတာများ အစားထိုးရေး စီမံချက်တွင် အသုံးမပြုရန် NLD လျှပ်စစ်ဝန်ကြီး ဦးဝင်းခိုင်က ဆုံးဖြတ်ခဲ့ကာ ဦးပိုင်ကုမ္ပဏီ၏ အဆိုပြု တင်ဒါကို ပယ်ချခဲ့ဖူးသည်။

ယင်းကိစ္စကြောင့် NLD လျှပ်စစ်ဝန်ကြီး ဦးဝင်းခိုင်ကို မင်းအောင်လှိုင်က အငြိုးထားကာ စစ်အာဏာသိမ်းချိန် ထောင်ဒဏ် နှစ်ရှည် ချမှတ်ခဲ့ပြီး ၂၀၂၄ ခုနှစ် အောက်တိုဘာလအတွင်း မန္တလေး အိုးဘိုအကျဉ်း ထောင်အတွင်း လုံလောက်သော ကျန်းမာရေး စောင့်ရှောက်မှု မရရှိ၍ NLD လျှပ်စစ်ဝန်ကြီး ဦးဝင်းခိုင် ကွယ်လွန်ခဲ့ရသည်။

ဓာတ်ပုံ- စစ်တပ်လက်အောက်ခံ ဦးပိုင်ကုမ္ပဏီက ထုတ်လုပ်သော လျှပ်စစ်မီတာများကို မင်းအောင်လှိုင်က သွားရောက် စစ်ဆေးနေစဉ်။ (ပုံအဟောင်းဖြစ်ပါသည်။)

The post တစ်နိုင်ငံလုံးရှိ လျှပ်စစ်မီတာများကို စစ်တပ်ပိုင် ဦးပိုင်ကုမ္ပဏီက ထုတ်လုပ်သော EVER Meter လျှပ် စစ်မီတာများဖြင့် အစားထိုးရန် မင်းအောင်လှိုင်က အမိန့်ထုတ်၊ လျှပ်စစ်မီတာအလုံးရေ သန်းချီအတွက် ငွေကျပ်ဘီလီယံပေါင်းများစွာ နိုင်ငံတော်က ဦးပိုင်ကုမ္ပဏီထံသို့ ပေးရမည် appeared first on Khit Thit Media.

အကြမ်းဖက်စစ်ခေါင်းဆောင် မင်းအောင်လှိုင်နှင့် တွေ့ဆုံဆွေးနွေးမှုများအတွင်း နိုင်ငံတကာခေါင်း ဆောင်များနှင့် သံတမန်များက ဖမ်းဆီးခံထားရသော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အကြောင်း ထုတ်ဖော်ပြောဆိုသောအခါ မင်းအောင်လှိုင်က ဒေါသတကြီး တုံ့ပြန်လေ့ရှိကြောင်း အဆိုပါဆွေးနွေးမှုများအကြောင်း သိရှိထားသည့် နိုင်ငံတကာသံတမန်များကို ကိုးကား၍ The Economist သတင်းဌာနက ဖော်ပြသည်။

အသက် ၈၁ နှစ်ရှိပြီဖြစ်သော ဒေါ်အောင်ဆန်းစုကြည်ကို ၂၀၂၂ ခုနှစ်ကုန်ပိုင်း စစ်ကောင်စီ၏ တံခါးပိတ်တရားစီရင်မှု ပြီးဆုံးချိန်နောက်ပိုင်း လူမြင်ကွင်းတွင် တွေ့ရှိရခြင်းမရှိတော့ဘဲ သူမ၏ ရှေ့နေများကိုပင် တွေ့ဆုံခွင့်မပေးသဖြင့် လက်ရှိအခြေအနေနှင့် အသက်ရှင်နေမှုအပေါ် စိုးရိမ်မှုများ မြင့်တက်နေခြင်းဖြစ်သည်။

မကြာသေးမီက အိန္ဒိယဝန်ကြီးချုပ် နရင်ဒရာမိုဒီသည် နယူးဒေလီမြို့တွင် မင်းအောင်လှိုင်နှင့် တွေ့ဆုံစဉ် ဒေါ်အောင်ဆန်းစုကြည်၏ အခြေအနေကို ထုတ်ဖော်ပြောဆိုခဲ့ကြောင်း၊ အလားတူ မေလအတွင်း ကုလသမဂ္ဂ မြန်မာနိုင်ငံဆိုင်ရာ အထူးသံတမန် ဂျူလီဘစ်ရှော့ကလည်း မင်းအောင်လှိုင်နှင့် တွေ့ဆုံရာတွင် ဒေါ်အောင်ဆန်းစုကြည်ကို တွေ့ဆုံခွင့်ပေးရန် တောင်းဆိုခဲ့ကြောင်း သိရှိရသည်။

ယင်းတွေ့ဆုံဆွေးနွေးမှု ၂ ခု၏ အခြေအနေကို သိရှိထားသည့် နိုင်ငံတကာသံတမန်များ၏ ပြောဆိုချက်အရ ဒေါ်အောင်ဆန်းစုကြည်၏ နာမည်နှင့် သူမ၏ အခြေအနေကို ထုတ်ဖော်ပြောဆိုတိုင်း မင်းအောင်လှိုင်က ဒေါသတကြီး တုံ့ပြန်ခဲ့ကြောင်း The Economist သတင်းဌာနက ဖော်ပြသည်။

မင်းအောင်လှိုင်၏ ယင်းသို့ ဒေါသတကြီး တုံ့ပြန်မှုများကြောင့် ဒေါ်အောင်ဆန်းစုကြည် အသက်ရှင်နေကြောင်း အထောက်အထား မပြသနိုင်သည့်အပေါ် သံတမန်အချို့က ပိုမိုစိုးရိမ်လာကြပြီး ဒေါ်အောင်ဆန်းစုကြည် သေဆုံးသွားပြီးဖြစ်နိုင်ခြင်း သို့မဟုတ် ကျန်းမာရေးအခြေအနေ အလွန်ဆိုးရွားနေခြင်း ရှိ၊ မရှိ မေးခွန်းထုတ်နေကြသည်။

ဒေါ်အောင်ဆန်းစုကြည်၏ သားငယ် ကင်မ်အဲရစ်ကလည်း မကြာသေးမီ လပိုင်းများအတွင်း နိုင်ငံ တကာသို့ သွားရောက်ကာ သမ္မတများနှင့် ဝန်ကြီးများကို တွေ့ဆုံပြီး စစ်ကောင်စီထံမှ မိခင်ဖြစ်သူ အသက်ရှင်နေကြောင်း အထောက်အထား “Proof of Life” တောင်းဆိုပေးရန် တိုက်တွန်းနေသည်။

စစ်ကောင်စီက ပြီးခဲ့သည့် ဧပြီလတွင် ဒေါ်အောင်ဆန်းစုကြည်ကို အကျဉ်းထောင်မှ နေအိမ်အကျယ် ချုပ်သို့ ပြောင်းရွှေ့ထားကြောင်း ပြောဆိုခဲ့သော်လည်း နိုင်ငံတကာသံတမန်များ၏ တွေ့ဆုံခွင့်တောင်းဆိုမှုများကို ဆက်တိုက်ငြင်းပယ်ထားသည်။ ဒေါ်အောင်ဆန်းစုကြည်၏ ကျန်းမာရေးအခြေအနေကို မေးမြန်းတိုင်း စစ်ကောင်စီတာဝန်ရှိသူများက ကျန်းမာရေးကောင်းမွန်ကြောင်းသာ ပြောဆိုပြီး အခြားအသေးစိတ်အချက်အလက်များ ထုတ်ပြန်ခြင်းမရှိပေ။

ထို့ပြင် စစ်ကောင်စီက ဒေါ်အောင်ဆန်းစုကြည် နေအိမ်အကျယ်ချုပ်သို့ ပြောင်းရွှေ့ခံရကြောင်းဆိုကာ သူမက ရဲအရာရှိနှင့် စစ်အရာရှိတို့ကို အမည်မသိ အဆောက်အအုံတစ်ခုအတွင်း တွေ့ဆုံစကားပြောနေသည့် ဓာတ်ပုံတစ်ပုံ ထုတ်ပြန်ခဲ့သော်လည်း အဆိုပါဓာတ်ပုံကို မည်သည့်အချိန်က ရိုက်ကူးထားသည်ဆိုသည့် အထောက်အထားမရှိကြောင်း သိရသည်။

ကင်မ်အဲရစ်ကလည်း စစ်ကောင်စီထုတ်ပြန်သော ဓာတ်ပုံ၏ စစ်မှန်မှုအပေါ် သံသယရှိကြောင်းနှင့် ဒေါ်အောင်ဆန်းစုကြည်ကို အမှန်တကယ် နေအိမ်အကျယ်ချုပ်ဖြင့် ထိန်းသိမ်းထားပါက ရန်ကုန်ရှိ သူမ၏ နေအိမ်တွင် မဟုတ်ကြောင်း ပြောဆိုထားသည်။ နေပြည်တော်ရှိ ဒေါ်အောင်ဆန်းစုကြည်၏ နေအိမ်မှာလည်း ဖြိုဖျက်ခံထားရကြောင်း ၎င်းက ဆိုသည်။

အာဆီယံနိုင်ငံခြားရေးဝန်ကြီးများကလည်း ဒေါ်အောင်ဆန်းစုကြည်၏ ကျန်းမာရေးနှင့် လုံခြုံရေးအခြေအနေကို စစ်ကောင်စီထံ အကြိမ်ကြိမ် ထုတ်ဖော်မေးမြန်းခဲ့ကြပြီး ဇူလိုင်လ ၁၂ ရက်နေ့ ဘန်ကောက်မြို့တွင် ပြုလုပ်သည့် တွေ့ဆုံပွဲ၌လည်း ယင်းကိစ္စကို ထပ်မံဆွေးနွေးခဲ့ကြောင်း သိရှိရသည်။

နိုင်ငံတကာသံတမန်များက ဒေါ်အောင်ဆန်းစုကြည်ကို လွှတ်ပေးခြင်း သို့မဟုတ် အနည်းဆုံး လွတ် လပ်သည့် နိုင်ငံတကာကိုယ်စားလှယ်များအား တွေ့ဆုံခွင့်ပေး၍ သူမ၏ လက်ရှိအခြေအနေကို အတည်ပြုခွင့်ပြုခြင်းက စစ်ကောင်စီနှင့် အာဆီယံ၊ ကုလသမဂ္ဂတို့အကြား တင်းမာနေသည့် ဆက် ဆံရေးကို ပြေလည်စေရန် အထောက်အကူပြုနိုင်ကြောင်း သုံးသပ်ထားသည်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ၏ အချက်အလက်များအရ လက် ရှိ မြန်မာနိုင်ငံတွင် စစ်တပ်က ဖမ်းဆီးထားသည့် နိုင်ငံရေးအကျဉ်းသား ၁၄,၅၁၇ ဦးရှိနေပြီး ယခုနှစ်အတွင်း နိုင်ငံရေးအကျဉ်းသား ၆၀ ကျော် အကျဉ်းထောင်အတွင်း သေဆုံးခဲ့ကြောင်း သိရှိရသည်။

(The Economist ၏ Is Aung San Suu Kyi dead? တွင်ပါဝင်သော သတင်းအချက်အလက်ကို ပြန်လည် ကိုးကားဖော်ပြထားပါသည်။)

The post ဒေါ်အောင်ဆန်းစုကြည် အကြောင်း ထုတ်ဖော်ပြောဆိုတိုင်း မင်းအောင်လှိုင်က ဒေါသတကြီးတုံ့ပြန်ဟု သံတမန်များပြော appeared first on Khit Thit Media.

ရန်ကုန်မြို့တွင် ဆယ်ကျော်သက် လူငယ်စုံတွဲဖြစ်သည့် ဥက္ကာ ခေါ် အောင်သူရိန်ထွန်းနှင့် မမေသက် သက်မွန်တို့ လူငယ် ၂ ဦးသည် ကားဖြင့် နေအိမ်မှ ထွက်သွားပြီးနောက် ယနေ့အချိန်အထိ ၁ လနီးပါးကြာ အဆက်အသွယ် လုံး၀ပြတ်တောက်ကာ ပျောက်ဆုံးနေသဖြင့် မိသားစုဝင်များက အရေးပေါ်ရှာဖွေနေကြောင်း ဥက္ကာ၏ ဆွေမျိုးတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇွန်လ ၁၆ ရက်နေ့ ညနေ ၆ နာရီ ၃၀ မိနစ်ဝန်းကျင်တွင် ဥက္ကာ ခေါ် အောင်သူရိန်ထွန်းသည် နေအိမ်မှ Nissan Moco အမျိုးအစား မော်တော်ယာဉ်ဖြင့် အပြင်သို့ ထွက်ခွာသွားခဲ့ပြီး မမေသက်သက်မွန်နှင့်အတူ ရှိနေခဲ့ကြောင်း၊ နှစ်ဖက်မိသားစုများမှာ သိကျွမ်းကြပြီး သမီးရည်စားအဖြစ်လည်း သဘောတူထားကြောင်း၊ ယင်းနောက် လူငယ်စုံတွဲ ၂ ဦးစလုံးမှာ ကားဖြင့်သွားနေစဉ်အတွင်း ပျောက်ဆုံးသွားခဲ့ခြင်းဖြစ်ကြောင်း သိရှိရသည်။

ယင်းနောက် လူငယ်စုံတွဲ ၂ ဦးစလုံးမှာ နေအိမ်သို့ ပြန်လည်ရောက်ရှိလာခြင်းမရှိတော့ဘဲ ဖုန်းများလည်း ပိတ်ထားကာ ဇွန်လ ၁၆ ရက်နေ့မှ ယနေ့ ဇူလိုင်လ ၁၄ ရက်နေ့အထိ အဆက်အသွယ် လုံး၀မရရှိသေးကြောင်း သိရှိရသည်။

မိသားစုဝင်များက ၎င်းတို့ သွားလာလေ့ရှိသော နေရာများ၊ သူငယ်ချင်းနှင့် မိတ်ဆွေများထံ အပူတပြင်း လိုက်လံစုံစမ်းမေးမြန်းခဲ့သော်လည်း လူငယ် ၂ ဦးနှင့် မော်တော်ယာဉ်၏ သတင်းအစအနကိုပါ ယနေ့အချိန်အထိ မရရှိသေးကြောင်း ဆိုသည်။

လူငယ် ၂ ဦးမှာ ချစ်သူစုံတွဲဖြစ်သော်လည်း နှစ်ဖက်မိသားစုက သဘောတူထားပြီး တစ်ဦး၏နေအိမ်သို့ တစ်ဦး ပုံမှန်ဝင်ထွက်သွားလာနေကြသူများဖြစ်သဖြင့် ခိုးရာလိုက်ပြေးရန် အကြောင်းမရှိကြောင်း မိသားစုဘက်က ရှင်းလင်းထားသည်။

“ယနေ့အချိန်အထိ မတွေ့သေးပါဘူး။ ကောင်မလေးနဲ့အတူ ပျောက်သွားတာပါ။ ခိုးရာလိုက်ပြေးရမယ့် အခြေအနေလည်း မဟုတ်ပါဘူး။ နှစ်ဦးနှစ်ဖက်လုံးရဲ့ အိမ်တွေကို ဝင်ထွက်နေကြပြီး မိသားစုတွေကလည်း သဘောတူထားပါတယ်။ ပျောက်တဲ့နေ့ကတည်းက အခုချိန်အထိ အဆက်အသွယ်မရလို့ပါ။ ရက်လည်း အတော်ကြာနေပါပြီ။ ကားရော လူရော အခုချိန်အထိ မတွေ့သေးပါဘူး။ ဝိုင်းဝန်းကူညီပေးကြပါဦး” ဟု မိသားစုဝင်တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

၁ လကျော်ကြာ ပျောက်ဆုံးနေသော ဥက္ကာ ခေါ် အောင်သူရိန်ထွန်း မောင်းနှင်သွားသော မော်တော်ယာဉ်မှာ Nissan Moco အမျိုးအစားဖြစ်ပြီး ယာဉ်အမှတ် YGN-22 9H/8258 ဖြစ်ကြောင်း သိရှိရသည်။

အဆိုပါ လူငယ်စုံတွဲ ၂ ဦးနှင့် မော်တော်ယာဉ်ကို မြင်တွေ့ခဲ့သူများ သို့မဟုတ် သတင်းအစအန သိရှိသူများအနေဖြင့် မိသားစုထံ အမြန်ဆုံး ဆက်သွယ်အကြောင်းကြားပေးရန် မေတ္တာရပ်ခံထားပြီး လူငယ် ၂ ဦး ဘေးကင်းစွာ ပြန်လည်တွေ့ရှိရေးအတွက် ပြည်သူများ ဝိုင်းဝန်းကူညီရှာဖွေပေးကြရန် မိသားစုက အရေးပေါ် အကူအညီတောင်းခံထားသည်။

တစ်ချိန်တည်းတွင် ရန်ကုန်မြို့အတွင်း လူငယ်များကို ကားများဖြင့် လိုက်လံဖမ်းဆီးကာ မိသားစုဝင်များထံမှ ငွေညှစ်တောင်းခံပြီး ငွေမပေးနိုင်ပါက စစ်မှုထမ်းအဖြစ် စစ်တပ်ထံ ပို့ဆောင်ရောင်းစားသည့် အုပ်စုများ ပေါ်ပေါက်နေကြောင်း ရန်ကုန်မြို့ခံများက သတိပေးပြောဆိုကြသည်။

ဇူလိုင်လ ၁၂ ရက်နေ့တွင် လူငယ် DJ BA Ro Na ဆိုသူက မြောက်ဥက္ကလာပနှင့် မင်္ဂလာဒုံမြို့နယ်ဘက်ရှိ “ဝင်း” ဘီယာဆိုင်အနီးတွင် ကား ၂ စီး၊ လူ ၁၃ ဦးခန့်ပါဝင်သော အုပ်စုတစ်ခုက ၎င်းကို ကားများဖြင့် လိုက်လံဖမ်းဆီးခဲ့ကြောင်း လူမှုကွန်ရက်မှတစ်ဆင့် အသိပေးထားသည်။

၎င်း၏ ပြောဆိုချက်အရ အဆိုပါအုပ်စုက သာမန် စစ်မှုထမ်းပေါ်တာဆွဲသည့်ပုံစံမျိုးမဟုတ်ဘဲ လူငယ်များကို ဖမ်းဆီး၍ ငွေညှစ်ရန် လိုက်လံဖမ်းဆီးသည့်အုပ်စုဖြစ်ကြောင်း၊ ၎င်းကို ကား ၂ စီးဖြင့် လိုက်လံဖမ်းဆီးခဲ့သဖြင့် ၅ မိနစ်မှ ၁၀ မိနစ်ခန့် အသက်လုပြေးခဲ့ရပြီး အနီးရှိ ကားဝပ်ရှော့တစ်ခုသို့ ဝင်ရောက်အကူအညီတောင်းခံနိုင်ခဲ့၍ လွတ်မြောက်ခဲ့ခြင်းဖြစ်ကြောင်း သိရှိရသည်။

“ညီကိုမောင်နှမတို့ရေ၊ တစ်ယောက်တည်းဖြစ်စေ၊ ၂ ယောက်တည်းဖြစ်စေ လမ်းမပေါ်မှာ လျှောက်မသွားကြပါနဲ့။ ကျွန်တော့်ကို လူနဲ့တောင်မဟုတ်ဘူး၊ ကား ၂ စီးနဲ့ လိုက်ဖမ်းတာပါ။ ကျွန်တော် အသက်လုပြီး ၅ မိနစ်ကျော်၊ ၁၀ မိနစ်လောက် ပြေးခဲ့ရတယ်။ ကားဝပ်ရှော့နားကို ပြေးပြီး အကူအညီတောင်းခဲ့ရလို့ အသက်ဘေးက လွတ်ခဲ့တာပါ။ ကိုယ့်နောက်ခံ၊ ကိုယ့် Background ဘယ်လောက်ရှိရှိ အခုလို အသက်လုပြေးနေရတဲ့အချိန် ဘယ်သူမှ လာမကယ်နိုင်ပါဘူး။ ကျွန်တော့်လို မဖြစ်ရအောင် မေတ္တာစေတနာနဲ့ ပြောပြတာပါ” ဟု DJ BA Ro Na ဆိုသူက လူမှုကွန်ရက်မှတစ်ဆင့် သတိပေးထားသည်။

အဆိုပါဖြစ်စဉ်မှာ မှန်ကန်ကြောင်း Ah Gu အမည်ရှိ လူမှုကွန်ရက်အကောင့်ပိုင်ရှင်ကလည်း အတည် ပြုပြောဆိုထားသည်။

ရန်ကုန်မြို့ခံများ၏ ပြောဆိုချက်အရ ယခုဖြစ်ပွားနေသည့် လူငယ်များကို ဖမ်းဆီးမှုများမှာ သာမန် စစ်မှုထမ်းပေါ်တာဆွဲသည့် ပုံစံမျိုးမဟုတ်တော့ဘဲ ဖမ်းဆီးရမိသူ၏ မိသားစုက လိုက်လံရှာဖွေပြီး သတင်းအစအနရရှိလာချိန်တွင် ငွေကျပ် သိန်း ၁၀၀ နီးပါးအထိ ငွေညှစ်တောင်းခံမှုများ ရှိနေကြောင်း သိရှိရသည်။

“ပေါ်တာဆွဲတာမျိုး မဟုတ်တော့ပါဘူး။ လူပါသွားရင် မိသားစုက လိုက်ရှာမယ်။ သတင်းရလာရင် ငွေညှစ်မယ်။ သိန်း ၁၀၀ နီးပါးလောက်အထိ တောင်းတယ်။ ငွေမပေးနိုင်ရင် ဟိုရောက်မယ်၊ ဒီရောက်မယ်ဆိုပြီး ခြိမ်းခြောက်တယ်။ မပေးနိုင်တဲ့ မိသားစုဆိုရင် စစ်တပ်ထဲ ပို့တယ်လို့ သိရပါတယ်” ဟု ရန်ကုန်မြို့ခံတစ်ဦးက ပြောဆိုသည်။

အလားတူ ဖြစ်စဉ်များမှာ ရန်ကုန်တိုင်းအတွင်းရှိ မြို့နယ်အများအပြားတွင် ဖြစ်ပွားနေကြောင်း မြို့ခံပြည်သူများက ပြောဆိုအတည်ပြုကြပြီး လူငယ်များအနေဖြင့် ညပိုင်းနှင့် လူအသွားအလာနည်းပါးသည့် နေရာများတွင် တစ်ဦးတည်း သို့မဟုတ် လူနည်းစုဖြင့် သွားလာခြင်းမပြုဘဲ အထူးသတိထားကြရန် သတိပေးထားကြသည်။

The post ရန်ကုန်တွင် ဆယ်ကျော်သက် လူငယ်စုံတွဲ ၂ ဦး ကားဖြင့် နေအိမ်မှ ထွက်ခွာသွားပြီး ၁ လနီးပါးကြာသည်အထိ အဆက်အသွယ်ပြတ်တောက် ပျောက်ဆုံးနေ၍ မိသားစုက အရေးပေါ်ရှာဖွေနေ၊ လူငယ်များကို လိုက်လံဖမ်းဆီး ငွေညှစ်ပြီး ငွေမပေးနိုင်ပါက စစ်တပ်ထံ ရောင်းစားသည့်အုပ်စုများ ပေါ်ပေါက်နေဟု သတိပေး appeared first on Khit Thit Media.

မြန်မာနိုင်ငံတွင် ဖြစ်ပွားနေသော ပြည်တွင်းစစ်ကို အရှိန်လျှော့ချ၍ နိုင်ငံရေးဆွေးနွေးပွဲများ ပေါ်ပေါက်လာစေရေး ကြိုးပမ်းမှုအဖြစ် မြန်မာနိုင်ငံဆိုင်ရာ အာဆီယံအထူးကိုယ်စားလှယ်နှင့် ဖိလစ်ပိုင်နိုင်ငံခြားရေးဝန်ကြီး ထရီဆာ လာဇာရို၊ ထိုင်းနိုင်ငံခြားရေးဝန်ကြီး စီဟာဆက် ဖွမ်ကက်ကီယိုတို့က မြန်မာတိုင်းရင်းသားလက်နက်ကိုင်အဖွဲ့များမှ အဆင့်မြင့်ကိုယ်စားလှယ်များနှင့် ထိုင်းနိုင်ငံ၊ ပတ္တယားမြို့တွင် တံခါးပိတ် လျှို့ဝှက်တွေ့ဆုံဆွေးနွေးခဲ့ကြောင်း Bilyonaryo News Channel က သတင်းဖော်ပြသည်။

ဇူလိုင်လ ၁၃ ရက်နေ့ ပတ္တယားမြို့တွင် ပြုလုပ်ခဲ့သော အဆိုပါတွေ့ဆုံမှုသည် အာဆီယံဥက္ကဋ္ဌ၏ မြန်မာနိုင်ငံဆိုင်ရာ အထူးကိုယ်စားလှယ်အဖြစ် လာဇာရိုက မြန်မာတိုင်းရင်းသားလက်နက်ကိုင်အဖွဲ့အစည်းများမှ အဆင့်မြင့်ခေါင်းဆောင်များနှင့် ပထမဆုံးအကြိမ် လူကိုယ်တိုင် တိုက်ရိုက်တွေ့ဆုံခြင်းဖြစ်ကြောင်း သိရှိရသည်။

အဆိုပါ ဆွေးနွေးပွဲသို့ ထိုင်းဒုတိယဝန်ကြီးချုပ်အဖြစ်လည်း တာဝန်ယူထားသော နိုင်ငံခြားရေးဝန်ကြီး စီဟာဆက်လည်း တက်ရောက်ခဲ့ပြီး တိုင်းရင်းသားလက်နက်ကိုင်အဖွဲ့များက လာဇာရိုနှင့် စီဟာဆက်တို့ကို အဖွဲ့အလိုက် သီးခြားစီ တွေ့ဆုံဆွေးနွေးခဲ့ကြောင်း သိရှိရသည်။

“ငြိမ်းချမ်းရေးလုပ်ငန်းစဉ်ဆီ ဦးတည်သွားနိုင်မယ့် အလားအလာနဲ့ လမ်းကြောင်းကို ဆုံးဖြတ်ပေးမယ့် အချက်တွေ အများကြီး ရှိနေပါသေးတယ်။ အထူးကိုယ်စားလှယ်အနေနဲ့ တိုင်းရင်းသားလက်နက်ကိုင်အဖွဲ့အစည်းတွေက အဆင့်မြင့်အဖွဲ့ဝင်တွေနဲ့ ပထမဆုံးအကြိမ် တွေ့ဆုံရတာဖြစ်လို့ ဒီဆွေးနွေးမှုဟာ အလွန်အရေးကြီးပါတယ်” ဟု လာဇာရိုက ပြောဆိုသည်။

တွေ့ဆုံပွဲသို့ တက်ရောက်ခဲ့သည့် မြန်မာတိုင်းရင်းသားလက်နက်ကိုင်အဖွဲ့များ၏ အမည်များကို လာဇာရိုက ထုတ်ဖော်ပြောဆိုရန် ငြင်းဆိုထားသော်လည်း တွေ့ဆုံခဲ့သည့် အဖွဲ့အားလုံးမှာ ငြိမ်းချမ်းရေးလုပ် ငန်းစဉ်တစ်ရပ်ဆီသို့ ဦးတည်ရန် လမ်းဖွင့်ထားကြောင်း ၎င်းက ဆိုသည်။

“ဒီအဆင့်မြင့်အရာရှိတွေ ကိုယ်တိုင် တက်ရောက်လာတဲ့အတွက် ကျွန်မတို့ ကြိုးပမ်းနေတဲ့ ကတိ ကဝတ်တချို့ ရရှိလာနိုင်မယ့် အလားအလာ ရှိပါတယ်။ ဒါဟာ အခြေအနေကို အကြီးအကျယ် ပြောင်းလဲပေးနိုင်တဲ့ အချက်တစ်ခု ဖြစ်ချင်မှဖြစ်မယ်၊ ဖြစ်လည်းဖြစ်နိုင်ပါတယ်။ ဒါပေမဲ့ ဒီလိုတွေ့ဆုံမှု ပြုလုပ်နိုင်ခဲ့တာကိုယ်တိုင်က အလွန်ကောင်းမွန်တဲ့ လက္ခဏာတစ်ခု ဖြစ်ပါတယ်” ဟု လာဇာရိုက ရှင်းပြသည်။

ထို့ပြင် ယင်းတွေ့ဆုံဆွေးနွေးမှုသည် မြန်မာနိုင်ငံ၏ ငြိမ်းချမ်းရေးလုပ်ငန်းစဉ်အတွက် အခြေအနေကို ပြောင်းလဲစေနိုင်သည့် အရေးပါသော ဖြစ်ရပ်တစ်ခု ဖြစ်လာနိုင်ခြေကို ပယ်ချ၍မရကြောင်း လာဇာရိုက ပြောဆိုသည်။

“ဒါဟာ အခြေအနေကို ပြောင်းလဲစေနိုင်တဲ့ Game Changer တစ်ခု ဖြစ်လာနိုင်တယ်ဆိုတဲ့ အလား အလာကို ကျွန်မ ပယ်ချမှာ မဟုတ်ပါဘူး။ ဆွေးနွေးမှုတွေအတွင်း ဘာမဆို ဖြစ်လာနိုင်ပါတယ်။ အရေးအကြီးဆုံးက ဘုံသဘောတူညီချက် ၅ ရပ်မှာ ထပ်ခါတလဲလဲ ပြောထားတဲ့ ဆွေးနွေးညှိနှိုင်းမှု အမှန်တကယ် ရှိနေတာပါပဲ” ဟု ၎င်းက ဆိုသည်။

၂၀၂၁ ခုနှစ် ဖေဖော်ဝါရီလတွင် မြန်မာစစ်တပ်က ဒေါ်အောင်ဆန်းစုကြည် ဦးဆောင်သော ရွေးကောက်ခံအစိုးရကို ဖြုတ်ချ၍ အာဏာသိမ်းခဲ့ပြီးနောက် နိုင်ငံတစ်ဝန်း ဆန္ဒပြမှုများနှင့် လက်နက်ကိုင်တော် လှန်ရေး ပေါ်ပေါက်လာခဲ့ကာ ပြည်တွင်းစစ်အတွင်း လူပေါင်း ၁၀၀,၀၀၀ ခန့် သေဆုံး၍ ပြည်သူ ၃ ဒသမ ၆ သန်းကျော် နေရပ်စွန့်ခွာ ထွက်ပြေးနေရကြောင်း သိရှိရသည်။

အာဆီယံက ၂၀၂၁ ခုနှစ် ဧပြီလတွင် အကြမ်းဖက်မှုများ ချက်ချင်းရပ်တန့်ရေး၊ သက်ဆိုင်သူအားလုံးအကြား အပြုသဘောဆောင်သော ဆွေးနွေးမှုများ ပြုလုပ်ရေး၊ အထူးကိုယ်စားလှယ် ခန့်အပ်ရေး၊ လူသားချင်းစာနာထောက်ထားမှု အကူအညီများ ပေးအပ်ရေးနှင့် သက်ဆိုင်ရာအဖွဲ့များကို အထူးကိုယ်စားလှယ်က တွေ့ဆုံရေးတို့ ပါဝင်သည့် အာဆီယံဘုံသဘောတူညီချက် ၅ ရပ်ကို ချမှတ်ခဲ့သည်။

သို့ရာတွင် စစ်တပ်က အာဆီယံဘုံသဘောတူညီချက် ၅ ရပ်ကို ထိရောက်စွာ အကောင်အထည်ဖော်ခြင်း မရှိသဖြင့် အာဆီယံက မြန်မာစစ်ခေါင်းဆောင်များနှင့် နိုင်ငံရေးကိုယ်စားလှယ်များကို အာဆီယံထိပ်သီးအစည်းအဝေးနှင့် နိုင်ငံခြားရေးဝန်ကြီးများ အစည်းအဝေးများသို့ တက်ရောက်ခွင့် ပိတ်ပင်ထားသည်။

ယင်းမတိုင်မီ ဇူလိုင်လ ၁၂ ရက်နေ့ ဘန်ကောက်မြို့တွင် လာဇာရိုက အာဆီယံနိုင်ငံခြားရေးဝန်ကြီးများနှင့် စစ်တပ်ခန့် မြန်မာနိုင်ငံခြားရေးဝန်ကြီး တင်မောင်ဆွေတို့အကြား အလွတ်သဘောတွေ့ဆုံပွဲကို ဦးဆောင်ပြုလုပ်ခဲ့ပြီး မြန်မာနိုင်ငံအတွင်း အကြမ်းဖက်မှုများ လျှော့ချရန်နှင့် နိုင်ငံရေးဆွေးနွေးပွဲဆီသို့ ဦးတည်သည့် လက်တွေ့ကျသော ခြေလှမ်းများ လှမ်းရန် အာဆီယံက တိုက်တွန်းခဲ့သည်။

အဆိုပါတွေ့ဆုံမှုသည် ၂၀၂၁ ခုနှစ် စစ်အာဏာသိမ်းပြီးနောက်ပိုင်း အာဆီယံနိုင်ငံခြားရေးဝန်ကြီးများနှင့် စစ်တပ်ခန့် မြန်မာနိုင်ငံခြားရေးဝန်ကြီးတို့အကြား ပထမဆုံးအကြိမ် လူချင်းတွေ့ဆုံမှုဖြစ်သည်။

တံခါးပိတ်ဆွေးနွေးမှုအတွင်း တင်မောင်ဆွေက ဒေါ်အောင်ဆန်းစုကြည်မှာ ကျန်းမာရေးကောင်းမွန်နေကြောင်း အာဆီယံနိုင်ငံခြားရေးဝန်ကြီးများကို ပြောဆိုခဲ့သည်ဟု လာဇာရိုက ထုတ်ဖော်ပြောဆိုသည်။

“သူပြောတဲ့ သဘောကတော့ ဒေါ်အောင်ဆန်းစုကြည်ဟာ ဆွေမျိုးတစ်ဦး၊ ညီမတစ်ဦးလို ဖြစ်တဲ့အတွက် သူမကို စောင့်ရှောက်သွားမယ်ဆိုတဲ့ သဘောပါ” ဟု လာဇာရိုက ပြောသည်။

ထို့ပြင် ယခုနှစ်နှောင်းပိုင်းတွင် လာဇာရို ဦးဆောင်မည့် လူသားချင်းစာနာထောက်ထားမှုဆိုင်ရာ မစ်ရှင်အဖွဲ့ကို မြန်မာနိုင်ငံသို့ ဝင်ရောက်ခွင့်ပြုရန် စစ်တပ်ဘက်က သဘောတူခဲ့ကြောင်း သိရှိရသည်။

ထိုင်းနိုင်ငံခြားရေးဝန်ကြီး စီဟာဆက်ကမူ မြန်မာနိုင်ငံတွင် အရပ်သားများအပေါ် သက်ရောက်နေသည့် အကြမ်းဖက်မှုများ ပိုမိုလျှော့ချရန်နှင့် အားလုံးပါဝင်နိုင်သည့် နိုင်ငံရေးဆွေးနွေးမှုများ ပြုလုပ်ရန် လို အပ်ကြောင်း ပြောဆိုသည်။

“အထူးသဖြင့် အရပ်သားတွေအပေါ် သက်ရောက်မှုတွေ ရှိနေတဲ့အတွက် အကြမ်းဖက်မှုတွေ ဒီထက်ပိုပြီး သိသိသာသာ လျော့ကျသွားတာကို ကျွန်တော်တို့ မြင်ချင်ပါတယ်။ အားလုံးပါဝင်နိုင်တဲ့ ဆွေးနွေးမှု ပြုလုပ်ဖို့လည်း တိုက်တွန်းခဲ့ပါတယ်။ ဒါက အမျိုးသားပြန်လည်သင့်မြတ်ရေးဆီ ဦးတည်သွားနိုင်မယ်လို့ မျှော်လင့်ပါတယ်” ဟု စီဟာဆက်က ပြောသည်။

လာဇာရိုနှင့် စီဟာဆက်တို့က အာဆီယံအနေဖြင့် ဘုံသဘောတူညီချက် ၅ ရပ်ကို ဆက်လက်ကိုင်စွဲထားပြီး မြန်မာနိုင်ငံအနေဖြင့် အာဆီယံထိပ်သီးအစည်းအဝေးများနှင့် နိုင်ငံခြားရေးဝန်ကြီးများ အစည်း အဝေးများတွင် အပြည့်အဝ ပြန်လည်ပါဝင်လိုပါက ဘုံသဘောတူညီချက် ၅ ရပ်ကို အဓိကကျကျ အကောင်အထည်ဖော်ရမည်ဖြစ်ကြောင်း အလေးပေးပြောဆိုသည်။

သို့ရာတွင် စစ်တပ်၏ ပြည်ထောင်စုလွှတ်တော်က ဇူလိုင်လ ၉ ရက်နေ့တွင် အာဆီယံဘုံသဘောတူညီချက် ၅ ရပ်သည် အာဆီယံ၏ အခြေခံမူများနှင့် ကိုက်ညီမှုမရှိသည့်အပြင် မြန်မာနိုင်ငံ၏ လက်ရှိနိုင်ငံ ရေးအခြေအနေမှန်များကို ထင်ဟပ်ခြင်းမရှိဟုဆိုကာ အစိုးရအနေဖြင့် အဆိုပါ ငြိမ်းချမ်းရေးအစီ အစဉ်ကို ပြန်လည်သုံးသပ်ရန် အရေးကြီးအဆိုတစ်ရပ် အတည်ပြုခဲ့ကြောင်း သိရှိရသည်။

မြန်မာနိုင်ငံနှင့် ကီလိုမီတာ ၂,၄၀၀ ရှည်လျားသော နယ်စပ်ကို မျှဝေထားသည့် ထိုင်းနိုင်ငံက မြန်မာနိုင်ငံ အာဆီယံနှင့် ပုံမှန်ဆက်ဆံရေးသို့ ပြန်လည်ဝင်ရောက်လာရေးကို အခိုင်အမာ တွန်းအားပေးနေသော် လည်း စင်ကာပူနိုင်ငံကမူ မြန်မာနိုင်ငံအနေဖြင့် အာဆီယံ၏ ထိပ်တန်းအဆင့် အစည်းအဝေးများသို့ ပြန်လည်တက်ရောက်ခွင့်မရမီ ဘုံသဘောတူညီချက် ၅ ရပ်ကို အဓိကကျကျ လိုက်နာအကောင် အထည်ဖော်ရမည်ဟူသော သဘောထားကို ဆက်လက်ကိုင်စွဲထားကြောင်း အာဆီယံသံတမန် ၃ ဦးက BNC သို့ ပြောဆိုထားသည်။

The post မြန်မာ့အရေး အဖြေရှာရန် အာဆီယံဥက္ကဋ္ဌ ဖိလစ်ပိုင်နိုင်ငံခြားနှင့် ထိုင်းနိုင်ငံခြားရေးဝန်ကြီးတို့က တိုင်းရင်းသားလက်နက်ကိုင်အဖွဲ့များမှ ကိုယ်စားလှယ်များနှင့် လူကိုယ်တိုင် ပထမဆုံးအကြိမ် လျှို့ဝှက်တွေ့ဆုံ appeared first on Khit Thit Media.

အကြမ်းဖက်စစ်ခေါင်းဆောင် မင်းအောင်လှိုင်က စားအုန်းဆီဈေးနှုန်းမြင့်တက်မှုအပေါ် ဆီကုန်သည်များနှင့် တစ်ဆင့်ပြန်လည်ရောင်းချသူများကို ဖမ်းဆီးအရေးယူရန် အမိန့်ထုတ်လိုက်သဖြင့် ဆီကုန် သည်များ အရောင်းအဝယ်ရပ်ဆိုင်းကာ စားအုန်းဆီဈေးကွက်တစ်ခုလုံး ဝရုန်း သုန်းကားနှင့် ဂယောက်ဂယက်ဖြစ်ပေါ်နေကြောင်း ဆီကုန်သည်အသိုင်းအဝိုင်းထံမှ သိရှိရသည်။

အကြမ်းဖက်စစ်ခေါင်းဆောင် မင်းအောင်လှိုင်က နိုင်ငံခြားငွေသုံးစွဲမှု လျှော့ချရန် အကြောင်းပြ၍ ပြည်ပမှ စားအုန်းဆီတင်သွင်းမှုကို ၃၀ ရာခိုင်နှုန်းကျော် လျှော့ချလိုက်ရာ ဆီခွဲတမ်းများ သိသိသာသာ လျော့ကျသွားပြီး ပြင်ပဈေးကွက်တွင် စားအုန်းဆီတစ်ပိဿာလျှင် ငွေကျပ် ၂၀,၀၀၀ အထိ ဈေးနှုန်းတဟုန်ထိုး မြင့်တက်လာကြောင်း ဆီကုန်သည်များထံမှ သိရှိရသည်။

ယင်းသို့ စားအုန်းဆီဈေးနှုန်းများ မြင့်တက်လာချိန်တွင် ဈေးကွက်အတွင်း တစ်ဆင့်ပြန်လည်ရောင်းချသူများကို စိစစ်ဖမ်းဆီးအရေးယူရန် စစ်ကောင်စီက အမိန့်ထုတ်ပြန်လာသဖြင့် ဆီကုန်သည်များက ဖမ်း ဆီးခံရမည်ကို စိုးရိမ်ကာ အရောင်းအဝယ်များ ရပ်ဆိုင်းထားကြပြီး စားအုန်းဆီဈေး ကွက်မှာ ဝရုန်း သုန်းကားနှင့် ဂယောက်ဂယက်ဖြစ်ပေါ်နေကြောင်း မြန်မာနိုင်ငံ စားအုန်းဆီအသင်းနှင့် ဆီကုန်သည်အသိုင်းအဝိုင်းထံမှ သိရှိရသည်။

မင်းအောင်လှိုင်က ရက် ၁၀၀ စီမံချက်အဖြစ် ပြည်တွင်းဆီထွက်သီးနှံ စိုက်ပျိုးထုတ်လုပ်မှု တိုးမြှင့်ရေး၊ သွင်းကုန်လျှော့ချ၍ ပို့ကုန်တိုးမြှင့်ရေးနှင့် နိုင်ငံခြားငွေသုံးစွဲမှု ချွေတာရေးတို့ကို အကောင်အထည်ဖော်ရန် ညွှန်ကြားထားပြီး ယင်းအစီအစဉ်အရ ပြည်ပမှ စားအုန်းဆီတင်သွင်းမှုကို အနည်းဆုံး ၃၀ ရာခိုင် နှုန်းကျော် လျှော့ချထားခြင်းဖြစ်ကြောင်း သိရသည်။

စားအုန်းဆီတင်သွင်းမှု လျှော့ချလိုက်ခြင်းနှင့်အတူ သွင်းကုန်လိုင်စင်နှင့် အမေရိကန်ဒေါ်လာ ခွဲဝေချ ထားပေးမှုများကိုလည်း စစ်ကောင်စီက ထိန်းချုပ်ထားရာ ဆီကုန်သည်များ ရရှိသည့် ခွဲတမ်းပမာဏများ လျော့ကျသွားပြီး ဈေးကွက်အတွင်း စားအုန်းဆီရှားပါးမှု စတင်ဖြစ်ပေါ်လာကြောင်း သိရှိရသည်။

“သတ်မှတ်ရည်ညွှန်းဈေးက စားအုန်းဆီတစ်ပိဿာ ၇,၂၀၀ ကျပ်ဝန်းကျင် သတ်မှတ်ထားပေမယ့် ပြင်ပမှာ တစ်ပိဿာ ၂၀,၀၀၀ ကျပ်အထိ ဈေးတက်နေတာက ခွဲတမ်းလျှော့လိုက်လို့ တက်တာပါ။ အခု ဆီကုန်သည်တိုင်း ခွဲတမ်းအပြည့်မရတော့ဘူး။ စားအုန်းဆီက ရှားသွားတာ။ အဲဒါကို ကုန်သည်တွေ ဖမ်းမယ်လို့ အမိန့်ထွက်လာတော့ အကုန်အလုပ်တွေ ရပ်ထားတယ်။ ဈေးကွက်ထဲမှာ အရောင်းအဝယ်တွေ ခဏဆိုင်းငံ့ထားပြီး အကုန်စောင့်ကြည့်နေကြတယ်” ဟု ရန်ကုန်အခြေစိုက် ဆီကုန်သည်ကြီးတစ်ဦးက ရန်ကုန်ခေတ်သစ်သတင်းဌာနသို့ ရှင်းပြသည်။

ထို့ပြင် စစ်ကောင်စီက ရွှေ၊ ဆန်နှင့် စက်သုံးဆီအပါအဝင် ကုန်ဈေးနှုန်းများ မြင့်တက်သည့်အခါတိုင်း ကုန်သည်နှင့် လုပ်ငန်းရှင်တချို့ကို ဖမ်းဆီးအရေးယူလေ့ရှိသဖြင့် ယခုအခါ ဆီကုန်သည်များအနေဖြင့်လည်း “စံပြဖမ်းဆီးခံရသူ” ဖြစ်လာမည်ကို စိုးရိမ်နေကြကြောင်း ၎င်းက ဆက်လက်ပြောဆိုသည်။

“ရွှေ၊ ဆန်၊ စက်သုံးဆီ ဘာပဲဖြစ်ဖြစ် ဈေးတက်ပြီဆိုရင် ကုန်သည်၊ လုပ်ငန်းရှင်တွေကို ဖမ်းဆီးအရေး ယူပြနေတာ။ အခု ဆီကုန်သည်တွေလည်း စံပြအဖမ်းခံထိမှာ စိုးရိမ်လို့ အကုန်ကြည့်နေကြတာ။ ဈေးကွက်လည်း ဂယောက်ဂယက်ဖြစ်ကုန်တယ်” ဟု အဆိုပါ ဆီကုန်သည်ကြီးက ပြောသည်။

စစ်ကောင်စီက ဇူလိုင်လ ၁၁ ရက်နေ့တွင် စားအုန်းဆီနှင့်ပတ်သက်၍ သတိပေးကြေညာချက် ထုတ်ပြန်ခဲ့ပြီး ဝယ်ယူရရှိထားသည့် စားအုန်းဆီကို အမှန်တကယ်အသုံးမပြုဘဲ တစ်ဆင့်ပြန်လည်ရောင်းချသူများအား စိစစ်အရေးယူနေကြောင်း တရားဝင်ကြေညာခဲ့သည်။

စစ်ကောင်စီ၏ ထုတ်ပြန်ချက်တွင် ပြည်တွင်းဆီထွက်သီးနှံ စိုက်ပျိုးထုတ်လုပ်မှု တိုးတက်စေရန်နှင့် ပြည်တွင်းစားသုံးဆီ ထုတ်လုပ်မှုမြှင့်တင်ကာ ပြည်ပမှ စားအုန်းဆီတင်သွင်းမှုကို အဆင့်ဆင့်လျှော့ချရန် ရည်မှန်းထားကြောင်း ဖော်ပြထားသည်။

ဇူလိုင်လအတွက် ပြည်ပမှတင်သွင်းသည့် စားအုန်းဆီများကို တိုင်းနှင့်ပြည်နယ်အလိုက် လူဦးရေနှင့် စားသုံးမှုနှုန်းအပေါ် မူတည်၍ ယခင်လများ၏ ဖြန့်ဖြူးမှုပမာဏကို အခြေခံကာ အသုတ်လိုက် ဖြန့်ခွဲပေးနေကြောင်း၊ စက်မှုလုပ်ငန်းသုံး စားအုန်းဆီကိုလည်း အမှန်တကယ်လိုအပ်သည့် လုပ်ငန်းအရေ အတွက်အပေါ် စိစစ်တွက်ချက်၍ ဖြန့်ဖြူးပေးနေကြောင်း စစ်ကောင်စီက ဆိုသည်။

ထို့ပြင် စားသောက်ကုန်ထုတ်လုပ်ရေးလုပ်ငန်း၊ စားသောက်ဆိုင်နှင့် ဟိုတယ်လုပ်ငန်းများအတွက် လိုအပ် သော စားအုန်းဆီရရှိရေး ပေါင်းစပ်ညှိနှိုင်းပေးနေပြီး လုပ်ငန်းရှင်များအနေဖြင့် အမှန်တကယ်လိုအပ်သည့် ပမာဏကိုသာ လျှောက်ထားဝယ်ယူရန် စစ်ကောင်စီက သတိပေးထားသည်။

သို့သော် ဆီကုန်သည်များက စားအုန်းဆီတင်သွင်းမှုနှင့် ခွဲတမ်းများကို စစ်ကောင်စီကိုယ်တိုင် လျှော့ချလိုက်ခြင်းကြောင့် ဈေးကွက်အတွင်း ပစ္စည်းရှားပါးကာ ဈေးနှုန်းမြင့်တက်လာခြင်းဖြစ်ပြီး ယင်းပြဿနာကို ဖြေရှင်းမည့်အစား ကုန်သည်များအား ဖမ်းဆီးအရေးယူရန် လုပ်ဆောင်လာခြင်းက ဈေးကွက်ကို ပိုမိုမတည်မငြိမ်ဖြစ်စေကြောင်း ထောက်ပြကြသည်။

မြန်မာနိုင်ငံတွင် စားသုံးဆီလိုအပ်ချက် ဖြည့်ဆည်းရန် တစ်လလျှင် စားအုန်းဆီတန်ချိန် ၅ သောင်းကျော် တင်သွင်းရပြီး တစ်တန်လျှင် အမေရိကန်ဒေါ်လာ ၁,၁၅၀ ခန့်ဖြင့် ဝယ်ယူရသဖြင့် တစ်လလျှင် အမေရိကန်ဒေါ်လာ ၅၈ သန်းကျော် ကုန်ကျကြောင်း စစ်တပ်၏ ထုတ်ပြန်ချက်အရ သိရသည်။

ပြည်တွင်း၌ မြေပဲ၊ ပဲပုပ်၊ နေကြာနှင့် နှမ်းတို့မှ ထုတ်လုပ်သည့် စားသုံးဆီမှာ တစ်နှစ်လျှင် တန်ချိန် ၂၈၀,၀၀၀ ခန့်သာရှိပြီး ပြည်တွင်းစားသုံးမှုလိုအပ်ချက်ကို မဖြည့်ဆည်းနိုင်သဖြင့် ပြည်ပမှ စားအုန်းဆီတန်ချိန် ၆၄၁,၇၈၃ ခန့် တင်သွင်းနေရကြောင်း စစ်တပ်က ဆိုသည်။

မြန်မာနိုင်ငံသည် ပုံမှန်အားဖြင့် နှစ်စဉ် စားအုန်းဆီတန်ချိန် ၈ သိန်းမှ ၁ သန်းဝန်းကျင်အထိ တင်သွင်းနေရသော်လည်း ယခုနှစ်တွင် တန်ချိန် ၆ သိန်းကျော်သာ တင်သွင်းရန် လျှော့ချထားခြင်းဖြစ်သည်။

ယခင်က လူတစ်ဦးလျှင် စားအုန်းဆီ ၂ ဒသမ ၂၅ ကျပ်သားနှုန်း ခွဲတမ်းပေးခဲ့ရာမှ ယခုအခါ ၁ ဒသမ ၆၅ ကျပ်သားသို့ လျှော့ချထားပြီး ရန်ကုန်တိုင်းအတွင်း မြို့နယ်အလိုက် ဆီခွဲတမ်းများမှာ ၅၀ ရာခိုင်နှုန်းအထိ လျှော့ချခံထားရကြောင်း ဆီကုန်သည်များထံမှ သိရှိရသည်။

လက်ရှိတွင် စစ်ကောင်စီသတ်မှတ်သည့် ရည်ညွှန်းဈေးမှာ စားအုန်းဆီတစ်ပိဿာလျှင် ကျပ် ၇,၀၀၀ ကျပ်ကျော် ဝန်းကျင်သာရှိသော်လည်း ပြင်ပဈေးကွက်နှင့် ဝယ်ယူခွင့်စာအုပ်မရှိသော ပြည်သူများထံ ရောက်ရှိချိန်တွင် တစ်ပိဿာလျှင် ကျပ် ၁၈,၀၀၀ မှ ၂၀,၀၀၀ အထိ ဈေးနှုန်းမြင့်တက်နေကြောင်း သိရသည်။

စစ်ကောင်စီဘက်က ယင်းသို့ ဈေးနှုန်းမြင့်တက်မှုမှာ တစ်ဆင့်ပြန်လည်ရောင်းချသူများနှင့် “ဝိသမ လောဘသားများ” ကြောင့်ဖြစ်သည်ဟု အပြစ်တင်ပြောဆိုနေသော်လည်း ဆီကုန်သည်များနှင့် စီးပွား ရေးလုပ်ငန်းရှင်များကမူ စားအုန်းဆီတင်သွင်းမှုနှင့် ခွဲတမ်းများကို ရုတ်တရက် လျှော့ချလိုက်ခြင်း၏ တိုက်ရိုက်နောက်ဆက်တွဲဖြစ်ကြောင်း သုံးသပ်ပြောဆိုကြသည်။

စစ်ကောင်စီက စားအုန်းဆီတင်သွင်းမှုကို ဆက်လက်လျှော့ချ၍ ပြည်တွင်းဆီထွက်သီးနှံများဖြင့် အစား ထိုးသုံးစွဲရေးမူဝါဒကို အကောင်အထည်ဖော်နေချိန်တွင် အခြေခံလူတန်းစားများအတွက် စားအုန်းဆီဝယ်ယူရရှိမှု ပိုမိုခက်ခဲလာနိုင်ပြီး ဆီဈေးနှုန်းများလည်း ဆက်လက်မြင့်တက်နိုင်ကြောင်း ဆီကုန်သည်များနှင့် စီးပွားရေးလုပ်ငန်းရှင်များက သုံးသပ်ထားကြသည်။

The post မင်းအောင်လှိုင်၏ ဆီခွဲတမ်းလျှော့ချမှုကြောင့် ဖြစ်ပေါ်လာသော စားအုန်းဆီဈေး တဟုန်ထိုးမြင့်တက်မှုအပေါ် ဖမ်းဆီးအရေးယူရန် အမိန့်ထွက်လာ၍ ဆီဈေးကွက်နှင့် ကုန်သည်များ ဝရုန်းသုန်းကားဖြစ် appeared first on Khit Thit Media.

မြန်မာနိုင်ငံတွင် စစ်တပ်၏ ဖမ်းဆီးထိန်းသိမ်းမှု ခံထားရသည့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးကို လွှတ်ပေးရန် အာဆီယံနိုင်ငံခြားရေးဝန်ကြီးများက တောင်းဆိုလိုက်ကြောင်း စင်ကာပူနိုင်ငံခြားရေးဝန်ကြီး Vivian Balakrishnan က ၎င်း၏ လူမှုကွန်ရက်မှတစ်ဆင့် ထုတ်ပြန်ပြောဆိုသည်။

ယမန်နေ့ ထိုင်းနိုင်ငံ၊ ဘန်ကောက်မြို့တွင် မြန်မာစစ်တပ်၏ နိုင်ငံခြားရေးဝန်ကြီး ဆိုသူ တင်မောင်ဆွေနှင့် အာဆီယံနိုင်ငံခြားရေးဝန်ကြီးများ တွေ့ဆုံစဉ် ထိုသို့ ပြောဆိုခဲ့ခြင်းဖြစ်ကြောင်း သိရှိရသည်။

အာဆီယံနိုင်ငံခြားရေးဝန်ကြီးများက မြန်မာ့အရေးနှင့်ပတ်သက်၍ ပွင့်ပွင့်လင်းလင်းနှင့် အပြုသဘောဆောင်သော ဆွေးနွေးမှုများ ပြုလုပ်ခဲ့ကြပြီး အာဆီယံ ဘုံသဘောတူညီချက် ၅ ချက်သည် ယခင်ကလည်း အရေးပါခဲ့သလို လက်ရှိအချိန်အထိ ဆက်လက်အသက်ဝင်နေဆဲဖြစ်ကြောင်း အတည်ပြုသည်ဟု ဆိုသည်။

အာဆီယံနိုင်ငံခြားရေးဝန်ကြီးများအနေဖြင့် မြန်မာ့အရေးတွင် လက်တွေ့ကျပြီး ထင်သာမြင်သာရှိသော တိုးတက်မှုများကို မြင်တွေ့လိုကြောင်း၊ အထူးသဖြင့် အဓိကအချက် ၃ ချက်တွင် တိုးတက်မှုရှိရန် လိုလားကြောင်း စင်ကာပူနိုင်ငံခြားရေးဝန်ကြီးက ပြောဆိုသည်။

ပထမအချက်အနေဖြင့် အရပ်သားပြည်သူများအပေါ် အကြမ်းဖက်တိုက်ခိုက်မှုများအပါအဝင် အကြမ်းဖက်မှုအားလုံးကို အပြီးတိုင် ရပ်တန့်ရန်၊ ဒုတိယအချက်အနေဖြင့် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးကို လွှတ်ပေးရန်နှင့် တတိယအချက်အနေဖြင့် အာဆီယံ လူသားချင်းစာနာထောက်ထားမှုဆိုင်ရာ အကူအညီပေးရေးညှိနှိုင်းမှုဗဟိုဌာန AHA Centre ကို နိုင်ငံရေးရပ်တည်ချက် မည်သို့ပင်ရှိစေကာမူ အကူအညီလိုအပ်သည့် မြန်မာနိုင်ငံတစ်ဝန်းရှိ မည်သည့်နေရာကိုမဆို လူသားချင်းစာနာထောက်ထားမှုအကူအညီများ ပေးပို့နိုင်ရန် ခွင့်ပြုရမည်ဖြစ်ကြောင်း သိရှိရသည်။

“အာဆီယံနိုင်ငံခြားရေးဝန်ကြီးတွေက လက်တွေ့ကျပြီး ထင်သာမြင်သာရှိတဲ့ တိုးတက်မှုတွေကို မြင်တွေ့လိုပါတယ်။ အထူးသဖြင့် အရပ်သားတွေအပေါ် အကြမ်းဖက်မှုတွေကို အပြီးတိုင်ရပ်တန့်ဖို့၊ ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံးကို လွှတ်ပေးဖို့နဲ့ လိုအပ်တဲ့နေရာတိုင်းကို လူသားချင်းစာနာမှုအကူအညီတွေ ပေးပို့နိုင်ဖို့ ဖြစ်ပါတယ်” ဟု စင်ကာပူနိုင်ငံခြားရေးဝန်ကြီးက ပြောဆိုသည်။

မြန်မာနိုင်ငံသည် အာဆီယံ၏ ခွဲခြား၍မရသော အစိတ်အပိုင်းတစ်ခုအဖြစ် ဆက်လက်ရှိနေဆဲဖြစ်ပြီး လာမည့်လများအတွင်း အာဆီယံ ဘုံသဘောတူညီချက် ၅ ချက် အကောင်အထည်ဖော်ရေးတွင် တိုး တက်မှုများ ရှိလာရန် မျှော်လင့်ကြောင်း ၎င်းက ဆိုသည်။

ထို့ပြင် မြန်မာနိုင်ငံ၏ အဓိက သက်ဆိုင်သူအားလုံးအကြား အပြုသဘောဆောင်သော တွေ့ဆုံဆွေးနွေးမှုများ ပြုလုပ်ကာ မြန်မာ့အကျပ်အတည်းကို ငြိမ်းချမ်းပြီး ရေရှည်တည်တံ့သည့် နည်းလမ်းဖြင့် ဖြေရှင်းနိုင်ရန် မျှော်လင့်ကြောင်း စင်ကာပူနိုင်ငံခြားရေးဝန်ကြီး Vivian Balakrishnan က ထုတ်ပြန်ပြောဆိုထားသည်။

အကြမ်းဖက်စစ်တပ်ကမူ ဒေါ်အောင်ဆန်းစုကြည်ကို ဆွေမျိုး အစ်မကဲ့သို့ စောင့်ရှောက်ထားပြီး ကျန်းမာရေးကောင်းမွန်ကြောင်းသာ မြန်မာစစ်တပ်၏ နိုင်ငံခြားရေးဝန်ကြီးဆိုသူ တင်မောင်ဆွေက ပြောဆိုသွားသည်။

The post ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံး လွှတ်ပေးရန် ၊ အကြမ်းဖက်မှုများအားလုံး ရပ်တန့်ရန် အာဆီယံနိုင်ငံခြားရေးဝန်ကြီးများက မြင်တွေ့လိုဟု မြန်မာစစ်တပ်ကို ပြော appeared first on Khit Thit Media.

ဖမ်းဆီးထိန်းသိမ်းခံထားရသော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ကျန်းမာရေးကောင်းမွန်နေပြီး ဆွေမျိုး၊ အစ်မကဲ့သို့ စောင့်ရှောက်ပေးထားကြောင်း စစ်ကောင်စီခန့် နိုင်ငံခြားရေးဝန်ကြီး တင်မောင်ဆွေက အာဆီယံနိုင်ငံခြားရေးဝန်ကြီးများကို ပြောဆိုခဲ့သည်။

ယနေ့ ဇူလိုင်လ ၁၂ ရက်နေ့ ထိုင်းနိုင်ငံ၊ ဘန်ကောက်မြို့တွင် ပြုလုပ်သော အာဆီယံနိုင်ငံခြားရေးဝန်ကြီးများနှင့် စစ်ကောင်စီခန့် နိုင်ငံခြားရေးဝန်ကြီးတို့၏ အလွတ်သဘောတွေ့ဆုံပွဲအတွင်း ဒေါ်အောင်ဆန်းစုကြည်၏ လက်ရှိအခြေအနေနှင့်ပတ်သက်၍ မေးမြန်းမှုများရှိခဲ့ရာ တင်မောင်ဆွေက အထက်ပါအတိုင်း ပြန်လည်ဖြေကြားခဲ့ခြင်းဖြစ်သည်။

မြန်မာနိုင်ငံဆိုင်ရာ အာဆီယံ အထူးကိုယ်စားလှယ်နှင့် ဖိလစ်ပိုင်နိုင်ငံခြားရေးဝန်ကြီး မာရီယာ ထရီဆာ လာဇာရိုက စစ်ကောင်စီခန့် နိုင်ငံခြားရေးဝန်ကြီး၏ ပြောဆိုချက်အရ ဒေါ်အောင်ဆန်းစုကြည်သည် ကျန်းမာရေးကောင်းမွန်နေကြောင်းနှင့် ဆွေမျိုး၊ အစ်မတစ်ဦးကဲ့သို့ သဘောထားကာ စောင့်ရှောက်ပေးသွားမည်ဟု ပြောဆိုခဲ့ကြောင်း သတင်းစာရှင်းလင်းပွဲတွင် ပြောကြားသည်။

“မြန်မာနိုင်ငံခြားရေးဝန်ကြီးက ဒေါ်အောင်ဆန်းစုကြည်နဲ့ပတ်သက်ပြီး ပြောခဲ့တာကို ကျွန်မ မှတ်မိသလောက်ဆိုရင် သူက ကျန်းမာရေးကောင်းမွန်နေပါတယ်။ သူက ဆွေမျိုးတစ်ယောက်၊ အစ်မတစ်ယောက်လိုဖြစ်တဲ့အတွက် ကျွန်မတို့ သူ့ကို စောင့်ရှောက်ပေးသွားမှာပါဆိုတဲ့ သဘောမျိုး ပြောခဲ့တာပါ” ဟု လာဇာရိုက ပြောဆိုသည်။

အသက် ၈၁ နှစ်အရွယ် ဒေါ်အောင်ဆန်းစုကြည်သည် ၂၀၂၁ ခုနှစ် စစ်တပ်အာဏာသိမ်းချိန်မှစတင်၍ ဖမ်းဆီးထိန်းသိမ်းခံထားရပြီး လက်ရှိ မည်သည့်နေရာတွင် ထိန်းသိမ်းထားသည်ကို အတိအကျ မသိရှိရသေးပေ။ လာဇာရိုက ဒေါ်အောင်ဆန်းစုကြည်ကို “သတ်မှတ်ထားသော နေရာတစ်ခု” သို့ ပြောင်းရွှေ့ထားကြောင်း အစောပိုင်းတွင် ပြောဆိုခဲ့သော်လည်း နေရာအတိအကျကို ထုတ်ဖော်ပြောဆိုခြင်းမရှိပေ။

လာဇာရိုသည် ဒေါ်အောင်ဆန်းစုကြည်နှင့် လူကိုယ်တိုင်တွေ့ဆုံခွင့်ရရှိရေး တောင်းဆိုထားသော်လည်း ယခုအချိန်အထိ စစ်ကောင်စီဘက်က တွေ့ဆုံခွင့် မပေးသေးကြောင်း သိရသည်။

ထိုင်းနိုင်ငံခြားရေးဝန်ကြီး ဆီဟာဆက် ဖွမ်ကက်ကီယိုကလည်း ယနေ့ အလွတ်သဘောအစည်းအဝေးအတွင်း ဒေါ်အောင်ဆန်းစုကြည်၏ လက်ရှိအခြေအနေနှင့်ပတ်သက်၍ တင်မောင်ဆွေကို မေးမြန်းမှုများရှိခဲ့ကြောင်း ပြောဆိုသည်။

“အာဆီယံ အထူးကိုယ်စားလှယ်ကို ဒေါ်အောင်ဆန်းစုကြည်နဲ့ တွေ့ဆုံခွင့်ပေးနိုင်ရင် ပိုကောင်းပါလိမ့်မယ်။ အဲဒီလိုတွေ့ဆုံခွင့်ရမှ နိုင်ငံခြားရေးဝန်ကြီး ပြောဆိုထားတဲ့ အချက်တွေကို ကျွန်တော်တို့ အတည် ပြုနိုင်မှာ ဖြစ်ပါတယ်” ဟု ထိုင်းနိုင်ငံခြားရေးဝန်ကြီးက ပြောဆိုသည်။

ဒေါ်အောင်ဆန်းစုကြည်သည် လှုံ့ဆော်မှု၊ အဂတိလိုက်စားမှု၊ ရွေးကောက်ပွဲမသမာမှုနှင့် နိုင်ငံတော်လျှို့ဝှက်ချက်ဥပဒေ ချိုးဖောက်မှုအပါအဝင် အမှုများဖြင့် ထောင်ဒဏ် ၂၇ နှစ် ချမှတ်ခံထားရပြီး မကြာသေးမီက ပြစ်ဒဏ်၏ သုံးပုံတစ်ပုံကို လျှော့ချပေးခဲ့ကြောင်း Reuters သတင်းတွင် ဖော်ပြထားသည်။

၂၀၂၁ ခုနှစ် စစ်တပ်အာဏာသိမ်းပြီးနောက် စစ်ကောင်စီက အာဆီယံ ဘုံသဘောတူညီချက် ၅ ချက်ကို အကောင်အထည်ဖော်ရန် ပျက်ကွက်ခဲ့သဖြင့် စစ်ခေါင်းဆောင်များကို အာဆီယံအဆင့်မြင့်အစည်းအဝေးများ တက်ရောက်ခွင့် ပိတ်ပင်ထားခဲ့သည်။

ယနေ့ ဘန်ကောက်မြို့တွင် ပြုလုပ်သော အလွတ်သဘောတွေ့ဆုံပွဲသည် စစ်အာဏာသိမ်းပြီးနောက် အာဆီယံနိုင်ငံခြားရေးဝန်ကြီးများနှင့် စစ်ကောင်စီခန့် နိုင်ငံခြားရေးဝန်ကြီးတို့ ပထမဆုံးအကြိမ် လူကိုယ်တိုင် တွေ့ဆုံခြင်းဖြစ်ကြောင်း သိရှိရသည်။

The post ဒေါ်အောင်ဆန်းစုကြည်ကို အစ်မ ဆွေမျိုးကဲ့သို့ စောင့်ရှောက်ပေးထားဟု မြန်မာစစ်တပ်က ပြောဆိုသော်လည်း လူကိုယ်တိုင်တွေ့ဆုံခွင့်ပေးမှ အတည်ပြုနိုင်မည်ဟု အာဆီယံဥက္ကဋ္ဌနှင့် ထိုင်းနိုင်ငံခြားရေးဝန်ကြီးတို့က တောင်း ဆို appeared first on Khit Thit Media.

ရန်ကုန်၊ ဇူလိုင် ၁၂

သွင်းကုန်လိုင်စင်၊ ပါမစ် သို့မဟုတ် ကြေညာလွှာမရှိဘဲ ပြည်ပမှ ကုန်ပစ္စည်းတင်သွင်းပါက ကုန်ပစ္စည်းအမျိုးအစားအလိုက် စည်းကြပ်တန်ဖိုး၏ ၃ ဆအထိ ဒဏ်ကြေးချမှတ်ပြီး ကုန်ပစ္စည်းများကို သိမ်းဆည်းမည့်အပြင် ထောင်ဒဏ် ၃ နှစ်အထိ ချမှတ်နိုင်သော ဥပဒေပုဒ်မဖြင့် တရားစွဲဆိုအရေးယူမည်ဖြစ်ကြောင်း စစ်ကောင်စီက ကြေညာသည်။

ဇူလိုင်လ ၆ ရက်နေ့တွင် ထုတ်ပြန်သော အမိန့်ကြော်ငြာစာအမှတ် ၁၁၅/၂၀၂၆ အရ ကုန်ပစ္စည်းတင်ပို့၊ တင်သွင်းရာတွင် လိုက်နာရမည့် စည်းကမ်းချက်များ၊ ဒဏ်ကြေးနှုန်းထားများနှင့် အရေးယူမှုဆိုင်ရာ လုပ်ထုံးလုပ်နည်းများကို အသစ်ပြန်လည်သတ်မှတ်လိုက်ခြင်းဖြစ်ကြောင်း သိရှိရသည်။

အမိန့်အသစ်အရ သွင်းကုန်လိုင်စင်၊ ပါမစ် သို့မဟုတ် ကြေညာလွှာမရှိဘဲ ကုန်ပစ္စည်းတင်သွင်းပါက ကုန်ပစ္စည်းအမျိုးအစားအလိုက် စည်းကြပ်တန်ဖိုး၏ ၁၀၀ ရာခိုင်နှုန်း၊ ၂၀၀ ရာခိုင်နှုန်း သို့မဟုတ် ၃၀၀ ရာခိုင်နှုန်းအထိ ဒဏ်ကြေးချမှတ်နိုင်ပြီး အချို့ကုန်ပစ္စည်းများကို ပြည်သူ့ဘဏ္ဍာအဖြစ် သိမ်းဆည်းမည်ဖြစ်ကြောင်း ထုတ်ပြန်ထားသည်။

ထို့ပြင် စည်းကမ်းချိုးဖောက်မှုများအတွက် ဒဏ်ငွေပေးဆောင်စေခြင်း၊ ကုန်ပစ္စည်းသိမ်းဆည်းခြင်းတို့အပြင် ထောင်ဒဏ် ၃ နှစ်အထိ ချမှတ်နိုင်သည့် ပင်လယ်ရေကြောင်းအကောက်ခွန်အက်ဥပဒေ ပုဒ်မ ၁၆၇ (၁) ဖြင့် တရားစွဲဆိုအရေးယူနိုင်ကြောင်း စစ်ကောင်စီ၏ အမိန့်တွင် ဖော်ပြထားသည်။

“ဒဏ်ကြေးတွေ ပိုမြင့်လာတယ်။ သွင်းကုန်တင်သွင်းမှုကို ပိုပြီးတော့ တင်းကျပ်လာတယ်။ ပစ္စည်းသိမ်း၊ ဒဏ်ရိုက်မယ့်အပြင် ထောင်ပါချမယ်ဆိုတာမျိုးပြောလာတာ။ အခြေအနေက ပိုပြီး ဆိုးလာတာပါ” ဟု သွင်းကုန်တင်သွင်းနေသော လုပ်ငန်းရှင်တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

အဆိုပါ အမိန့်ကြော်ငြာစာအမှတ် ၁၁၅/၂၀၂၆ ထုတ်ပြန်ခြင်းနှင့်အတူ ယခင်ထုတ်ပြန်ထားသော အမိန့်ကြော်ငြာစာအမှတ် ၆/၂၀၁၇၊ ၄၀/၂၀၂၃၊ ၁၁၅/၂၀၂၅ နှင့် ၅၁/၂၀၂၆ တို့ကို ဇူလိုင်လ ၆ ရက်နေ့မှစတင်၍ ပယ်ဖျက်ကာ အမိန့်အသစ်ပါ လုပ်ထုံးလုပ်နည်းများဖြင့် အစားထိုးလိုက်ကြောင်း သိရသည်။

စစ်ကောင်စီက ပိတ်ပင်တားမြစ်ထားသော ကုန်ပစ္စည်းများကို တင်ပို့၊ တင်သွင်းခွင့် လုံးဝမပြုဘဲ ကန့်သတ်ကုန်ပစ္စည်းများကို လိုင်စင် သို့မဟုတ် ပါမစ်ရရှိပြီးမှသာ တင်ပို့၊ တင်သွင်းရမည်ဟု သတ်မှတ်ထားသည်။

ကုန်ပစ္စည်းတိုင်းတွင် အမှတ်တံဆိပ်နှင့် ပင်ရင်းနိုင်ငံကို တိကျစွာ ဖော်ပြထားရမည်ဖြစ်ပြီး တင်သွင်းလာသော ကုန်ပစ္စည်းများသည် သွင်းကုန်လိုင်စင်၊ ပါမစ်နှင့် ကြေညာလွှာပါ အချက်အလက်များနှင့် ကိုက်ညီရမည်ဖြစ်ကြောင်း သိရသည်။

အမှတ်တံဆိပ်မပါရှိသော ယာဉ်နှင့် ယန္တရားများကို သိမ်းဆည်းမည်ဖြစ်ပြီး အထွေထွေကုန်ပစ္စည်းများကို စည်းကြပ်တန်ဖိုး၏ ၁၀၀ ရာခိုင်နှုန်းအထိ ဒဏ်ကြေးချမှတ်နိုင်ကြောင်း၊ ပင်ရင်းနိုင်ငံနှင့်ပတ်သက်သည့် အထောက်အထားမတွေ့ရှိပါက ယာဉ်နှင့် ယန္တရားများကို သိမ်းဆည်းကာ အထွေထွေကုန်ပစ္စည်းများကို စည်းကြပ်တန်ဖိုး၏ ၅၀ ရာခိုင်နှုန်း ဒဏ်ရိုက်မည်ဖြစ်ကြောင်း ထုတ်ပြန်ထားသည်။

သို့ရာတွင် အမှတ်တံဆိပ် သို့မဟုတ် ပင်ရင်းနိုင်ငံကို သက်ဆိုင်ရာ အထောက်အထားများဖြင့် စိစစ်အတည်ပြုနိုင်ပါက ဒဏ်ကြေးကင်းလွတ်ခွင့်ပြုနိုင်ကြောင်း သိရသည်။

ယာဉ်နှင့် ယန္တရားများ၏ ထုတ်လုပ်သည့်ခုနှစ် ကွဲလွဲပါက စည်းကြပ်တန်ဖိုးအပေါ် မူတည်၍ ဒဏ်ကြေးချမှတ်မည်ဖြစ်ပြီး သတ်မှတ်ထားသည့် ထုတ်လုပ်သည့်ခုနှစ်ထက် နိမ့်နေပါက ယာဉ် သို့မဟုတ် ယန္တရားကို သိမ်းဆည်းမည်ဖြစ်သည်။

သွင်းကုန်လိုင်စင်၊ ပါမစ် သို့မဟုတ် ကြေညာလွှာတွင် ဖော်ပြထားသည့် အဓိကအမှတ်တံဆိပ်နှင့် အမှတ်တံဆိပ်ခွဲ ကွဲလွဲပါက ယာဉ်နှင့် ယန္တရားများကို စည်းကြပ်တန်ဖိုး၏ ၅၀ ရာခိုင်နှုန်း၊ အထွေထွေကုန်ပစ္စည်းများကို ၂၅ ရာခိုင်နှုန်းအထိ ဒဏ်ကြေးချမှတ်မည်ဖြစ်သည်။

ကုန်ပစ္စည်း၏ ဝင်ဆံ့ပမာဏ၊ အလေးချိန်နှင့် အတိုင်းအတာများ ကွဲလွဲပါက တစ်တန်လျှင် ငွေကျပ် ၅ သိန်း သို့မဟုတ် စည်းကြပ်တန်ဖိုးအပေါ် အခြေခံ၍ ဒဏ်ကြေးချမှတ်မည်ဖြစ်သည်။ လျှပ်စစ်ကား EV များ၏ ဘက်ထရီစွမ်းရည်နှင့် မော်တာစွမ်းရည် ကွဲလွဲမှုများအတွက်လည်း ဒဏ်ကြေးသတ်မှတ်ထားပြီး အပေါင်း၊ အနုတ် ၃ အတွင်း ကွဲလွဲမှုကို ဒဏ်ကြေးကင်းလွတ်ခွင့်ပြုမည်ဖြစ်ကြောင်း သိရသည်။

ကုန်ပစ္စည်းများ လိုင်စင်ခွင့်ပြုချက်မရမီ ကြိုတင်ရောက်ရှိလာပါက ၁၅ ရက်အတွင်း ဒဏ်ကြေးကင်းလွတ်ခွင့်ပြုမည်ဖြစ်သော်လည်း ၁၆ ရက်မှစတင်၍ ရက်အလိုက် ဒဏ်ကြေးများ တိုးမြှင့်ချမှတ်မည်ဖြစ်ပြီး ၆၁ ရက်နှင့်အထက် ကျော်လွန်ပါက ကုန်ပစ္စည်းကို သိမ်းဆည်းမည်ဖြစ်သည်။

အလားတူ သွင်းကုန်လိုင်စင် သက်တမ်းကျော်လွန်ပြီးမှ ကုန်ပစ္စည်းရောက်ရှိလာပါက ၇ ရက်အတွင်း ဒဏ်ကြေးကင်းလွတ်ခွင့်ပြုမည်ဖြစ်သော်လည်း ၈ ရက်မှစတင်၍ ဒဏ်ကြေးချမှတ်ကာ ၃၁ ရက်နှင့်အထက် ကျော်လွန်ပါက ကုန်ပစ္စည်းကို သိမ်းဆည်းမည်ဖြစ်ကြောင်း ထုတ်ပြန်ထားသည်။

ပို့ကုန်များနှင့်ပတ်သက်၍လည်း ပင်ရင်းနိုင်ငံ ကွဲလွဲဖော်ပြခြင်း၊ အရည်အသွေး၊ အတိုင်းအတာနှင့် ကုန်ပစ္စည်းအမျိုးအစား ကွဲလွဲခြင်း၊ လိုင်စင်နှင့် စာရွက်စာတမ်းပါ အချက်အလက်များ မကိုက်ညီခြင်းနှင့် ခွင့်ပြုချက်ထက် ကျော်လွန်တင်ပို့ခြင်းတို့အတွက် စည်းကြပ်တန်ဖိုးအပေါ် အခြေခံ၍ ဒဏ်ကြေးများ ချမှတ်မည်ဖြစ်သည်။

ပို့ကုန်လိုင်စင်၊ ပါမစ်၊ ထုတ်ကုန်ကြေညာလွှာ သို့မဟုတ် တင်ပို့မှုနှင့်သက်ဆိုင်သော စာရွက်စာတမ်းများ မပါရှိပါက ကုန်ပစ္စည်းများကို သိမ်းဆည်းမည်ဖြစ်ကြောင်း သိရသည်။

စစ်ကောင်စီက ကုန်ပစ္စည်းတင်ပို့၊ တင်သွင်းမှုဆိုင်ရာ စည်းကမ်းချိုးဖောက်မှုများကို ဒဏ်ငွေချမှတ်ခြင်း၊ ကုန်ပစ္စည်းသိမ်းဆည်းခြင်းနှင့် ထောင်ဒဏ် ၃ နှစ်အထိ ချမှတ်နိုင်သော ပင်လယ်ရေကြောင်းအကောက်ခွန်အက်ဥပဒေ ပုဒ်မ ၁၆၇ (၁) ဥပဒေပုဒ်မဖြင့်ပါ တရားစွဲဆိုအရေးယူခြင်းများ လုပ်ဆောင်မည်ဖြစ်ကြောင်း အမိန့်ကြော်ငြာစာတွင် ထည့်သွင်းကြေညာထားသည်။

အကြမ်းဖက် မင်းအောင်လှိုင်က နိုင်ငံခြားငွေ သုံးစွဲမှု လျှော့ချရန် မြန်မာနိုင်ငံတွင် သွင်းကုန်မှန်သမျှကို ပိတ်ဆို့ပြီး ပို့ကုန်သာတင်ပို့မည့် စီးပွားရေးမူဝါဒကို အကောင်အထည်ဖော်မည်ဖြစ်ကြောင်း တရားဝင် ထုတ်ပြန်ကြေညာထားသည်။ရန်ကုန်၊ ဇူလိုင် ၁၂

သွင်းကုန်လိုင်စင်၊ ပါမစ် သို့မဟုတ် ကြေညာလွှာမရှိဘဲ ပြည်ပမှ ကုန်ပစ္စည်းတင်သွင်းပါက ကုန်ပစ္စည်းအမျိုးအစားအလိုက် စည်းကြပ်တန်ဖိုး၏ ၃ ဆအထိ ဒဏ်ကြေးချမှတ်ပြီး ကုန်ပစ္စည်းများကို သိမ်းဆည်းမည့်အပြင် ထောင်ဒဏ် ၃ နှစ်အထိ ချမှတ်နိုင်သော ဥပဒေပုဒ်မဖြင့် တရားစွဲဆိုအရေးယူမည်ဖြစ်ကြောင်း စစ်ကောင်စီက ကြေညာသည်။

ဇူလိုင်လ ၆ ရက်နေ့တွင် ထုတ်ပြန်သော အမိန့်ကြော်ငြာစာအမှတ် ၁၁၅/၂၀၂၆ အရ ကုန်ပစ္စည်းတင်ပို့၊ တင်သွင်းရာတွင် လိုက်နာရမည့် စည်းကမ်းချက်များ၊ ဒဏ်ကြေးနှုန်းထားများနှင့် အရေးယူမှုဆိုင်ရာ လုပ်ထုံးလုပ်နည်းများကို အသစ်ပြန်လည်သတ်မှတ်လိုက်ခြင်းဖြစ်ကြောင်း သိရှိရသည်။

အမိန့်အသစ်အရ သွင်းကုန်လိုင်စင်၊ ပါမစ် သို့မဟုတ် ကြေညာလွှာမရှိဘဲ ကုန်ပစ္စည်းတင်သွင်းပါက ကုန်ပစ္စည်းအမျိုးအစားအလိုက် စည်းကြပ်တန်ဖိုး၏ ၁၀၀ ရာခိုင်နှုန်း၊ ၂၀၀ ရာခိုင်နှုန်း သို့မဟုတ် ၃၀၀ ရာခိုင်နှုန်းအထိ ဒဏ်ကြေးချမှတ်နိုင်ပြီး အချို့ကုန်ပစ္စည်းများကို ပြည်သူ့ဘဏ္ဍာအဖြစ် သိမ်းဆည်းမည်ဖြစ်ကြောင်း ထုတ်ပြန်ထားသည်။

ထို့ပြင် စည်းကမ်းချိုးဖောက်မှုများအတွက် ဒဏ်ငွေပေးဆောင်စေခြင်း၊ ကုန်ပစ္စည်းသိမ်းဆည်းခြင်းတို့အပြင် ထောင်ဒဏ် ၃ နှစ်အထိ ချမှတ်နိုင်သည့် ပင်လယ်ရေကြောင်းအကောက်ခွန်အက်ဥပဒေ ပုဒ်မ ၁၆၇ (၁) ဖြင့် တရားစွဲဆိုအရေးယူနိုင်ကြောင်း စစ်ကောင်စီ၏ အမိန့်တွင် ဖော်ပြထားသည်။

“ဒဏ်ကြေးတွေ ပိုမြင့်လာတယ်။ သွင်းကုန်တင်သွင်းမှုကို ပိုပြီးတော့ တင်းကျပ်လာတယ်။ ပစ္စည်းသိမ်း၊ ဒဏ်ရိုက်မယ့်အပြင် ထောင်ပါချမယ်ဆိုတာမျိုးပြောလာတာ။ အခြေအနေက ပိုပြီး ဆိုးလာတာပါ” ဟု သွင်းကုန်တင်သွင်းနေသော လုပ်ငန်းရှင်တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

အဆိုပါ အမိန့်ကြော်ငြာစာအမှတ် ၁၁၅/၂၀၂၆ ထုတ်ပြန်ခြင်းနှင့်အတူ ယခင်ထုတ်ပြန်ထားသော အမိန့်ကြော်ငြာစာအမှတ် ၆/၂၀၁၇၊ ၄၀/၂၀၂၃၊ ၁၁၅/၂၀၂၅ နှင့် ၅၁/၂၀၂၆ တို့ကို ဇူလိုင်လ ၆ ရက်နေ့မှစတင်၍ ပယ်ဖျက်ကာ အမိန့်အသစ်ပါ လုပ်ထုံးလုပ်နည်းများဖြင့် အစားထိုးလိုက်ကြောင်း သိရသည်။

စစ်ကောင်စီက ပိတ်ပင်တားမြစ်ထားသော ကုန်ပစ္စည်းများကို တင်ပို့၊ တင်သွင်းခွင့် လုံးဝမပြုဘဲ ကန့်သတ်ကုန်ပစ္စည်းများကို လိုင်စင် သို့မဟုတ် ပါမစ်ရရှိပြီးမှသာ တင်ပို့၊ တင်သွင်းရမည်ဟု သတ်မှတ်ထားသည်။

ကုန်ပစ္စည်းတိုင်းတွင် အမှတ်တံဆိပ်နှင့် ပင်ရင်းနိုင်ငံကို တိကျစွာ ဖော်ပြထားရမည်ဖြစ်ပြီး တင်သွင်းလာသော ကုန်ပစ္စည်းများသည် သွင်းကုန်လိုင်စင်၊ ပါမစ်နှင့် ကြေညာလွှာပါ အချက်အလက်များနှင့် ကိုက်ညီရမည်ဖြစ်ကြောင်း သိရသည်။

အမှတ်တံဆိပ်မပါရှိသော ယာဉ်နှင့် ယန္တရားများကို သိမ်းဆည်းမည်ဖြစ်ပြီး အထွေထွေကုန်ပစ္စည်းများကို စည်းကြပ်တန်ဖိုး၏ ၁၀၀ ရာခိုင်နှုန်းအထိ ဒဏ်ကြေးချမှတ်နိုင်ကြောင်း၊ ပင်ရင်းနိုင်ငံနှင့်ပတ်သက်သည့် အထောက်အထားမတွေ့ရှိပါက ယာဉ်နှင့် ယန္တရားများကို သိမ်းဆည်းကာ အထွေထွေကုန်ပစ္စည်းများကို စည်းကြပ်တန်ဖိုး၏ ၅၀ ရာခိုင်နှုန်း ဒဏ်ရိုက်မည်ဖြစ်ကြောင်း ထုတ်ပြန်ထားသည်။

သို့ရာတွင် အမှတ်တံဆိပ် သို့မဟုတ် ပင်ရင်းနိုင်ငံကို သက်ဆိုင်ရာ အထောက်အထားများဖြင့် စိစစ်အတည်ပြုနိုင်ပါက ဒဏ်ကြေးကင်းလွတ်ခွင့်ပြုနိုင်ကြောင်း သိရသည်။

ယာဉ်နှင့် ယန္တရားများ၏ ထုတ်လုပ်သည့်ခုနှစ် ကွဲလွဲပါက စည်းကြပ်တန်ဖိုးအပေါ် မူတည်၍ ဒဏ်ကြေးချမှတ်မည်ဖြစ်ပြီး သတ်မှတ်ထားသည့် ထုတ်လုပ်သည့်ခုနှစ်ထက် နိမ့်နေပါက ယာဉ် သို့မဟုတ် ယန္တရားကို သိမ်းဆည်းမည်ဖြစ်သည်။

သွင်းကုန်လိုင်စင်၊ ပါမစ် သို့မဟုတ် ကြေညာလွှာတွင် ဖော်ပြထားသည့် အဓိကအမှတ်တံဆိပ်နှင့် အမှတ်တံဆိပ်ခွဲ ကွဲလွဲပါက ယာဉ်နှင့် ယန္တရားများကို စည်းကြပ်တန်ဖိုး၏ ၅၀ ရာခိုင်နှုန်း၊ အထွေထွေကုန်ပစ္စည်းများကို ၂၅ ရာခိုင်နှုန်းအထိ ဒဏ်ကြေးချမှတ်မည်ဖြစ်သည်။

ကုန်ပစ္စည်း၏ ဝင်ဆံ့ပမာဏ၊ အလေးချိန်နှင့် အတိုင်းအတာများ ကွဲလွဲပါက တစ်တန်လျှင် ငွေကျပ် ၅ သိန်း သို့မဟုတ် စည်းကြပ်တန်ဖိုးအပေါ် အခြေခံ၍ ဒဏ်ကြေးချမှတ်မည်ဖြစ်သည်။ လျှပ်စစ်ကား EV များ၏ ဘက်ထရီစွမ်းရည်နှင့် မော်တာစွမ်းရည် ကွဲလွဲမှုများအတွက်လည်း ဒဏ်ကြေးသတ်မှတ်ထားပြီး အပေါင်း၊ အနုတ် ၃ အတွင်း ကွဲလွဲမှုကို ဒဏ်ကြေးကင်းလွတ်ခွင့်ပြုမည်ဖြစ်ကြောင်း သိရသည်။

ကုန်ပစ္စည်းများ လိုင်စင်ခွင့်ပြုချက်မရမီ ကြိုတင်ရောက်ရှိလာပါက ၁၅ ရက်အတွင်း ဒဏ်ကြေးကင်းလွတ်ခွင့်ပြုမည်ဖြစ်သော်လည်း ၁၆ ရက်မှစတင်၍ ရက်အလိုက် ဒဏ်ကြေးများ တိုးမြှင့်ချမှတ်မည်ဖြစ်ပြီး ၆၁ ရက်နှင့်အထက် ကျော်လွန်ပါက ကုန်ပစ္စည်းကို သိမ်းဆည်းမည်ဖြစ်သည်။

အလားတူ သွင်းကုန်လိုင်စင် သက်တမ်းကျော်လွန်ပြီးမှ ကုန်ပစ္စည်းရောက်ရှိလာပါက ၇ ရက်အတွင်း ဒဏ်ကြေးကင်းလွတ်ခွင့်ပြုမည်ဖြစ်သော်လည်း ၈ ရက်မှစတင်၍ ဒဏ်ကြေးချမှတ်ကာ ၃၁ ရက်နှင့်အထက် ကျော်လွန်ပါက ကုန်ပစ္စည်းကို သိမ်းဆည်းမည်ဖြစ်ကြောင်း ထုတ်ပြန်ထားသည်။

ပို့ကုန်များနှင့်ပတ်သက်၍လည်း ပင်ရင်းနိုင်ငံ ကွဲလွဲဖော်ပြခြင်း၊ အရည်အသွေး၊ အတိုင်းအတာနှင့် ကုန်ပစ္စည်းအမျိုးအစား ကွဲလွဲခြင်း၊ လိုင်စင်နှင့် စာရွက်စာတမ်းပါ အချက်အလက်များ မကိုက်ညီခြင်းနှင့် ခွင့်ပြုချက်ထက် ကျော်လွန်တင်ပို့ခြင်းတို့အတွက် စည်းကြပ်တန်ဖိုးအပေါ် အခြေခံ၍ ဒဏ်ကြေးများ ချမှတ်မည်ဖြစ်သည်။

ပို့ကုန်လိုင်စင်၊ ပါမစ်၊ ထုတ်ကုန်ကြေညာလွှာ သို့မဟုတ် တင်ပို့မှုနှင့်သက်ဆိုင်သော စာရွက်စာတမ်းများ မပါရှိပါက ကုန်ပစ္စည်းများကို သိမ်းဆည်းမည်ဖြစ်ကြောင်း သိရသည်။

စစ်ကောင်စီက ကုန်ပစ္စည်းတင်ပို့၊ တင်သွင်းမှုဆိုင်ရာ စည်းကမ်းချိုးဖောက်မှုများကို ဒဏ်ငွေချမှတ်ခြင်း၊ ကုန်ပစ္စည်းသိမ်းဆည်းခြင်းနှင့် ထောင်ဒဏ် ၃ နှစ်အထိ ချမှတ်နိုင်သော ပင်လယ်ရေကြောင်းအကောက်ခွန်အက်ဥပဒေ ပုဒ်မ ၁၆၇ (၁) ဥပဒေပုဒ်မဖြင့်ပါ တရားစွဲဆိုအရေးယူခြင်းများ လုပ်ဆောင်မည်ဖြစ်ကြောင်း အမိန့်ကြော်ငြာစာတွင် ထည့်သွင်းကြေညာထားသည်။

အကြမ်းဖက် မင်းအောင်လှိုင်က နိုင်ငံခြားငွေ သုံးစွဲမှု လျှော့ချရန် မြန်မာနိုင်ငံတွင် သွင်းကုန်မှန်သမျှကို ပိတ်ဆို့ပြီး ပို့ကုန်သာတင်ပို့မည့် စီးပွားရေးမူဝါဒကို အကောင်အထည်ဖော်မည်ဖြစ်ကြောင်း တရားဝင် ထုတ်ပြန်ကြေညာထားသည်။

The post သွင်းကုန်လိုင်စင်မရှိဘဲ ကုန်ပစ္စည်းတင်သွင်းလျှင် ကုန်တန်ဖိုး၏ ၃ ဆအထိ ဒဏ်ရိုက်ပြီး ပစ္စည်းသိမ်းမည့်အပြင် ထောင်ဒဏ် ၃ နှစ်ချမှတ်နိုင်သော ဥပဒေပုဒ်မဖြင့် တရားစွဲ အရေးယူမည်ဟု စစ်ကောင်စီက ကြေညာ appeared first on Khit Thit Media.

မြန်မာ့အရေး ဖြေရှင်းရေးအတွက် အာဆီယံဘုံသဘောတူညီချက် ၅ ရပ်ကို မည်သည့်နည်းနှင့်မှ စွန့်လွှတ်မည်မဟုတ်ဘဲ အဓိကမူဘောင်အဖြစ် ဆက်လက်အသုံးပြုသွားမည်ဖြစ်ကြောင်း အာဆီယံအလှည့်ကျဥက္ကဋ္ဌ ဖိလစ်ပိုင်နိုင်ငံ၏ နိုင်ငံခြားရေးဝန်ကြီး မာရီယာ ထရီဆာ ပီ လာဇာရိုက ပြောဆိုလိုက်သည်။

မြန်မာနိုင်ငံတွင် ပြောင်းလဲဖြစ်ပေါ်နေသည့် မြေပြင်အခြေအနေများနှင့်အညီ ဘုံသဘောတူညီချက် ၅ ရပ်ကို ပိုမိုလက်တွေ့ကျပြီး လိုက်လျောညီထွေရှိသည့် နည်းလမ်းများဖြင့် အကောင်အထည်ဖော်ရန် လိုအပ်ကြောင်း၊ အာဆီယံခေါင်းဆောင်အချို့ကလည်း ပိုမိုထိရောက်ပြီး အဓိပ္ပာယ်ရှိသည့် ရလဒ်များ ထွက်ပေါ်လာစေရန် ဘုံသဘောတူညီချက် ၅ ရပ် အကောင်အထည်ဖော်ပုံကို ပြန်လည်စဉ်းစားရန် တိုက်တွန်းထားကြောင်း ၎င်းက ဆိုသည်။

သို့သော် ယင်းသို့ အကောင်အထည်ဖော်ပုံကို ပြန်လည်စဉ်းစားခြင်းသည် ဘုံသဘောတူညီချက် ၅ ရပ်ကို စွန့်လွှတ်ခြင်း လုံးဝမဟုတ်ကြောင်း ဖိလစ်ပိုင်နိုင်ငံခြားရေးဝန်ကြီးက အလေးပေးပြောဆိုသည်။

“ဖိလစ်ပိုင်နိုင်ငံအတွက်တော့ ဒါဟာ ဘုံသဘောတူညီချက် ၅ ရပ်ကို ဘယ်လိုပုံစံနဲ့မှ စွန့်လွှတ်တာ မဟုတ်ပါဘူး။ အာဆီယံဥက္ကဋ္ဌ ဒါမှမဟုတ် အာဆီယံရဲ့ လုပ်ဆောင်ချက်တွေဟာ ရည်ရွယ်ချက်ရှိရှိနဲ့ မြေပြင်မှာ ဖြစ်ပေါ်နေတဲ့ အခြေအနေမှန်တွေအပေါ် မူတည်ပြီး လုပ်ဆောင်ရမှာ ဖြစ်ပါတယ်” ဟု လာဇာရိုက Bernama သတင်းဌာနသို့ စာဖြင့်ဖြေကြားသည့် အင်တာဗျူးတွင် ပြောဆိုသည်။

၂၀၂၁ ခုနှစ် ဧပြီလတွင် အာဆီယံခေါင်းဆောင်များက ချမှတ်ခဲ့သည့် မြန်မာ့အရေးဆိုင်ရာ အာဆီယံဘုံသဘောတူညီချက် ၅ ရပ်မှာ မြန်မာနိုင်ငံအတွင်း အကြမ်းဖက်မှုများ ချက်ချင်းရပ်တန့်ပြီး သက်ဆိုင်သူအားလုံးက အတတ်နိုင်ဆုံး ထိန်းထိန်းသိမ်းသိမ်း ဆောင်ရွက်ရန်၊ သက်ဆိုင်သူအားလုံးအကြား အပြုသဘောဆောင်သော တွေ့ဆုံဆွေးနွေးမှုများ စတင်ကာ ပြည်သူများ၏ အကျိုးစီးပွားအတွက် ငြိမ်းချမ်းသော အဖြေတစ်ရပ် ရှာဖွေရန်၊ အာဆီယံဥက္ကဋ္ဌ၏ အထူးကိုယ်စားလှယ်က အာဆီယံအထွေထွေအတွင်းရေးမှူး၏ အကူအညီဖြင့် တွေ့ဆုံဆွေးနွေးရေး လုပ်ငန်းစဉ်ကို ကြားဝင်ညှိနှိုင်းပေးရန်၊ အာဆီယံ၏ AHA Centre မှတစ်ဆင့် လူသားချင်းစာနာထောက်ထားမှုဆိုင်ရာ အကူအညီများ ပေးအပ်ရန်နှင့် အာဆီယံအထူးကိုယ်စားလှယ်နှင့် ကိုယ်စားလှယ်အဖွဲ့က မြန်မာနိုင်ငံသို့ သွားရောက်၍ သက်ဆိုင်သူအားလုံးနှင့် တွေ့ဆုံရန်တို့ ဖြစ်သည်။

မြန်မာနိုင်ငံကို အာဆီယံအစည်းအဝေးများတွင် အပြည့်အဝ ကိုယ်စားပြုခွင့် ပြန်လည်ပေးအပ်ရေးမှာလည်း ဘုံသဘောတူညီချက် ၅ ရပ် အကောင်အထည်ဖော်မှုတွင် လက်တွေ့ကျသည့် တိုးတက်မှုများ ရှိ၊ မရှိအပေါ် မူတည်မည်ဖြစ်ကြောင်း လာဇာရိုက ပြောသည်။

အထူးသဖြင့် ပဋိပက္ခနှင့် အကြမ်းဖက်မှုများ လျှော့ချရေး၊ အပြုသဘောဆောင်သည့် တွေ့ဆုံဆွေးနွေးမှုများနှင့် လူသားချင်းစာနာထောက်ထားမှု အကူအညီများ ပေးပို့ရေးတို့တွင် မြင်သာထင်သာရှိသည့် တိုးတက်မှုများ ရှိရန် လိုအပ်ကြောင်း ၎င်းက ဆိုသည်။

အာဆီယံခေါင်းဆောင်များက ဘုံသဘောတူညီချက် ၅ ရပ် အကောင်အထည်ဖော်မှုကို နှစ်စဉ် ပြန်လည်သုံးသပ်ဆုံးဖြတ်သည့် လုပ်ငန်းစဉ်မှတစ်ဆင့် မြန်မာနိုင်ငံ၏ ပဋိပက္ခလျှော့ချရေး၊ တွေ့ဆုံဆွေးနွေးရေးနှင့် လူသားချင်းစာနာထောက်ထားမှု အကူအညီပေးရေးဆိုင်ရာ တိုးတက်မှုများကို အာဆီယံအဖွဲ့ဝင်နိုင်ငံများက သုံးသပ်နိုင်ကြောင်း လာဇာရိုက ရှင်းပြသည်။

အာဆီယံအလှည့်ကျဥက္ကဋ္ဌအနေဖြင့် အာဆီယံအဖွဲ့ဝင်နိုင်ငံများ စုစည်းတွေ့ဆုံကာ မြန်မာနိုင်ငံနှင့် အာဆီယံ၏ ထိတွေ့ဆက်ဆံရေး၊ ရှေ့ဆက်ဆောင်ရွက်မည့် လမ်းကြောင်းနှင့် အနာဂတ်အမြင်များကို အပြန်အလှန် ဆွေးနွေးနိုင်မည့် အခွင့်အလမ်းများ ဖန်တီးပေးသွားရန် ရည်ရွယ်ထားကြောင်းလည်း လာဇာရိုက ပြောသည်။

၂၀၂၁ ခုနှစ် ဖေဖော်ဝါရီလတွင် စစ်တပ်က အာဏာသိမ်းပြီး ဒေါ်အောင်ဆန်းစုကြည် ဦးဆောင်သည့် အရပ်သားအစိုးရကို ဖြုတ်ချခဲ့ပြီးနောက် အာဆီယံက မြန်မာစစ်တပ်၏ ထိပ်တန်းခေါင်းဆောင်များကို အာဆီယံထိပ်သီးအစည်းအဝေးများ တက်ရောက်ခွင့် ပိတ်ပင်ထားသည်။ အာဆီယံအဆင့်မြင့်အစည်းအဝေးများတွင်လည်း မြန်မာနိုင်ငံမှ နိုင်ငံရေးနှင့် မသက်ဆိုင်သည့် ကိုယ်စားလှယ်များကိုသာ တက်ရောက်ခွင့်ပြုထားသည်။

ဇွန်လ ၂၅ ရက်နေ့တွင် မလေးရှားနိုင်ငံခြားရေးဝန်ကြီး မိုဟာမက် ဟာဆန်ကလည်း ဘုံသဘောတူညီချက် ၅ ရပ်သည် မြန်မာ့အရေး ဖြေရှင်းရေးအတွက် အဓိကမူဘောင်အဖြစ် ဆက်လက်တည်ရှိနေကြောင်း ပြောဆိုခဲ့ပြီး ယင်းသဘောတူညီချက်ကို ပိုမိုထိရောက်စွာ အကောင်အထည်ဖော်နိုင်ရေး နည်းလမ်းသစ်များကို အာဆီယံက ရှာဖွေနေကြောင်း ပြောဆိုထားသည်။

ထို့ပြင် မြန်မာစစ်တပ်၊ အမျိုးသားညီညွတ်ရေးအစိုးရ NUG၊ ပြည်သူ့ကာကွယ်ရေးတပ်ဖွဲ့ PDF များနှင့် တိုင်းရင်းသားလက်နက်ကိုင်အဖွဲ့အစည်းများ အပါအဝင် မြန်မာ့အရေး သက်ဆိုင်သူအားလုံးနှင့် ဆက်လက်ထိတွေ့ဆွေးနွေးကာ အာဆီယံဦးဆောင်သည့် ငြိမ်းချမ်းရေးကြိုးပမ်းမှုများကို ပံ့ပိုးသွားမည်ဖြစ်ကြောင်း မလေးရှားနိုင်ငံခြားရေးဝန်ကြီးက ပြောဆိုထားသည်။

The post မြန်မာ့အရေး အာဆီယံဘုံသဘောတူညီချက် ၅ ရပ်ကို မည်သည့်နည်းနှင့်မှ စွန့်လွှတ်မည်မဟုတ်ဟု အာဆီယံဥက္ကဋ္ဌ ဖိလစ်ပိုင်နိုင်ငံခြားရေးဝန်ကြီး ပြောဆို appeared first on Khit Thit Media.

ရန်ကုန်တိုင်း၊ လှိုင်မြို့နယ်၊ လှည်းတန်းဘူတာနှင့် ဗဟိုလမ်းတစ်ဝိုက်တွင် ရတနာအောင် လူနာတင်ပရဟိတ ယာဉ်များကို အသုံးပြု၍ ရဲနှင့် ပျူစောထီးများက လူငယ်များကို ဖမ်းဆီး ပေါ်တာဆွဲကာ စစ်မှု ထမ်းအဖြစ် စုဆောင်းနေကြောင်း ဒေသပြည်သူများနှင့်ဖမ်းဆီးခံထားရသော လူငယ်တချို့၏ မိဘများက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇူလိုင်လ ၅ ရက်နေ့ မွန်းလွဲ ၁၂ နာရီ ၄၅ မိနစ်ခန့်တွင် လှည်းတန်းဘူတာသို့ ဆိုင်ကယ်အမှတ် ၄၁ယ/ ၃၀၉၉၂ ဖြင့် ကမာရွတ်မြို့နယ်ရဲစခန်းမှ ရဲ ၁ ဦး၊ ရဲသတင်းပေးနှင်ပျူစောထီး ဇွဲထက်နောင် (ခ) နောင်နောင်တို့ ရောက်ရှိလာပြီး ရထားလမ်းပလက်ဖောင်းပေါ်တွင် ထိုင်နေသည့် လူငယ် ၂ ဦးကို မသင်္ကာဟုဆိုကာ ဖုန်းများကို စစ်ဆေးပြီး ဖမ်းဆီးခဲ့ကြောင်း၊ ဖမ်းဆီးခံရသည့် လူငယ် ၂ ဦးကို ရတနာအောင်ပရဟိတယာဉ်ပေါ်သို့ တင်ဆောင်ခေါ်ဆောင်သွားခဲ့ကြောင်း သိရှိရသည်။

ကမာရွတ်မြို့နယ်အတွင်းတွင် ရဲနှင့်ပျူစောထီးများက ရတနာအောင် ပရဟိတအဖွဲ့၏ အနက်ရောင်နှင့် အဖြူရောင် လူနာတင်ယာဉ် ၂ စီးကို အသုံးပြု၍ ညနေပိုင်းနှင့် ညပိုင်းများတွင် လူငယ်များကို ဖမ်းဆီးခြင်း၊ ပေါ်တာဆွဲခြင်းနှင့် စစ်မှုထမ်းအဖြစ် စုဆောင်းခြင်းများ ပြုလုပ်နေကြောင်း ဒေသခံများက ဆိုသည်။

“အခုရက်ပိုင်းအတွင်း ဒီလို လူဖမ်းတာ ၃ ကြိမ်၊ ၄ ကြိမ်လောက် ရှိနေပြီ။ ရတနာအောင်ပရဟိတကား ၂ စီးက စည်ပင်ရုံးသစ်မှာ ထိုးထားလေ့ရှိတယ်။ အဲဒီကနေ ထွက်ပြီး လူဖမ်းတာ။ သူတို့ထဲက တစ်ယောက်က ပရဟိတကားနဲ့ လူဖမ်းရတာ ပိုလွယ်တယ်လို့တောင် ပြောတယ်။ လူတွေက လူနာတင်ကားဆို တော့ သတိမထားမိကြဘူး” ဟု ဒေသပြည်သူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

အလားတူ ဇူလိုင်လ ၂ ရက်နေ့ ညနေ ၆ နာရီ ၃၀ မိနစ်ခန့်အချိန်ကလည်း ရဲနှင့်ပျူစောထီးများက ဗဟိုလမ်း (ခိုင်ရွှေဝါလမ်း) ဆိုက်ကားဂိတ်မှတ်တိုင်အနီး၌ အလုပ်မှ ပြန်လာသည့် လူငယ်တစ်ဦးကိုလည်း မသင်္ကာဟုဆိုကာ ဖုန်းစစ်ဆေးခဲ့ပြီး ပိုက်ဆံအိတ်အတွင်းမှ ငွေများကို ယူဆောင်ခဲ့ကြောင်း သိရှိရသည်။

ကမာရွတ်မြို့နယ်တွင် လူငယ်များကို ရဲများနှင့်အတူ လိုက်လံ ဖမ်းဆီး ပေါ်တာဆွဲနေသော ပျူစောထီး ဇွဲထက်နောင် (ခ) နောင်နောင် စစ်အာဏာမသိမ်းမီက ရဲ သတင်းပေးလုပ်ကိုင်ခဲ့ပြီး အာဏာသိမ်းပြီးနောက် ရဲများနှင့် ပူးပေါင်း၍ လူဖမ်း ငွေညှစ်ခြင်း၊ ပေါ်တာဆွဲ၍ ငွေညှစ်ခြင်းများ လုပ်ဆောင်နေသူဖြစကြောင်း၊ ဇွဲထက်နောင်(ခ) နောင်နောင်က ဆိုင်ကယ်အမှတ် ၇၁ယ/၂၁၀၀၀ ကို မကြာခဏ အသုံးပြုကာ ရဲအယောင်ဆောင် သွားလာလေ့ရှိကြောင်း သိရှိရသည်။

“ဇွဲထက်နောင်က လူဖမ်းပြီး ငွေညှစ်တယ်။ ငွေမရရင် စုဆောင်းရေးကို ပို့တယ်လို့ သိရတယ်။ အခု စစ်မှုထမ်းအတွက် လူလိုနေလို့ ပိုပြီး ဖမ်းမယ့်အခြေအနေရှိတယ်။ ဧည့်စာရင်းမတိုင်ထားရင်လည်း ဖမ်းခေါ်တာရှိတယ်။ ” ဟု အခြေအနေကို သိရှိသည့် ဒေသပြည်သူတစ်ဦးက ပြောဆိုသည်။

ထို့ပြင် ဇူလိုင်လ ၇ ရက်နေ့တွင် လှည်းတန်းဘူတာရှေ့၊ ပတ္တမြားလမ်းထိပ်နှင့် ခိုင်ရွှေဝါလမ်းထိပ်တစ်ဝိုက်၌ အရပ်ဝတ်များဖြင့် စောင့်ကြည့် ထောက်လှမ်းနေသူများကို နေရာအနှံ့ တွေ့ရှိရပြီး လှည်းတန်းဘူတာရှေ့တွင် အရပ်ဝတ် ရဲတပ်ဖွဲ့ဝင်တစ်ဦးက နံနက် ၆ နာရီမတိုင်မီကတည်းက ရောက်ရှိကာ လူငယ်များကို လိုက်လံထောက်လှမ်းမှုများရှိနေကြောင်း ဒေသခံများက ပြောဆိုသည်။

အဆိုပါ ရဲများနှင့်ပျူစောထီးများမှာ ပတ္တမြားလမ်းထိပ် ကွမ်းယာဆိုင်အနီးတွင်လည်းကောင်း၊ ခိုင်ရွှေဝါလမ်းထိပ်၊ ၁၆ ပေဂုံးအနီးတွင်လည်းကောင်း၊ ကမာရွတ်မြို့နယ်အတွင်းရှိ ဆိုက်ကားဂိတ်တစ်ဝိုက်တွင်လည်းကောင်း လှည့်လည် လူငယ်များ ရှာဖွေဖမ်းဆီးနေကြောင်း သိရှိရသည်။

လက်ရှိတွင် စစ်ကောင်စီက စစ်မှုထမ်းရန် လူအင်အားလိုအပ်ချက် မြင့်တက်နေသဖြင့် လူငယ်များ ကို ဖမ်းဆီး ပေါ်တာဆွဲခြင်းနှင့် စစ်မှုထမ်းစုဆောင်းရေးသို့ ပို့ဆောင်ခြင်းများ ပိုမိုလုပ်ဆောင်နေကြောင်း ၊ ကမာရွတ်မြို့နယ်၊ လှည်းတန်းဘူတာ၊ ဗဟိုလမ်းနှင့် အနီးတစ်ဝိုက်တွင် ရတနာအောင် အမည်တပ်ထားသော လူနာတင်ပရဟိတယာဉ်များဖြင့် လူငယ်များကို လှည့်လည် ဖမ်းဆီးနေခြင်းဖြစ်ကြောင်း​ ပြည်သူများထံမှ စုံစမ်းသိရှိရသည်။

ဓာတ်ပုံ- မြိတ်တွင် ၂၀၂၁ ခုနှစ် မတ်လအတွင်း စစ်တပ်နှင့်ရဲများက လူနာတင်ကားနှင့်ပရဟိတယာဉ်များကို အသုံးပြု ၍ ပြည်သူများကို လိုက်လံဖမ်းဆီး ပစ်ခတ်ခဲ့စဉ်။ (ပုံအဟောင်းကို အသုံးပြုထားပါသည်။)

The post ရန်ကုန် လှည်းတန်းဘူတာနှင့် ဗဟိုလမ်းတစ်ဝိုက်တွင် ရတနာအောင် လူနာတင် ပရဟိတယာဉ်များဖြင့် ရဲနှင့် ပျူစောထီးများက စစ်မှုထမ်း ရရှိရေး လူငယ်များကို ဖမ်းဆီး ပေါ်တာဆွဲ appeared first on Khit Thit Media.